Vantshwa Lava Tsakeke eNtirhweni Wa Yehova

“Ŝi tsanḍa ni wanḍisanyana, u tiv̌iwa hi ku endla ka yena loko mafambelo ya yena ma ta saseka ni ku lulama.”—SWIVURISO 20:11.

1. I swilo swihi swin’wana leswi xiyekaka leswi Bibele yi swi vulaka hi Samuwele?

MUNTSHWA Samuwele a nga ha va a ri ni malembe manharhu ku ya ka ntlhanu hi vukhale loko a sungula ku “tira” etabernakeleni ya Yehova eXilo. Wun’wana wa mintirho ya yena a ku ri ku pfula “tinyangwa ta yindlu ya Yehova.” Bibele yi vula leswaku “Samuel a kula, a ṭakisa Yehova ni v̌anhu.” Loko a kurile, u vuyisele Israyele evugandzerini bya ntiyiso. U tirhele Xikwembu “hi masiku hikwawo ya ku hanya ka yena.” Hambi loko a “dyuhele” ni loko a “basile misisi” a ha khutaza vanhu ku ‘chava Yehova ni ku n’wi tirhela hi ntiyiso.’ Xana a swi nga ta tsakisa loko vanhu a va kota ku vula swilo leswi swinene hi wena hi laha Bibele yi vulaka ha kona hi Samuwele?—1 Samuel 1:24; 2:18, 26; 3:15; 7:2-4, 15; 12:2, 24.

2. Vana lavantsongo va dyondza yini eminhlanganweni ya vanhu va Yehova namuntlha?

² Loko u ri un’wana wa Timbhoni ta Yehova kumbe u va kona eminhlanganweni ya vona ya Vukriste, languta eHolweni ya Mfumo laha dyondzo leyi yi dyondziwaka kona. U vona vanhu va malembe hinkwawo. Kumbexana ku ni vanhu lava ana se va ‘dyuhaleke ni ku basa misisi.’ Ku ni vatswari, vantshwa, vana lavantsongo, hambi ku ri tincece leti angariweke. Xana vana lavantsongo ana se va le ku dyondzeni? Ina. Vutisa lava hi voxe va tisiweke eminhlanganweni yo tano loko va ha ri vantsongo swinene. Va ta ku byela kahle leswaku kusukela emalembeni ya vona yo sungula, a va dyondza ku xixima Xikwembu, ku rhandza vanhu ni ku tlangela tindhawu leti xi gandzeriwaka eka tona. Loko nkarhi wu ya emahlweni, vana va dyondza mintiyiso leyinene. Vantshwa vo tala, endzhaku ko kula hi vutivi ni ku tlangela, va va xiphemu xa ‘majaha ni vanhwana, swikoxa ni vana’ lava mupisalema a va khutazeke ku “ḍuni[sa] v̌ito ra Yehova! Hikuv̌a v̌ito ra yena hi rona nṭena leri tlakukeke.”—Psalma 148:12, 13.

3. Swi ta njhani leswaku vantshwa lava tivaka Bibele va languta vutomi hi laha ku hambaneke ni lava nga yi tiviki?

³ Loko u ri muntshwa loyi vatswari va wena va ku tisaka nkarhi na nkarhi eka minhlangano yo tano, hakunene u katekisiwile. Vantshwa vo tala va xanisiwa hi swiphiqo swa misava. Van’wana va nga ha chava leswaku vanhu va ta herisa misava. Wa swi tiva leswaku Xikwembu xi nge swi pfumeleli sweswo swi humelela, leswaku xi nge pfumeleli vanhu va hambeta va herisa pulanete leyi yo saseka. Ematshan’wini yo pfumelela sweswo swi humelela, hi ku ya hi Bibele, Xikwembu xi ta “herisa lava herisaka misava.” Wa swi tiva leswaku Bibele yi tshembisa leswaku vumundzuku lebyi vangamaka emisaveni leyo lulama ya Xikwembu byi kusuhi.—Nhlavutelo 11:18; Psalma 37:29; 2 Petro 3:13.

Ripfumelo Ra Wena N’wini

4. I vutihlamuleri byihi lebyi ku tiva tindlela ta Xikwembu ku byi vekaka eka vantshwa, naswona muntshwa Samuwele a a ri xikombiso lexinene eka leswi hi ndlela yihi?

⁴ Eku sunguleni, ndlela ya Vukriste bya ntiyiso yi nga ha va yi ve hi nsusumeto wa vatswari va wena. Kumbexana u te eminhlanganweni ya Vukriste hi mhaka ya leswi va ku tiseke, naswona u nga ha va u hlanganyele entirhweni wa Xikwembu hi mhaka ya leswi va swi endleke. Kambe, loko nkarhi wu ya emahlweni, ku tirhela ni ku yingisa Yehova swi nga ha va ntsako wa wena. Mana wa Samuwele lontsongo u n’wi sungule hi ndlela leyinene, kambe yena hi xiyexe a a fanele ku swi landzela. Ha hlaya: “Swi tsanḍa ni wanḍisanyana, u tiv̌iwa hi ku endla ka yena loko mafambelo ya yena ma ta saseka ni ku lulama.”—Swivuriso 20:11.

5. (a) Bibele i ya nkoka wo tanihi kwihi? (b) Pawulo u n’wi byele yini Timotiya hi nkoka wa Rito leri tsariweke ra Xikwembu?

⁵ Matsalwa ma hi byela leswi Xikwembu xi swi lavaka. Ma hi komba erivaleni ndlela leyi hi nga xi tsakisaka ha yona, ma hi nyika xiphemu lexikulu xa mahungu lama nga hi pfunaka. Muapostola Pawulo u byele mupfuni wa yena lontshwa Timotiya a ku: “Matsalwa lawa hinkwawo ma huhutiwile hi Xikwembu, ma pfuna ku dyondzisa, ni ku laya, ni ku ololoxa, ni ku tolovetisa leswo lulama, leswaku mutirheli wa Xikwembu a va la hetisekeke, a tilulamisela ku endla ntirho wun’wana ni wun’wana lowunene.”—2 Timotiya 3:16, 17.

6. Buku ya Swivuriso yi vula yini hi nkoka wa vutivi ni vutlhari bya Xikwembu?

⁶ Nakambe Bibele yi hi byela ku ‘yingisa ndzayo kutani hi tlhariha.’ Yi ri “yingisa” milawu ya Xikwembu, “rilela vutivi,” ni ku “lava” vutlhari tanihi loko u lava rifuwo ra nkoka leri fihliweke. Loko u landzela xitsundzuxo lexi, kutani “u ta kuma ku tiv̌a ka Šikwembu. Hikuv̌a Yehova hi yena l’a nyikaka v̌utlhari.” Nakambe hi kuma xitsundzuxo lexi: “Ŝeŝi, v̌ana v̌anga, nḍi yingiseni, ku katekile la’v̌a yaka hi tindlela ta mina! Yingisani dyonḍo, mi ta tlhariha, mi nga yi tšukumeti. Ku katekile munhu la nḍi yingisaka . . . hikuv̌a l’a ndzi kumaka o kumile v̌utomi, o kumile tintŝalo ta Yehova.” Xana u teka Bibele yi ri ya nkoka lerova u veka muxaka wolowo wa matshalatshala eku dyondzeni ka swilo leswi yi swi vulaka?—Swivuriso 2:1-5; 8:32-35.

Kuma Vutivi

7. Hi swihi swilo swa nkoka lowukulu leswi hi fanelaka ku swi dyondza?

⁷ Vantshwa van’wana va tiva vuxokoxoko hinkwabyo bya mintlango, kumbe va nga ku byela hinkwaswo hi ntlawa wa vuyimbeleri lebyi va byi rhandzaka. Va kuma swilo leswi swi olova ku swi dyondza ni ku swi tsundzuka hikuva va swi tsakela. Kambe xivutiso xa nkoka hi lexi, va tiva yini hi Xikwembu? Anakanya ntsena hi leswi xi swi endleke. Xikwembu xi endle misava. Xi vhumbe leswi vanhu va nga ta swi endla ni leswi nga ta humelela endzhaku emahlweni ko va swiendlakalo swi endleka. Bibele a yi hi byeli hi Xikwembu ntsena kambe yi hi dyondzisa ndlela leyi hi nga xi tsakisaka ha yona. Yi hi komba ndlela leyi ha yona hi nga kumaka vutomi lebyi tsakisaka sweswi ni ndlela leyi ha yona hi nga kumaka vutomi lebyi nga heriki emisaveni ya xona leyintshwa yo lulama. Xana sweswo a hi swa nkoka lowukulu ku tlula ku tiva loyi a wineke ntlango wa bolo kumbe ku yingisela mavito ya swiyimbeleri leswi vanhu ku nga ri khale va nga ta swi rivala?—Esaya 42:5, 9; 46:9, 10; Amos 3:7.

8. Hi xihi xikombiso lexinene lexi vekiweke hi Yosiyasi na Yesu?

⁸ Loko muntshwa Hosi Yosiyasi a ri ni malembe ya 15 hi vukhale, a a “sungula ku lav̌a Šikwembu ša Davida, tata wa yena.” Loko Yesu a ri na malembe ya 12, a a kumeka “a tshamile exikarhi ka vadyondzisi, a va yingisela, ni ku va vutisa swivutiso.”a Ku nga khathariseki malembe lawa u nga na wona, xana tanihi hi Yosiyasi na Yesu, u kurisa ku navela ka ntiyiso eku dyondzeni ka swilo leswi Xikwembu xi swi endleke ni leswi ku nga ri khale xi nga ta swi endla?—2 Tikronika 34:3; Luka 2:46.

9. (a) I xiphiqo xihi lexi vantshwa vo tala va nga ha vaka na xona? (b) I yini lexi nga endlaka ku hlaya ni ku dyondza swi olova, naswona xana u kume leswi swi ri ntiyiso?

⁹ Hambi swi ri tano, u nga ha vula u ku: ‘Ku dyondza swa tika.’ Vanhu vo tala, lavantsongo ni lavakulu a va titolovetanga ku hlaya ku fikela laha ku hlaya ku olovaka. Loko u ya u hlaya, ku hlaya ku va loku olovaka. Loko u ya u dyondza, ku dyondza ku ya ku va loku olovaka. U hlaganisa mianakanyo leyintshwa ni swilo leswi ana u swi tivaka, u swi endla swi olova ku swi twisisa ni ku swi tsundzuka.

10. (a) Xana unga swi kumisa ku yini swo tala eminhlanganweni ya Vukriste? (b) Hi wihi ntokoto wa wena n’wini emhakeni leyi?

¹⁰ I yini lexi nga ku pfunaka ku dyondza swo tala hi Xikwembu? Kumbexana u nga va kona nkarhi na nkarhi eminhlanganweni ya Vukriste. Xana u nga lunghiselela ka ha ri ni nkarhi kutani u hlamula hi xiviri? Hi xikombiso, xana u nga kuma mpimo lowu enteke wa vutivi eka dyondzo leyi hi ku languta eka Matsalwa lama kombisiweke kambe ma nga tshahiwangiki? Xana u ri tsarile rito rin’we kumbe mambirhi entileni, yo ku tsundzuxa hi leswi tsalwa rin’wana ni rin’wana ri swi engetelaka eka ndzimana kumbe eka dyondzo? Xana u ni mukhuva wa ku engetela kwalomu ka rin’we ra matsalwa lawa loko u nhlamula ku kombisa ku twisisa ka wena ka bulo ra Matsalwa? Nkulu wa bandlha loyi a veke kona eminhlanganweni nkarhi na nkarhi ku ringana malembe yo tala u ri: “Ndzi swi kuma swi nonon’hwa ku hlayisa mianakanyo ya mina eka dyondzo yihi na yihi leyi ndzi nga yi lunghiselelangiki hi xiviri, kambe i ntsako lowukulu ku landzelela yin’wana leyi ndzi yi dyondzeke hi vukheta.”

11. Xana u nga swi kumisa ku yini swo tala eka tinkulumo leri sekeriweke eBibeleni, naswona ha yini leswi swi ri swa nkoka swonghasi?

¹¹ Loko u yingisela tinkulumo ta Bibele, xana u teka tinotsi to koma ta ku ku pfuna ku tlhantlha ndlela leyi nkulumo yi nga akaka ha yona ni ku kurisa mianakanyo ya wena eka leswi swi vuriweke? Xana u ringanisa leswi u swi tweke na leswi ana se u swi tivaka leswaku u swi twisisa hi ku olova ni ku swi tsundzuka ku antswa? Yesu u khongerile: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” (Yohane 17:3) Xana vutivi lebyi yisaka evuton’wini, a hi vutivi byo antswa lebyi u nga byi kumaka? Xiya leswi Bibele yi swi vulaka hi leswi: “Hikuv̌a Yehova hi yena l’a nyikaka v̌utlhari ku tiv̌a ni ku twisisa ŝi huma enoṅweni wa yena. Loko v̌utlhari byi ta nghena e mbilwini ya wena, ku tiv̌a ku ta ṭakisa moya wa wena; ku anakanya ku ta ku langutela, ku twisisa ku ta ku hlayisa.”—Swivuriso 2:6, 10, 11.

Kula Eku Tlangeleni

12. Hi swihi swilo swin’wana leswi xiyekaka leswi Xikwembu xi hi endleleke swona?

¹² Xana ha swi tlangela leswi Xikwembu xi hi endleleke swona hakunene? Xi vumbe misava yo saseka kutani xi lunghiselela vutomi eka yona. Xi vumbe vatswari va hina vo sungula, xisweswo xi endla swi koteka leswaku hi velekiwa. Xi hi lunghiselela ku va ni nseketelo wa mindyangu ni wa bandlha leri nga ni rirhandzu. (Genesa 1:27, 28; Yohane 13:35; Vaheveru 10:25) Xi rhumele N’wana wa xona wa mativula emisaveni ku hi dyondzisa swo tala hi xona ni ku nyikela nkutsulo lowu endlaka leswaku vutomi lebyi nga heriki byi koteka. Xana wa titlangela tinyiko to tano leti hlamarisaka hakunene? Xana ti ku susumetela ku amukela xirhambo xa xona xo dyondza ha xona ni ku xi tirhela?—Matewu 20:28; Yohane 1:18; Varhoma 5:21.

13. Ha yini u vona onge Xikwembu xa va tsakela vanhu?

¹³ Muvumbi wa vuako u tsakela vanhu. U vule Abrahama ‘nakulorhi,’ naswona u te eka Muxe: “Nḍa ku tiv̌a hi v̌ito ra wena.” (Esaya 41:18; Eksoda 33:12) Buku ya Nhlavutelo yi komba leswaku Xikwembu xi na buku yo fanekisela, kumbe “[buku] ya vutomi,” leyi nga na mavito ya malandza ya xona layo tshembeka, “misava yi nga si tumbuluka.” Xana vito ra wena ri ta nghenisiwa kwalaho?—Nhlavutelo 3:5; 17:8; 2 Timotiya 2:19.

14. Ku landzela misinya ya milawu ya Xikwembu swi nga antswisa vutomi bya wena hi ndlela yihi?

¹⁴ Misinya ya milawu ya Xikwembu ya tirha. Ku endla swilo hi ndlela ya xona swi herisa swiphiqo swo tala—ku tikhoma loko biha, ku tirhisiwa loko biha ka swidzidzirisi, vudakwa, tinyimba leti nga lavekiki, vuvabyi lebyi tluletaka hi rimbewu, vukarhi, ku dlaya, ni nxaxamelo wo leha wa vuvabyi byin’wana. Ku landzela tindlela ta xona nakambe swi ta hi pfuna ku kuma vanghana va ntiyiso ni ku hanya vutomi lebyi tsakisaka. Xana sweswo a hi swa nkoka ku swi endla? (1 Vakorinto 6:9-11) Hambi ku ri muntshwa loyi ana se a tiyisiweke ku endla swilo hi ndlela ya Xikwembu a nga kuma matimba yo tala yo endla leswi lulamake. Bibele yi ri: “Lo’nene, [Yehova] u ṅwi endla hi v̌unene.” Nakambe swa hi tshembisa leswaku a nge “ṭhiki la’v̌a ṅwi ranḍaka” kumbe a nge “tšukumeti tiko ra yena.”—Psalma 18:25; 37:28; 94:14; Esaya 40:29-31.

Yana Emahlweni U Tirhela Xikwembu

15. I xitsundzuxo xihi xa Xikwembu lexi Solomoni a xi nyikaka vantshwa?

¹⁵ Xana swikongomelo swa wena swi tiseketele hi misava ya khale leyi faka kumbe leyintshwa yo lulama? Xana u yingisa Xikwembu, kumbe u yingisa vanhu vo tlhariha va misava lava xi kanetaka? Xana ku tihungasa, dyondzo ya le henhla kumbe ntirho-vutomi wa ku tihanyisa lowu hetaka nkarhi swi ta emahlweni ka ntirho wa Xikwembu? Hosi yo tlhariha Solomoni yi tsale buku hinkwayo ya Bibele ya Eklesiasta ku komba leswi faneleke ku rhanga evuton’wini bya hina. U hetelerile: “Anakanya muv̌umbi wa wena hi masiku ya v̌untshwa bya wena. Ku nga si ta masiku ya khombo, ku nga si fika ni malembe lawa u nga ta v̌ula ha wona, u ku: A nḍa ha ṭakisiwi ha wona. A hi yingiseni makumu ya timhaka hikwato: Tšhava Šikwembu u hlayisa milawu ya šona, hikuv̌a hi yona mfanelo hikwayo ya munhu.”—Eklesiasta 12:1, 13.

16. Vantshwa va nga fikelela malunghelo lama engetelelekeke hi ndlela yihi?

¹⁶ Vamakwerhu hinkwavo lava kuleke va Vukriste lava u va tivaka—vakulu, maphayona, ni valanguteri va xifundza ni muganga—a va ri vantshwa. I yini lexi yiseke eka mikateko leyi va yi tsakelaka namuntlha? A va rhandza Xikwembu naswona a va lava ku xi tirhela. Vo tala va vona evuntshweni bya vona va tirhise nkarhi wo tala lowu va wu kumeke ku kuma vutivi ni ntokoto. Va dyondze va tlhela va hlanganyela eminhlanganweni. Va hlanganyele eku dyondziseni, naswona va fikelele malunghelo lama engetelekeke—vuphayona, ntirho wa le Bethele, kumbe ntirho wun’wana lowu vuyerisaka. A va nga ri ‘vantshwa lava nga tolovelekangiki;’ a va ri ni ku navela ni mivilelo leyi tolovelekeke yo tanihi leyi u nga na yona. Kambe, va titirhise hi ku pfumelelana ni xitsundzuxo lexi nge: “Xin’wana ni xin’wana lexi mi xi endlaka, xi endleni hi mbilu hinkwayo, onge hi loko mi tirhela [Yehova], ku nga ri vanhu.”—Vakolosa 3:23; ringanisa Luka 10:27; 2 Timotiya 2:15.

17. I yini leswi nga pfunaka vantshwa ku endla nhluvuko entirhweni wa Xikwembu?

¹⁷ Ku vuriwa yini hi wena? Xana wa swi tlangela swilo swa Xikwembu hakunene? Xana u hlawula vanghana exikarhi ka lava va vekaka mintirho ya vona ya moya ku sungula? Xana wa va khutaza van’wana ku hlanganyela na wena entirhweni wa Vukriste? Xana wa ya entirhweni wa Vukriste ni lava kuleke, lava nga ni ntokoto leswaku u dyondza eka vona, u nantswa ntsako wa vona ni ku khutazeka hi mintirho ya vona leyinene? Mbhoni yin’wana yi tsundzuka siku, kwalomu ka 20 wa malembe lama hundzeke, loko ro sungula munhu la kuleke hi rirhandzu a n’wi rhambe ku famba na yena evutirhelini bya nsimu. U ri leyi a ku ri yinhla yo hundzuka evuton’wini bya yena: “A ku ri siku ro sungula ndzi famba hikuva ndzi swi rhandza, ku nga ri hi leswi vatswari va mina va fambaka na mina.”

18. Hi swihi swilo swo anakanya ha swona u nga si tinyiketela ku khuvuriwa?

¹⁸ Loko u endla nhluvuko eku endleni ka swilo hi ndlela ya Xikwembu, hi ku hatlisa u nga ha ehleketa hi nkhuvulo. I swa nkoka ku tsundzuka leswaku nkhuvulo a ko va mukhuva wo karhi wo hundzela eka vukulukumba. A swi kombisi swona leswaku wa kula, kumbe nchumu lowu u faneleke ku wu endla hi leswi vanghana va wena va tekeke goza leri. Emahlweni ko kombela ku khuvuriwa, u fanele u va ni vutivi bya xisekelo bya ntiyiso kutani u hanya hi ku pfumelelana ni Rito ra Xikwembu. U fanele u ri na ntokoto lowu aneleke eku avelaneni ka vutivi byebyo ni van’wana ni ku twisisa leswaku i xiphemu xa nkoka xa vugandzeri bya ntiyiso. (Matewu 24:14; 28:19, 20) Nakambe u fanele ku tiva leswaku endzhaku ko teka goza leri ra nkoka ra Vukriste u languteriwa ku hanya hi ku pfumelelana ni mahanyelo lamanene ya misinya ya milawu ya Bibele.b Embilwini ya wena, u fanele ku va u nyiketele vutomi bya wena eka Tatana wa rirhandzu wa le tilweni.—Ringanisa Psalma 40:8, 9.

19. Munhu u fanele a khuvuriwa rini?

¹⁹ Nkhuvulo i goza leri u ri tekaka loko u kunguhate u heta leswaku ku nga khathariseki leswi nga ta humelela evuton’wini bya wena hinkwabyo u ta tirhela Xikwembu. I xikombiso xa le rivaleni xa leswaku u endle ku tinyiketela loku heleleke, loku tshembekeke, loku nga hikiwangiki eka Yehova ha Yesu Kriste ku endla ku rhandza ka Xikwembu. Nkulu un’wana wa Mukriste u tsundzuka siku leri, kwalomu ka hafu ya lembe xidzana leri hundzeke, a a xiyeke leswaku: “Ndzi fanele ndzi endla swin’wana ha swona!” Michelle, mbhoni leyintsongo leyi khuvuriweke eNewcastle, Nghilandi, malembe ma nga ri mangani lama hundzeke, u ri: “Eka malembe ya 13, ndzi xiye leswaku ndzi fanele ndzi nyiketela vutomi bya mina, ndzi khuvuriwa; a ku na nchumu lowu ndzi nga wu endlaka handle ko tirhela Xikwembu.”

20. (a) I xikombiso xihi lexinene lexi ana se xi kombisiweke hi makume ya magidi ya vantshwa? (b) Goza leri ri fanele ri langutiwa hi ndlela yihi?

²⁰ Makume ya magidi ya vantshwa va khuvuriwile sweswinyana. Va dyondze Rito ra Xikwembu ni ku dyondza hi tindlela ta xona, kutani, hi nkhuvulo wa mati, hi ntsako va joyine vanhu vo tala lava kuleke eku tikombiseni ka le rivaleni ka ku tinyiketela ka vona eka Xikwembu. Va swi tiva leswaku nkhuvulo a hi makumu kambe ko va masungulo ntsena ya ndlela ya vutomi ya ku tinyiketela ka ntiyiso leyi va tiyimiseleke ku yi landzela entirhweni wa Yehova hi laha ku nga heriki.

[Tinhlamuselo ta le hansi]

A Wu Ta Hlamurisa Ku Yini?

◻ Ha yini vutivi bya Rito ra Xikwembu byi ri bya nkoka swonghasi?

◻ Xana u nga swi kuma njhani leswi engetelekeke eminhlanganweni ya Vukriste?

◻ I mikateko yihi yo huma eka Xikwembu leyi fanelaka ku hi susumetela ku xi yingisa?

◻ Xana u nga ya emahlweni ni ntirho wa Xikwembu hi ndlela yihi?

◻ Xana munhu u fanele a khuvuriwa rini?