Vanghana Va Xikwembu Va Papalata Swilo Swo Biha

Sathana u ringa vanhu leswaku va endla swilo swo biha. Munhu la lavaka ku va munghana wa Xikwembu u fanele a venga leswi Yehovha a swi vengaka. (Pisalema 97:​10) Hi leswi swin’wana swa swilo leswi vanghana va Xikwembu va swi papalataka:

Swidyoho swa vuxaka bya rimbewu. “U nga tshuki u endla vuoswi.” (Eksoda 20:​14) Ku va ni vuxaka bya rimbewu emahlweni ko nghenela vukati na swona swi hoxile.​—⁠1 Vakorinto 6:⁠18.

Vudakwa. “Swidakwa [swi] nga ka [swi] nga yi dyi ndzhaka ya mfumo wa Xikwembu.”​—⁠1 Vakorinto 6:⁠10.

Ku Dlaya Hi Vomu, Ku Susa Khwiri. “U nga tshuki u dlaya hi vomu.”​—⁠Eksoda 20:⁠13.

Vukhamba. “U nga tshuki u yiva.”​—⁠Eksoda 20:⁠15.

Ku Hemba. Yehovha u venga “ririmi ra vunwa.”​—⁠Swivuriso 6:⁠17.

Madzolonga Ni Ku Hlundzuka Loku Nga Lawuriwiki. “[Yehovha u] venga un’wana ni un’wana la rhandzaka madzolonga.” (Pisalema 11:⁠5) “Mintirho ya nyama [yi katsa] swifafa.”​—⁠Vagalatiya 5:​19, 20.

Ku Gembula. “Mi tshika ku tihlanganisa na mani na mani loyi a [nga] munhu wa makwanga.”​—⁠1 Vakorinto 5:⁠11.

Ku Venga Vanhu Va Rixaka Ro Karhi Ni Va Tiko Ro Karhi. “Hambetani mi rhandza valala va n’wina, mi khongelela lava mi xanisaka.”​—⁠Matewu 5:​43, 44.

Swilo leswi Xikwembu xi hi byelaka swona swi vuyerisa hina. A hi minkarhi hinkwayo swi olovaka ku papalata ku endla swilo swo biha. Hi mpfuno wa Yehovha swin’we ni hi mpfuno wa Timbhoni ta yena, u nga papalata ku endla swilo leswi hlundzukisaka Xikwembu.​—⁠Esaya 48:​17; Vafilipiya 4:​13; Vaheveru 10:⁠24, 25.