Dyondzo 10

Swiendlo Leswi Xikwembu Xi Swi Vengaka

Xana u fanele ku titwa njhani hi swilo leswi Xikwembu xi vulaka leswaku swi bihile? (1)

Xana i mahanyelo ya muxaka muni lama hoxeke hi tlhelo ra rimbewu? (2)

Xana Mukreste u fanele ku ku languta njhani ku hemba? (3) ku gembula? (3) ku yiva? (3) madzolonga? (4) vungoma? (5) vudakwa? (6)

Xana munhu a nga yi tshika njhani mikhuva ni swiendlo swo tano? (7)

1. Malandza ya Xikwembu ma rhandza swilo leswinene. Kambe ma fanele ku tlhela ma dyondza ku venga leswo biha. (Pisalema 97:10) Sweswo swi vula ku papalata swiendlo swo karhi leswi vengiwaka hi Xikwembu. Xana hi swihi swiendlo swoleswo?

2. Vuoswi: Rimbewu ra le mahlweni ka vukati, vuoswi, vuxaka bya rimbewu ni xiharhi, vuxaka bya rimbewu bya maxaka ya le kusuhi ni vusodoma hinkwaswo i swidyoho leswikulu emahlweni ka Xikwembu. (Levhitika 18:6; Varhoma 1:26, 27; 1 Vakorinto 6:9, 10) Loko mpatswa wu tshama swin’we kambe wu nga tekananga, wu fanele wu hambana kumbe wu tekana hi nawu.—Vaheveru 13:4.

3. Ku Hemba, Ku Gembula, Ku Yiva: Yehovha Xikwembu a nga hembi. (Tito 1:2) Vanhu lava lavaka ku amukeriwa hi yena va fanele ku tshika ku hemba. (Swivuriso 6:16-19; Vakolosa 3:9, 10) Ku gembula ka muxaka wihi na wihi ku fambisana ni makwanga. Hikwalaho Vakreste a va hlanganyeli eka muxaka wihi na wihi wa ku gembula, wo tanihi mubejo wa mathikithi, mujaho wa tihanci ni bingo. (Vaefesa 5:3-5) Naswona Vakreste a va yivi. A va swi xavi swilo leswi va swi tivaka leswaku swi lo yiviwa kumbe ku teka swilo handle ka mpfumelelo.—Eksoda 20:15; Vaefesa 4:28.

4. Ximbilwambilwana, Madzolonga: Ku hlundzuka loku nga lawulekiki ku nga yisa eka swiendlo swa madzolonga. (Genesa 4:5-8) Munhu wa madzolonga a nga ka a nga vi munghana wa Xikwembu. (Pisalema 11:5; Swivuriso 22:24, 25) Swi hoxile ku tlherisela kumbe ku rihisela hi swo biha eka leswi van’wana va nga ha vaka va hi endle swona.—Swivuriso 24:29; Varhoma 12:17-21.

5. Vuloyi Ni Vungoma: Vanhu van’wana va kombela matimba ya mimoya leswaku va tshungula vuvabyi. Van’wana va lowa valala va vona leswaku va vabya kumbe hambi ku ri ku va dlaya. Matimba ya swilo leswi hinkwaswo ya huma eka Sathana. Hikwalaho Vakreste va fanele ku tihambanisa na swona. (Deteronoma 18:9-13) Ku tshama hi ri kusuhi na Yehovha i nsirhelelo lowunene eka ku loyiwa hi vanhu.—Swivuriso 18:10.

6. Vudakwa: A swi bihanga ku nwa vhinyo, byalwa kumbe swakunwa swin’wana swa xihoko hi mpimo wutsongo. (Pisalema 104:15; 1 Timotiya 5:23) Kambe ku nwa ngopfu ni vudakwa swi hoxile emahlweni ya Xikwembu. (1 Vakorinto 5:11-13; 1 Timotiya 3:8) Ku nwa ku tlula mpimo swi nga onha rihanyo ra wena ni ku hahlula ndyangu wa wena. Swi nga tlhela swi ku vangela ku tipeta emiringweni yin’wana hi ku hatlisa.—Swivuriso 23:20, 21, 29-35.

7. Vanhu lava endlaka swilo leswi Xikwembu xi nge swi bihile a va nge “vi na ku averiwa eku fumeni ka Xikwembu.” (Vagalatiya 5:19-21) Loko u rhandza Xikwembu hi mbilu hinkwayo naswona u lava ku xi tsakisa, u nga papalata swiendlo leswi. (1 Yohane 5:3) Dyondza ku venga leswi Xikwembu xi vulaka leswaku swi bihile. (Varhoma 12:9) Tihlanganise ni vanhu lava nga ni mikhuva leyinene. (Swivuriso 13:20) Ku va ni xinghana ni Vakreste lava vupfeke swi nga ku pfuna swinene. (Yakobo 5:14) Ku tlula kwalaho, titshege hi mpfuno wa Xikwembu hi ku khongela.—Vafilipiya 4:6, 7, 13.

[Swifaniso leswi nga eka tluka 20, 21]

Xikwembu xi venga vudakwa, ku yiva, ku gembula ni madzolonga