I Vamani Xana?

TIMBHONI TA YEHOVHA ti tsakela leswaku u ti tiva ku antswa. U nga ha va u ti tiva tanihi vaakelani va wena, vatirhi-kuloni kumbe u ti tiva hi tindlela tin’wana. U nga ha va u ti vone exitarateni ti fambisa timagazini ta tona eka lava hundzaka hi ndlela. Kumbe, u nga ha va u vulavulenyana na tona ekaya ka wena.

Entiyisweni, Timbhoni ta Yehovha ta khathala ha wena ni vuhlayiseki bya wena. Ti lava ku va vanghana va wena ni ku ku byela swo tala ha tona, leswi ti swi pfumelaka, nhlengeletano ya tona ni leswi ti titwisaka xiswona hi vanhu ni misava leyi hinkwerhu hi hanyaka eka yona. Leswaku ti kota ku endla sweswo, ti ku lunghiselele broxara leyi.

Eka swo tala, Timbhoni ta Yehovha ti tifanela ni vanhu van’wana. Ti ni swiphiqo swa tona leswi tolovelekeke—swa timali, swa miri ni swa mintlhaveko. Ta swi endla swihoxo minkarhi yin’wana, hikuva a ti hetisekanga, kumbe ku huhuteriwa, kumbe ku pfumala xihoxo. Kambe ti ringeta ku dyondza eka leswi ti swi tokoteke ivi ti hisekela ku dyondza Bibele, leswaku ti endla mindzulamiso leyi lavekaka. Ti tinyiketele eka Xikwembu leswaku ti endla ku rhandza ka xona, naswona ta tikarhata leswaku ti hanya hi ku ya hi ku tinyiketela loku. Eka hinkwaswo leswi ti swi endlaka, ti lava nkongomiso lowu humaka eRitweni ra Xikwembu ni moya wa xona lowo kwetsima.

I swa nkoka swinene eka tona leswaku leswi ti swi pfumelaka swi va swi sekeriwe eBibeleni, hayi emianakanyweni ya vanhu kumbe emilawini ya vukhongeri ntsena. Ti titwa hilaha muapostola Pawulo a titweke hakona loko a vule marito yakwe ehansi ka ku huhuteriwa a ku: “Xikwembu a xi kumeke xi ri ni ntiyiso, hambiloko munhu un’wana ni un’wana a kumeka a ri muhembi.” (Varhoma 3:4, Vuhundzuluxeri Bya Misava Leyintshwaa) Loko swi ta eka tidyondzo leti tekiwaka ti ri ntiyiso wa Bibele, Timbhoni ti namarhela swinene ndlela leyi landzeriweke hi va le Beriya loko va twe muapostola Pawulo a chumayela: “Va amukele rito hi mapfundza lamakulu ya mianakanyo, va kambisisa Matsalwa hi vukheta siku ni siku ku vona loko swilo leswi swi ri tano.” (Mintirho 17:11) Timbhoni ta Yehovha ti pfumela leswaku tidyondzo hinkwato ta vukhongeri ti fanele ku kamberiwa hi ndlela leyi fanaka, ku vona loko ti pfumelelana ni Matsalwa lama huhuteriweke, hambi loko ti dyondzisiwa hi tona kumbe hi van’wana. Ta ku rhamba—ta ku khutaza—leswaku u endla tano loko u kanerisana na tona.

Eka leswi swa vonaka leswaku Timbhoni ta Yehovha ti pfumela leswaku Bibele i Rito ra Xikwembu. Ti teka tibuku ta yona ta 66 ti ri leti huhuteriweke ni leti baka nhloko ya mhaka malunghana ni matimu. Matsalwa lawa hi ntolovelo ma vitaniwaka Testamente Leyintshwa, tona ti ma vula Matsalwa ya Vukreste ya Xigriki, naswona Testamente ya Khale ti yi vula Matsalwa ya Xiheveru. Ti tirhisa Matsalwa ya Xigriki kun’we ni ya Xiheveru, ni ku ma teka ma vula leswi ma hlamuselaka swona, handle ka loko swi ri erivaleni leswaku i swigego kumbe swifanekiselo. Ti pfumela leswaku vunyingi bya vuprofeta bya Bibele se byi hetisekile, byin’wana bya karhi bya hetiseka, kasi byin’wana bya ha yimele ku hetiseka.

VITO RA TONA

I Timbhoni ta Yehovha xana? Ina, yoleyo i ndlela leyi ti tivitanaka ha yona. I vito leri hlamuselaka swo karhi, leri kombaka leswaku ti veka vumbhoni mayelana na Yehovha, Vukwembu byakwe ni swikongomelo swa yena. “Xikwembu,” “Hosi” ni “Muvumbi”—ku fana ni “Muungameri,” “Mufumi” na “Ndhuna”—i swibumabumelo naswona swi nga ha tirhisiwa eka vanhu vo tala lava hambaneke. Kambe “Yehovha” i vito ra xiviri naswona ri vula Xikwembu xa Matimba Hinkwawo ni Muvumbi wa vuako hinkwabyo. Leswi swi kombisiwe eka Pisalema 83:18, hi ku ya hi vuhundzuluxeri bya Bibele bya King James: “Leswaku vanhu va ta swi tiva leswaku wena, loyi vito ra wena u ri wexe ku nga YEHOVHA, u tlakukile ehenhla ka misava hinkwayo.”

Vito leri nge Yehovha (kumbe “Yahweh,” hilaha Jerusalem Bible ya Rhoma Khatoliki ni vadyondzi van’wana va tsakelaka ku ri vula hakona) ri humelela kwalomu ka 7 000 eka Matsalwa yo sungula ya Xiheveru. Tibibele to tala a ti ri kombisi ri ri tano, kambe ti tirhisa “Xikwembu” kumbe “Hosi” ematshan’weni ya rona. Kambe, hambi ku ri eka Tibibele leti, hakanyingi munhu wa swi kota ku komba lomu tsalwa ro sungula ra Xiheveru a ri tirhisa Yehovha kona, hikuva eswivandleni sweswo marito lama nghenisiweke ma tsariwe hi tinhlanga letikulu, yo tanihi: XIKWEMBU, HOSI. Vuhundzuluxeri byo tala bya manguva lawa byi tirhisa vito leri nge Yehovha kumbe Yahweh. Hikokwalaho, Vuhundzuluxeri Bya Misava Leyintshwa eka Esaya 42:8 byi ri: “Hi mina Yehovha. Rero i vito ra mina.”

Mhaka ya Matsalwa leyi Timbhoni ta Yehovha ti tekaka vito ra tona eka yona yi le ka ndzima ya vu-43 ya Esaya. Kwalaho xivono xa misava xi fanisiwa ni xiendlakalo xa le hubyeni: Swikwembu swa matiko swi byeriwa ku humesa timbhoni ta swona ku tiyisa timhaka ta swona ta ku tivula leswi lulameke, kumbe swi twa timbhoni ta Yehovha kutani swi amukela ntiyiso. Kwalaho Yehovha u byela vanhu vakwe a ku: “Mi timbhoni ta mina, ku vula Yehovha, n’wina ni nandza wa mina loyi ndzi n’wi hlawuleke, hi leswaku mi ta swi tiva, mi ndzi pfumela, mi va mi swi twisisa leswaku hi mina: Emahlweni ka mina a ku nga ri na Xikwembu lexi endliweke naswona endzhaku ka mina ku nga ka ku nga vi na xin’wana. Mina, ndzi Yehovha kutani a ku na muponisi handle ka mina.”—Esaya 43:10, 11, American Standard Version.

Yehovha Xikwembu u ve na timbhoni emisaveni hi magidi ya malembe emahlweni ka ku velekiwa ka Yesu. Endzhaku ka loko Vaheveru ndzima 11 yi xaxamete van’wana va vavanuna volavo va ripfumelo, Vaheveru 12:1 yi ri: “Hikwalaho, leswi hi nga ni papa lerikulu swinene ra timbhoni leri hi rhendzeleke, na hina a hi hluvuleni ntiko wun’wana ni wun’wana ni xidyoho lexi hi phasaka hi ku olova, a hi tsutsumeni hi ku tiyisela eka mphikizano lowu vekiweke emahlweni ka hina.” Emahlweni ka Pontiyo Pilato Yesu u te: “Leswi ndzi velekeriweke swona, ni leswi ndzi teleke swona emisaveni i ku ta nyikela vumbhoni malunghana ni ntiyiso.” U vitaniwa “mbhoni yo tshembeka ni ya ntiyiso.” (Yohane 18:37; Nhlavutelo 3:14) Yesu u byele vadyondzisiwa vakwe a ku: “Mi ta amukela matimba loko moya lowo kwetsima wu fika ehenhla ka n’wina, naswona mi ta va timbhoni ta mina eYerusalema swin’we ni le tikweni hinkwaro ra Yudiya ni le Samariya ni ku ya fika endhawini ya le kule swinene ya misava.”—Mintirho 1:8.

Hi yona mhaka leyi vanhu va kwalomu ka 6 000 000 namuntlha, lava vulaka mahungu lamanene ya Mfumo wa Yehovha ha Kreste Yesu eka matiko lama tlulaka 230, va vonaka swi fanerile loko va tivitana Timbhoni ta Yehovha.

[Nhlamuselo ya le hansi]

[Marito lama tshahiweke exihlokweni lama nga eka tluka 4]

Ti tinyiketele ku endla ku rhandza ka Xikwembu

[Marito lama tshahiweke exihlokweni lama nga eka tluka 4]

Ti pfumela leswaku Bibele i Rito ra Xikwembu

[Marito lama tshahiweke exihlokweni lama nga eka tluka 5]

Vito hilaha ri yelanaka hakona ni xiendlakalo xa le hubyeni

[Marito lama tshahiweke exihlokweni lama nga eka tluka 5]

Timbhoni ta kwalomu ka 6 000 000 ematikweni lama tlulaka 230

[Xifaniso lexi nga eka tluka 3]

Ta khathala hi wena

[Xifaniso lexi nga eka tluka 4]

Vito ra Xikwembu ra xiviri hi Xiheveru xa khale