Ti Pfumela Yini Xana?

TIMBHONI TA YEHOVHA ti pfumela eka Xikwembu xa Matimba Hinkwawo, Yehovha, Muvumbi wa matilo ni misava. Hilaha ku twisisekaka, vukona bya swihlamariso leswi rharhanganeke swa vuako lebyi hi rhendzeleke, byi komba leswaku Muvumbi wa vutlhari lebyi tlakukeke ni wa matimba hi yena a swi endleke hinkwaswo. Tanihi leswi mintirho ya vavanuna ni vavasati yi kombaka timfanelo leti va nga na tona, swi tano ni hi mintirho ya Yehovha Xikwembu. Bibele yi hi byela leswaku “timfanelo ta [yena] leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke.” Nakambe, handle ka mpfumawulo kumbe marito, “matilo ma twarisa ku vangama ka Xikwembu.”—Varhoma 1:20; Pisalema 19:1-4.

Vanhu a va vumbi timbita, kumbe ku endla tithelevhixini na tikhompyuta va ri hava xikongomelo. Misava ni swivumbiwa swa yona swa swimilana ni swihari swi hlamarisa ngopfu. Xivumbeko xa miri wa munhu lowu nga ni tibiliyoni ta tisele a hi koti ku xi twisisa—hambi byi ri byongo lebyi hi ehleketaka ha byona byi hlamarisa swinene! Loko vanhu va ri na xikongomelo eku endleni ka swilo swo karhi leswi vonakaka swi nga ri swa nkoka loko hi pimanisa, kunene Yehovha Xikwembu a a ri na xikongomelo hi swilo swakwe swo hlamarisa leswi a swi tumbuluxeke! Swivuriso 16:4 yi vula leswaku u na xikongomelo: “Yehovha u endle hinkwaswo, a swi endlela xikongomelo xakwe.”

Yehovha u endle misava hi xikongomelo, hilaha a vuleke hakona eka vatekani vo sungula va vanhu a ku: “Tswalanani, mi andza, mi tata misava . . . mi fuma tinhlampfi ta lwandle ni swivumbiwa leswi hahaka swa matilo ni swivumbiwa hinkwaswo leswi famba-fambaka ehenhla ka misava.” (Genesa 1:28) Leswi va nga yingisangiki, vatekani lava va hlulekile ku tata misava hi mindyangu leyo lulama leyi hi rirhandzu a yi ta hlayisa misava ni swimilana ni swihari swa yona. Kambe ku hluleka ka vona a ku endli leswaku xikongomelo xa Yehovha xi hluleka. Magidi ya malembe endzhakunyana ku tsariwe leswi: ‘Xikwembu, Muvumbi wa misava, a xi yi tumbuluxelanga swa hava.’ Xi “yi endlile leswaku ku akiwa eka yona.” A yi nge lovisiwi, kambe “misava yi tshama hilaha ku nga heriki.” (Esaya 45:18; Eklesiasta 1:4, The New English Bible) Kungu ra Yehovha hi misava ri ta hetiseka: “Xikongomelo xa mina xi ta tiya, naswona hinkwaswo leswi ndzi swi tsakelaka ndzi ta swi endla.”—Esaya 46:10.

Hikokwalaho, Timbhoni ta Yehovha ti pfumela leswaku misava yi ta tshama hilaha ku nga heriki, ni leswaku vanhu hinkwavo, lava hanyaka ni lava feke, lava nga ta fambisana ni xikongomelo xa Yehovha hi misava leyi sasekisiweke, leyi akiweke, va ta hanya eka yona hi masiku. Vanhu hinkwavo va tswariwe hi Adamu na Evha va nga hetisekanga, hikwalaho, i vadyohi. (Varhoma 5:12) Bibele ya hi byela: “Hakelo leyi tisiwaka hi xidyoho i rifu.” “Lava hanyaka va swi tiva leswaku va ta fa; kambe loko ku ri lava feke, a va tivi nchumu nikatsongo.” “Moya lowu dyohaka—wona wu ta fa.” (Varhoma 6:23; Eklesiasta 9:5; Ezekiyele 18:4, 20) Kutani va nga swi kotisa ku yini ku hanya nakambe leswaku na vona va kuma mikateko ya la misaveni? Hikwalaho ka gandzelo ra nkutsulo ra Kreste Yesu ntsena, hikuva u te: “Hi mina ku pfuka ni vutomi. Loyi a kombisaka ripfumelo eka mina, hambiloko a fa, u ta hanya.” “Nkarhi wa ta lowu hinkwavo lava nga eka masirha-bako ya xitsundzuxo va nga ta twa rito ra yena kutani va huma.”—Yohane 5:28, 29; 11:25; Matewu 20:28.

Leswi swi ta endlekisa ku yini? Swi hlamuseriwe eka “mahungu lamanene ya mfumo,” lawa Yesu a sunguleke ku ma twarisa loko a ri emisaveni. (Matewu 4:17-23) Kambe namuntlha Timbhoni ta Yehovha ti chumayela “mahungu lamanene” hi ndlela yo hlawuleka swinene.

[Chati leyi nga eka tluka 13]

LESWI TIMBHONI TA YEHOVHA TI SWI PFUMELAKA

Dyondzo Xivangelo Xa Matsalwa

[Xifaniso lexi nga eka tluka 12]

MISAVA . . . yi vumbiwe hi Yehovha . . . yi hlayisiwa hi munhu . . . yi akiwa hi masiku