Ku Languteka Lokunene

KU LANGUTEKA ka wena ku vula swo tala ha wena. Hambileswi Yehovha a vonaka leswi mbilu yi nga xiswona, vanhu hi ntolovelo va vona “leswi vonakaka ematihlweni.” (1 Sam. 16:7) Loko u basile naswona u tilunghise kahle, van’wana va ta ku teka u ri munhu la xiximekaka, naswona va nga ha ku yingisa. Nakambe, loko u ambala kahle, u ta va u yi yimela kahle nhlengeletano leyi u nga eka yona, naswona leswi swi ta khumba ndlela leyi vayingiseri va wena va xi langutaka ha yona Xikwembu lexi u xi gandzelaka.

Minkongomiso Ya Ku Yi Landzela. Bibele a yi veki milawu yo tala malunghana ni ndlela leyi munhu a faneleke a languteka ha yona. Kambe yi hi nyika misinya ya milawu leyi nga hi pfunaka ku endla swiboho leswinene. Lexi nga xa nkoka eka hinkwaswo i ku ‘endla hinkwaswo leswaku hi vangamisa Xikwembu.’ (1 Kor. 10:31) Hi yihi misinya ya milawu leyi nga hi pfunaka eka ndlela leyi hi faneleke hi languteka ha yona?

Xo sungula, Bibele yi hi khutaza leswaku hi basa, emirini ni le ka leswi hi swi ambalaka. Eka Nawu lowu a wu nyikeke Israyele wa khale, Yehovha u andlale swilaveko malunghana ni ku basa. Hi xikombiso, loko vaprista va ri entirhweni wa vona, a va fanele va hlamba ni ku hlantswa swiambalo swa vona hi minkarhi yo karhi leyi vekiweke. (Lev. 16:4, 24, 26, 28) Vakreste a va kona ehansi ka Nawu wa Muxe, kambe misinya ya milawu leyi nga eka Nawu lowu, ya ha tirha ni le ka vona. (Yoh. 13:10; Nhlav. 19:8) Ngopfu-ngopfu loko hi ya endhawini ya vugandzeri kumbe hi ya ensin’wini, swa boha leswaku miri, moya lowu humaka enon’wini wa hina swin’we ni swiambalo swa hina swi va leswi baseke leswaku vanhu va nga hi nyenyi. Lava va nyikelaka tinkulumo kumbe va nga ni minkombiso emahlweni ka vandlha va fanele va veka xikombiso lexinene emhakeni leyi. Ku nyikela nyingiso eka ndlela leyi hi langutekaka ha yona swi kombisa leswaku ha n’wi xixima Yehovha ni nhlengeletano yakwe.

Xa vumbirhi, Bibele yi hi khutaza leswaku hi va ni xichavo naswona hi hluteka emianakanyweni. Muapostola Pawulo u khutaze vavasati lava nga Vakreste leswaku “va tisasekisa . . . hi xichavo ni mianakanyo yo hluteka, ku nga ri hi tindlela to horha misisi ni nsuku kumbe tiperela kumbe swiambalo leswi durhaka ngopfu, kambe hi ndlela leyi fanelaka vavasati lava vulaka leswaku va chava Xikwembu.” (1 Tim. 2:9, 10) Xichavo ni ku hluteka emianakanyweni i swa nkoka ni le ka ndlela leyi vavanuna va ambalaka ni ku tilunghisa ha yona.

Munhu loyi a nga ni xichavo u papalata ku khunguvanyisa van’wana naswona a nga endli swilo hi ku lava ku voniwa. Ku hluteka emianakanyweni ku endla leswaku munhu a va ni vuxiyaxiya kumbe a endla swiboho leswinene. Munhu loyi a kombisaka timfanelo leti wa ringanisela, naswona leswi swi n’wi endla a xixima misinya ya milawu ya Xikwembu. A swi vuli swona leswaku munhu la kombisaka timfanelo leti a nga fanelanga a ambala a saseka, kambe swi hi pfuna leswaku hi ringanisela eka ndlela leyi hi langutekaka ha yona, hi papalata ku tisasekisa ku tlula mpimo kumbe switayela swa swiambalo ni ku tilunghisa loku hundzeletiweke. (1 Yoh. 2:16 ) Hi fanele hi yi tirhisa misinya leyi ya milawu, hambi hi le ndhawini ya vugandzeri, hi le nsin’wini kumbe hi endla mintirho yin’wana. Hambi ku ri swiambalo swa hina swa siku ni siku swi fanele swi xiximeka, swi kombisa leswaku hi hlutekile emianakanyweni. Exikolweni kumbe entirhweni wa hina wa ku tihanyisa, hi ta pfulekeriwa hi nkarhi wo nyikela vumbhoni bya xitshuketa. Hambiloko hi ta va hi nga ambalanga ku fana ni loko hi ya eminhlanganweni, emintsombanweni ni le tinhlengeletanweni, swiambalo swa hina swi fanele swi languteka, swi va leswi baseke naswona swi xiximeka.

Ina, hina vanhu a hi ambali hi ndlela leyi fanaka. Naswona a hi languteriwanga ku ambala hi ndlela leyi fanaka. Vanhu va hambana emhakeni yo hlawula swiambalo, naswona sweswo a swi hoxanga. Kambe minkarhi hinkwayo ku fanele ku tirhisiwa minkongomiso ya Bibele.

Muapostola Petro u kombise leswaku swiambalo swa “munhu la nge xihundleni wa mbilu” hi swona swi nga swa nkoka ku tlula ku tilunghisa misisi ni swiambalo swa le handle. (1 Pet. 3:3, 4) Loko timbilu ta hina ti taleriwe hi rirhandzu, ntsako, ku rhula, musa ni ripfumelo leri tiyeke, leswi swi ta va swiambalo swa hina swa moya leswi yisaka ku dzuneka eka Xikwembu hakunene.

Xa vunharhu, Bibele yi hi khutaza leswaku hi xiya ndlela leyi hi langutekaka ha yona. Eka 1 Timotiya 2:9 ku vulavuriwa hi “swiambalo leswi langutekaka.” Hambileswi muapostola Pawulo a a vulavula hi swiambalo swa va xisati, nsinya lowu fanaka wa nawu wa tirha ni le ka va xinuna. Nchumu lowu langutekaka kahle wu basile naswona wu hlelekile. Hambi hi fuwile kumbe hi swisiwana hi nga swi kota ku languteka kahle.

Nchumu wo sungula lowu khumbaka ku languteka ka hina, lowu voniwaka hi van’wana, i misisi ya hina. Yi fanele yi languteka kumbe yi lunghisiwa kahle. Ndhawu ni ku tekelela vatswari hi swona swi lawulaka ndlela leyi vanhu va yi lunghisaka ha yona misisi ya vona. Eka 1 Vakorinto 11:14, 15, hi kuma ndzayo ya muapostola Pawulo malunghana ni ku tilunghisa misisi, leyi handle ko kanakana a yi pfumelelana ni ndhawu ni ku tekelela vatswari. Kambe, loko munhu a lunghise misisi hi ndlela leyi kombisaka leswaku u ringeta ku va wa rimbewu leri nga riki ra yena, leswi swi lwisana ni misinya ya milawu ya Bibele.—Det. 22:5.

Eka va xinuna, leswaku munhu a languteka kahle swi nga ha katsa leswaku a byevula malebvu. Eka tindhawu leti malebvu ya le henhla ka nomu ma amukelekaka, munhu wihi na wihi loyi a ma tshikaka u fanele a ma tsemeta kahle, ma languteka.

Xa vumune, ku languteka ka hina a ku fanelanga ku kombisa leswaku hi rhandza misava ni tindlela ta yona. Muapostola Yohane u tsundzuxile: “Mi nga rhandzi misava kumbe swilo leswi nga emisaveni.” (1 Yoh. 2:15-17) Ku navela ko biha ku tele emisaveni leyi. Exikarhi ka ku navela loku, Yohane u vulavula hi ku navela ka nyama leyi nga ni xidyoho ni ku tibombisa hi leswi munhu a nga na swona. Matsalwa ma tlhela ma vulavula hi moya wa ku xandzuka kumbe ku honisa vulawuri. (Swiv. 17:11; Efe. 2:2) Hakanyingi ku navela loku ku tikombisa hi ndlela leyi vanhu va ambalaka ni ku tilunghisa ha yona. Xisweswo, va nga ha ambala ni ku tilunghisa hi ndlela leyi nga langutekiki, leyi pfuxaka nyanyuko wa rimbewu, leyi nyenyetsaka, leyi nyakapfaleke, leyi kombisaka ku nga khathali kumbe leyi nga xiximekiki. Tanihi malandza ya Yehovha, ha swi papalata switayela leswi kombisaka tindlela teto leti nga riki ta Vukreste.

Ematshan’weni yo tekelela misava, swa antswa ku tekelela ndlela leyi vavanuna ni vavasati lava wupfeke emoyeni va ambalaka ni ku tilunghisa ha yona, lava nga evandlheni ra Vukreste! Majaha lawa ma navelaka ku va swivulavuri swa le rivaleni enkarhini lowu taka ma fanele ma languta ndlela leyi lava va fanelekaka ku nyikela tinkulumo ta le rivaleni va ambalaka ni ku tilunghisa ha yona. Hinkwerhu hi nga dyondza eka xikombiso lexinene xa vanhu lava va heteke nkarhi wo leha va ri karhi va chumayela.—1 Tim. 4:12; 1 Pet. 5:2, 3.

Xa vuntlhanu, loko hi ri karhi hi endla xiboho malunghana ni leswi swi langutekaka, hi fanele hi tsundzuka leswaku “hambi a ri Kreste a nga titsakisanga.” (Rhom. 15:3) Yesu a a rhangisa ku rhandza ka Xikwembu evuton’wini bya yena. Nakambe Yesu a a vona swi antswa ku pfuna van’wana ku sungula ku ri ni ku rhangisa swilaveko swa yena. Loko vanhu lava hi va chumayelaka sweswi vo hi languta hi ndlela yo biha hikwalaho ka switayela swo karhi swa ku ambala ni ku tilunghisa, hi fanele hi endla yini? Loko ho tekelela moya wa ku titsongahata lowu kombisiweke hi Kreste, hi ta swi kota ku endla xiboho xa vutlharhi. Muapostola Pawulo u hi vekele nsinya lowu wa nawu: “A hi nyiki xivangelo ni xin’we xa ku khunguvanyeka hi ndlela hambi yi ri yihi.” (2 Kor. 6:3) Xisweswo, hi nga ha tshika switayela swa ku lunghisa misisi kumbe swiambalo swo karhi leswi swi nga ha endlaka leswaku hi nga yingisiwi hi vanhu lava hi va chumayelaka.

Mayimelo. Ku languteka lokunene ku katsa ni mayimelo ya hina. Ina, hina vanhu ha hambana hi mayimelo, naswona a hi lweli ku tekelela yimelo ro karhi. Hambiswiritano, hi ku ya hi Bibele, i mhaka leyi tivekaka leswaku loko munhu a yima a ololoka, wa xiximeka naswona swi kombisa leswaku wa tiyiseka. (Lev. 26:13; Luka 21:28) Kambe, hikwalaho ka ku heta malembe yo tala munhu a tirha a korhamile kumbe hikwalaho ka vudyuhari kumbe vuvabyi, makwerhu wa xinuna kumbe wa xisati a nga ha tsandzeka ku yima a ololoka kumbe a nga boheka ku tiseketela hi xo karhi leswaku a kota ku yima. Kambe eka lava va swi kotaka, i swinene leswaku va yima va ololoka loko va vulavula ni van’wana leswaku va nga tikombi va ri ni moya wa ku delela. Hilaha ku fanaka, hambileswi swi nga hoxangiki leswaku munhu a pfa a veka mavoko yakwe etafuleni ra xivulavuri, munhu u languteka kahle eka vayingiseri loko a nga tiseketeli hi tafula ra xivulavuri.

Switirhisiwa Leswi Langutekaka. A hi fanelanga hi basa ni ku languteka ntsena kambe ni leswi hi swi tirhisaka ensin’wini swi fanele swi tshama swi basile naswona swi languteka.

Xiya Bibele ya wena. A hi hinkwerhu swi hi olovelaka ku kuma Bibele leyintshwa loko ya hina se yi hlakarile. Hambiswiritano, ku nga khathariseki leswaku se hi ni nkarhi wo tanihi kwihi hi tirhisa Bibele ya hina, yi fanele yi vonaka leswaku yi khomiwe kahle.

Ina, ku ni tindlela to tala to paka nkwama wa nsimu, kambe wu fanele wu pakiwa kahle. Xana u tshama u vona maphepha ma wa eBibeleni loko muhuweleri a lava ku hlayela n’wini wa muti tsalwa kumbe loko makwerhu a nyikela nkulumo evandlheni? Swi ku kavanyetile, a swi tano ke? Loko maphepha lama vekiweke endzeni ka Bibele ma kavanyeta, ku ma hlayisa ka wena endhawini yin’wana swi ta endla leswaku Bibele ya wena yi languteka. Nakambe, tsundzuka leswaku vanhu van’wana va swi teka ku nga ri ku kombisa xichavo ku veka Bibele kumbe tibuku ta vukhongeri ehansi.

Hi fanele hi teka mhaka ya ku languteka yi ri ya nkoka. Yi khumba ni ndlela leyi van’wana va hi tekaka ha yona. Ku tlula kwalaho, hi lwela ku languteka kahle hikuva hi navela ku “sasekisa dyondzo ya Muponisi wa hina, Xikwembu, eka swilo hinkwaswo.”—Tito 2:10.