Ku Ambala Kahle Swi Kombisa Ku Chava Xikwembu
1. Xana hi nga swi kombisa njhani leswaku ha wu tlangela ntsombano lowu taka?
1 Ku nga ri khale hi ta va ni lunghelo ro va vaendzi va Yehovha eNtsombanweni wa Muganga kumbe wa Matiko Hinkwawo wa 2003 lowu nge “Vangamisa Xikwembu.” Mawaku ndlela leyi hi tlangelaka Yehovha ha yona hikwalaho ka leswi a hi rhambeke leswaku hi ta enkhubyeni wo tanihi lowu, lowu fuweke hi swakudya swa moya! Hi nga kombisa ku n’wi xixima ni ku tlangela ka hina malunghiselelo ya yena ya swa moya hi ndlela leyi hi ambalaka ni ku tisasekisa ha yona.—Ps. 116:12, 17.
2. Ha yini swi ri swa nkoka leswaku hi basa ni ku tilunghisa hi ndlela leyi xiximekaka?
2 Ku Basa Ni Ku Hleleka: Ku languteka ka hina ku fanele ku fanela Xikwembu xa hina hikuva xi basile naswona xi hlelekile. (1 Kor. 14:33; 2 Kor. 7:1) Miri wa hina, misisi ni minwala swi fanele swi basa naswona hi fanele hi tilunghisa hi ndlela leyi langutekaka. Ku tisasekisa loku nga xiximekiki ku andzile namuntlha. Hi xikombiso, leswaku mutlangi wa tifilimi la dumeke kumbe xitlangi xa ndhuma xi langutekaka hi ndlela leyi nga xiximekiki, a swi nyiki Mukreste mpfumelelo wo tilunghisa ku fana na yena. Loko hi landzela tifexeni, swi nga va tikela vanhu ku hambanisa exikarhi ka lava tirhelaka Xikwembu xa ntiyiso ni lava nga xi tirheliki.—Mal. 3:18.
3. Xana hi nga endla yini leswaku ku languteka ka hina ku fambisana ni ndzayo leyi kumekaka eka 1 Timotiya 2:9, 10?
3 Swiambalo Leswi Fanelaka Vakreste: Loko muapostola Pawulo a tsalela Timotiya, mulanguteri la nga Mukreste, u khutaze “vavasati [leswaku] va tisasekisa hi swiambalo leswi langutekaka, hi xichavo ni mianakanyo yo hluteka,. . . hi ndlela leyi fanelaka vavasati lava vulaka leswaku va chava Xikwembu, hi mintirho leyinene.” (1 Tim. 2:9, 10) Leswaku swiambalo swa hina swi languteka kahle, hi fanele hi anakanyisisa kahle. Swiambalo swi fanele swi languteka, swi basa ni ku xiximeka—a swi fanelanga swi saseka hi ndlela leyi nyenyetsaka kumbe swi pfuxa nyanyuko wa rimbewu.—1 Pet. 3:3.
4, 5. Hi yihi ndzayo leyi Vakreste va xinuna ni va xisati va faneleke va yi yingisa?
4 Pawulo u tlhele a tsundzuxa malunghana ni ku hundzeleta eka “tindlela to horha misisi ni nsuku kumbe tiperela kumbe swiambalo leswi durhaka ngopfu.” (1 Tim. 2:9) Ku ringanisela eku tirhiseni ka swin’wetsin’wetsi, tsumana ra ku sasekisa xikandza ni swilo swin’wana swo tisasekisa, i ndlela ya vutlhari yo yi landzela eka vavasati lava nga Vakreste.—Swiv. 11:2.
5 Ndzayo leyi Pawulo a yi nyikeke vavasati va Vakreste yi tlhela yi tirha ni le ka vavanuna va Vakreste. Vamakwerhu va fanele va papalata switayele leswi kombisaka moya wa misava. (1 Yoh. 2:16) Hi xikombiso, ku ambala swiambalo leswikulu swinene swi tolovelekile ematikweni man’wana kambe switayele leswi a swi xiximeki eka nandza wa Xikwembu.
6. Ha yini hi fanele hi tshama hi ambale kahle hi tlhela hi tisasekisa kahle loko hi ya ni loko hi vuya entsombanweni, loko hi ri entsombanweni ni le ndzhaku ka xiyimiso xa siku rin’wana ni rin’wana?
6 Endzhaku Ka Xiyimiso Xa Siku: Hi nkarhi wa nongonoko, vamakwerhu vo tala va xinuna ni va xisati va veka xikombiso lexinene emhakeni yo ambala ni ku tisasekisa. Hambiswiritano, swiviko swi kombisa leswaku van’wana a va ambali kahle loko va ha ya kumbe loko va vuya entsombanweni kumbe loko va ri eku wiseni endzhaku ka xiyimiso xa siku. Kambe, ndlela leyi hi langutekaka ha yona—hi nkarhi wa nongonoko kumbe hi minkarhi yin’wana—yi khumba ndlela leyi vanhu van’wana va va tekaka ha yona vanhu va Xikwembu. Tanihi leswi hi ambalaka tibeji ta hina ta ntsombano, minkarhi hinkwayo hi fanele hi ambala hi ndlela leyi fanelaka vatirheli lava nga Vakreste. Hakanyingi leswi swi endla leswaku van’wana va hi bumabumela naswona swi hi pfulela ndlela yo chumayela.—1 Kor. 10:31-33.
7. Xana ku ambala ka hina ni ku tisasekisa ka hina lokunene, ku nga va khumba njhani van’wana?
7 Tanihi leswi ku n’wayitela ku sasekisaka xikandza xa hina, ku ambala ni ku tisasekisa kahle swi endla leswaku rungula leri hi ri byarhaka ni nhlengeletano leyi hi yi yimelaka, swi xiximeka. Van’wana lava nga hi vonaka lembe leri, hi nkarhi wa Ntsombano lowu nge “Vangamisa Xikwembu,” va nga susumeteleka ku hi vutisa leswaku ha yini hi hambanile ni vanhu van’wana naswona va nga ha hetelela va vule leswi: “Hi ta famba na n’wina, hikuva hi swi twile [hi swi vonile] leswaku Xikwembu xi na n’wina.” (Zak. 8:23) Onge hinkwerhu ka hina hi nga kombisa ku chava Yehovha hi ndlela leyi hi ambalaka ni ku tisasekisa ha yona.
[Bokisi leri nga eka tluka 5]
Languteka Hi Ndlela Leyi Xiximekaka
▪ Loko u ri endleleni
▪ Hi nkarhi wa ntsombano
▪ Endzhaku ka xiyimiso xa siku