Ku Ambala Ni Ku Tisasekisa Hi Ndlela Leyi Xiximekaka
1 “Vavanuna hinkwavo ku katsa ni vafana va boha tithayi. Vavasati hinkwavo ni vanhwanyana va malembe ya kondlo-a-ndzi-dyi ni lavatsongo eka vona va ambala tirhoko kumbe swiketi. A wu nge voni ni un’we a ambale bokati kumbe hembe leri humeselaka swifuva ehandle. Hinkwavo va tsakile.” Sweswo swi vuriwe hi xiviko xa mahungu. Hi wihi ntshungu lowu a xi vulavula hi wona? Xana i wa vanhu lava hlanganeleke timhaka ta tipolitiki? Xana i wa vahlaleri va ntlangu wo karhi? Xana i wa khonsati ya vuyimbeleri bya rhok? Nikatsongo! A xi vulavula hi vamakwerhu lava a va ri entsombanweni lowukulu wa muganga.
2 Edorobeni rin’wana laha ntsombano a wu khomeriwe kona, muviki un’wana wa mahungu u hlamusele ntshungu wa Timbhoni hi ndlela leyi: “Vavanuna hinkwavo va basile naswona va ambala tisudu ni tithayi. Vavasati va ambala hi ndlela leyi xiximekaka ni leyi xongeke.” Wa vumbirhi la voneke leswi i murindzi loyi a nga te: “Mi vanhu lava tikhomeke kahle, lava xiximekaka, lava baseke ni lava langutekaka. Ndzi vona vuxongi ntsena. Emisaveni leyi yi thyakeke, mi kota ku tihlantswa mi va lava baseke!” Mawaku ndlela leyinene swonghasi leyi hi bumabumeriweke ha yona! Xana a swi hi tsakisi ku twa vamakwerhu va bumabumeriwa hi ndlela leyi? I ntiyiso leswaku hinkwavo lava a va ri kona entshungwini lowu va hoxe xandla eka swiviko leswi leswinene hi ku languteka ka vona loku veke xikombiso lexinene.
3 Emisaveni hinkwayo hi tiveka hi ku languteka ka hina loku hlawulekeke. (Mal. 3:18) Ha yini? Hikuva hi landzela xitsundzuxo xa Matsalwa xa leswaku hi “tisasekisa hi swiambalo leswi langutekaka, hi xichavo ni mianakanyo yo hluteka, . . . hi ndlela leyi fanelaka . . . lava vulaka leswaku va chava Xikwembu.”—1 Tim. 2:9, 10.
4 I Yini Lexi U Xi Kombisaka Hi Maambalelo Ni Ku Tisasekisa Ka Wena? Swiambalo leswi hi swi ambalaka ni ndlela leyi hi swi ambalaka ha yona swi vula swo karhi hi hina—hi tidyondzo ta hina, langutelo ra hina ni mimboyamelo ya hina. Muxaka wa switayele leswi hi swi hlawulaka wu kombisa leswi hi nga xiswona ni leswi hi swi yimelaka. Hi nga tshuki hi seketela maanakanyelo ni ku tikhoma loku thyakeke loku rhandziwaka hi misava leyi. Lexi hi khumbekaka ngopfu hi xona hi loko xitayele xo karhi xi ri lexi faneleke eka loyi a tivulaka mutirheli wa Xikwembu, ku nga ri ku va efexenini ka xona. (Rhom. 12:2) Hi lava ku kombisa leswaku hakunene hi “dzunisa Xikwembu,” ku ri ni ku hlawula xitayele lexi kombisaka moya wa ku tilawula kumbe wa vudlakuta.—1 Pet. 2:12.
5 Minkarhi yin’wana munhu la ha ku sungulaka ku hlanganyela, la nga riki na ntokoto kumbe la tsaneke emoyeni, a nga ha amukela xin’wana ni xin’wana lexi misava yi navetisaka ha xona loko swi ta eka maambalelo ni ku tisasekisa, a nga rhanganga a anakanyisisa hi ndlela leyi xi khumbaka Yehovha ni nhlengeletano ya yena ha yona. Hinkwerhu hi fanele ku tikambela ku vona loko hi nga lawuriwi hi maanakanyelo ya misava. Hi nga ha ya eka makwerhu wa xinuna kumbe wa xisati la xiximekaka ni la wupfeke emoyeni leswaku a hi byela ntiyiso hi leswi a swi xiyeke malunghana ni muxaka wa swiambalo ni ku tilunghisa ka hina, kutani hi anakanyisisa hi swiringanyeto leswi hi nyikiweke swona.
6 Van’wana va pfumela handle ko tipfinyinga leswaku va fanele ku xiyisisa ndlela leyi va ambalaka ha yona loko va ri entsombanweni. Kambe loko va ri eku tirivatiseni endzhaku ka xiyimiso xa siku va ambala hi ndlela leyi nga xiximekiki. Tshama u languteka hi ndlela leyi fanelaka vatirheli lava nga Vakreste. (2 Kor. 6:3, 4) Kun’wana ni kun’wana loko hi ri exikarhi ka vanhu, tibeji ta hina ta ntsombano ni maambalelo ni ku tisasekisa ka hina lokunene swi kombisa leswaku hi Timbhoni ta Yehovha. Hikwalaho minkarhi hinkwayo hi fanele ku ambala hi ndlela leyinene ni leyi xiximekaka, hi swi veka erivaleni leswaku a hi “xiphemu xa misava.”—Yoh. 15:19.
7 A hi endleni hinkwaswo leswi hi nga swi kotaka eNtsombanweni wa Muganga wa nan’waka wa “Vachumayeri Va Mfumo Lava Hisekaka,” ku kombisa leswaku hi ‘vanhu lava kwetsimaka eka Yehovha Xikwembu xa hina.’ Vuyelo lebyinene lebyi nga ta va kona byi ta engetela ku ‘dzuneka, ndhuma ni ku saseka’ ka Yehovha.—Det. 26:19.
[Bokisi leri nga eka tluka 10]
Ndlela Yo Dzunisa Yehovha:
■ Ambala hi ndlela leyi fanelaka mutirheli wa Xikwembu.
■ Papalata switayele leswi fambisanaka ni moya wa misava.
■ Vana la xiximekaka hikuva sweswo swi ta kombisa leswaku u hlutekile emianakanyweni.