Enerisa Xilaveko Xa Wena Xa Moya
1 Ntsombano wa hina wa Muganga lowu taka wa “Vachumayeri Va Mfumo Lava Hisekaka” wu ta hi nyika nkarhi lowunene wo enerisa xilaveko xa hina xa moya. Ku fana ni swakudya leswi akaka miri, hakunene nongonoko lowu wu ta hi wundla emoyeni “hi marito ya ripfumelo.” (1 Tim. 4:6) Wu ta hi pfuna ku tshinela eka Yehovha. Kutani hi langutele ku kuma ndzayo ni xikhutazo leswi nga ta hi pfuna ku langutana ni miringo evuton’wini bya hina. Yehovha wa hi tiyisekisa: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona. Ndzi ta ku tsundzuxa ndzi veke tihlo ra mina ri ri ehenhla ka wena.” (Ps. 32:8) Ha vuyeriwa swonghasi evuton’wini bya hina hi ku va ni nkongomiso wa yena wa rirhandzu! Hi leti tindlela tin’wana leti pfunaka, leti hi nga ti tirhisaka leswaku hi vuyeriwa ngopfu enongonokweni wa ntsombano.
2 Hi Fanele Ku Lunghiselela Timbilu Ta Hina: Un’wana ni un’wana wa hina u ni vutihlamuleri bya ku hlayisa mbilu ya yena yo fanekisela. (Swiv. 4:23) Leswi swi lava leswaku hi tilaya naswona hi nga tixisi. Ntsombano i nkarhi wo anakanyisisa hi vuxaka bya hina na Yehovha, naswona i nkarhi wo ‘kambisisa nawu lowu hetisekeke lowu fambisanaka ni ntshunxeko.’ Leswaku hi lunghiselela timbilu ta hina leswaku ti ‘amukela ku nghenisiwa ka rito,’ hi fanele hi kombela Yehovha a hi kambisisa leswaku a kumisisa “ndlela leyi nga riki yinene” eka hina, leyi lavaka ku lulamisiwa, kutani a hi kongomisa “endleleni [ya] hilaha ku nga riki na makumu.”—Yak. 1:21, 25; Ps. 139:23, 24.
3 Yingisela U Tlhela U Anakanyisisa: Loko Yesu a bumabumela Mariya hileswi a dzikiseke mianakanyo ya yena emaritweni yakwe, u te: “Mariya, u hlawule xiavelo lexinene, naswona a nge tekeriwi xona.” (Luka 10:39, 42) Loko hi ri ni langutelo leri fanaka, a hi nge pfumeleli swilo leswi nga riki swa nkoka leswaku swi hi kavanyeta. Hi ta ringeta ku tshamiseka hi rhiya ndleve eka nongonoko hinkwawo. Hi ta papalata ku dya mabulo kumbe ku endla vunhabyanhabya swi nga fanelanga naswona hi ta ringeta leswaku hi nga kavanyeti van’wana hi tinqingho ta le nyongeni, swiciyoti, tikhamera to teka swifaniso ni ta tivhidiyo.
4 Loko hi ri karhi hi yingisela tinkulumo, i swinene leswaku hi tsala tinhla to koma leti nga ta hi pfuna ku twisisa ndlela leyi nhloko-mhaka ya nkulumo yi ndlandlamuxiwaka ha yona. Hi fanele hi fananisa leswi hi swi twaka ni leswi ana se hi swi tivaka. Sweswo swi ta hi pfuna ku twisisa ni ku tswonga rungula ra kona. Loko hi pfuxeta tinhla ta hina, hi fanele hi endla tano hi xikongomelo xo tirhisa rungula ra kona. I swinene leswaku un’wana ni un’wana wa hina a tivutisa: ‘Xana leswi swi byi khumba njhani vuxaka bya mina na Yehovha? Hi kwihi laha ndzi faneleke ndzi antswisa kona evuton’wini bya mina? Rungula leri ndzi nga ri tirhisa njhani loko ndzi ri ni van’wana? Ndzi nga ri tirhisa njhani ensin’wini?’ A hi buleni ni van’wana hi tinhla leti ti hi tsakiseke ngopfu. Loko hi endla swilo leswi hi ta kota ku hlayisa marito ya Yehovha ‘etimbilwini ta hina.’—Swiv. 4:20, 21.
5 A Hi Tirhiseni Leswi Hi Swi Dyondzaka: Endzhaku ka loko a ye entsombanweni wa muganga, makwerhu un’wana u te: “Nongonoko wa kona a wu khumba munhu hi ku kongoma, wu n’wi susumetela ku kambisisa leswi nga embilwini ya yena ni le timbilwini ta swirho swa ndyangu wa yena, wu tlhela wu nyika mpfuno lowu lavekaka wa Matsalwa. Wu ndzi pfule mahlo ndzi vona vutihlamuleri lebyikulu lebyi ndzi nga na byona byo pfuna vandlha.” Handle ko kanakana vo tala va hina hi titwe hi ndlela leyi fanaka. Kambe a swi enelanga ku titwa hi khutazekile ni ku phyuphyisiwa loko hi muka. Yesu u te: “Loko mi tiva swilo leswi, ma tsaka loko mi swi endla.” (Yoh. 13:17) Hi fanele hi hisekela ku tirhisa tinhla leti tirhaka eka hina vini. (Filp. 4:9) Leyi hi yona ndlela leyinene yo enerisa xilaveko xa hina xa moya hi ku helela.
[Bokisi leri nga eka tluka 9]
Anakanyisisa Hi Leswi U Swi Twaka:
■ Xana swi byi khumba njhani vuxaka bya mina na Yehovha?
■ Swi yi khumba njhani ndlela leyi ndzi hanyisanaka ni van’wana ha yona?
■ Xana ndzi nga swi tirhisa njhani evuton’wini bya mina ni le nsin’wini?