“Yingisa U Tlhela U Amukela Ndzetelo Lowu Engetelekeke”

¹ Buku ya Swivuriso yi hlamusela vutlhari byi ri lebyi huwelelaka byi ku: “Yingisani, hikuva i swilo swa nkoka leswi ndzi swi vulavulaka, naswona ndzi pfula milomu ya mina hi vululami. Ndzi ni xitsundzuxo ni vutlhari lebyi pfunaka. . . . Ndzi yingiseni; ina, va tsaka lava va hlayisaka tindlela ta mina. Hikuva loyi a ndzi kumaka kunene u ta kuma vutomi, kutani a kuma vunene lebyi humaka eka Yehovha.” (Swiv. 8:6, 14, 32, 35) Marito wolawo ma wu hlamusela kahle ndzetelo lowu hi nga ta wu kuma eNtsombanweni wa Muganga wa “Vadyondzisi Va Rito Ra Xikwembu.”

² Ku kambisisiwe swilaveko swa vamakwerhu emisaveni hinkwayo, kutani nongonoko wa ntsombano wu lunghiseleriwe leswaku wu khathalela swilaveko sweswo. Loko ho tirhisa ndzetelo wa moya ni swiringanyeto leswi pfunaka, leswi nga ta nyikeriwa, swi ta hi pfuna ku tshama hi tsakile, ku hlayisa vuxaka bya hina lebyinene na Yehovha ni ku namarhela gondzo leri yisaka evuton’wini lebyi nga heriki. Kunene, hi ni xivangelo lexinene xa ku ‘yingisa hi tlhela hi amukela swiletelo leswi engetelekeke.’—Swiv. 1:5.

³ Loko Nongonoko Wu Nga Si Sungula: Leswaku hi vuyeriwa hi xitalo eka leswi nga ta nyikeriwa, hi fanele ku va hi tshamisekile naswona mianakanyo ya hina yi va yi lunghekele ku yingisa, nongonoko wu nga si sungula. Leswi swi lava leswaku munhu a hleleka. Nchumu wa nkoka i ku sungula ku tilunghiselela ka ha ri ni nkarhi. Hatla u etlela. Pfuka ka ha ri ni nkarhi leswaku lava u tshamaka na vona va kuma nkarhi lowu ringaneke wa ku tilunghisa ni ku fihlula. Fika ka ha ri ni nkarhi endhawini ya ntsombano leswaku u ta kuma ndhawu ya ku tshama ni ku endla leswi lavaka ku endliwa emahlweni ko va nongonoko wu sungula. Tinyangwa ti ta pfuriwa hi 7:00 a.m., naswona xiyimiso xi ta sungula hi 9:00 a.m., siku rin’wana ni rin’wana.

⁴ Tanihi leswi xikongomelo-nkulu xa ku hlangana ka hina ku nga ku dzunisa Yehovha “emintshungwini leyi hlengeletaneke,” xiyimiso xin’wana ni xin’wana xi fanele ku sungula hi ndlela leyi dzunisaka Xikwembu xa hina. (Ps. 26:12) Hikwalaho ka sweswo, vanhu hinkwavo va khutaziwa ku va va tshame hansi, risimu ro pfula ri nga si sungula. Sweswo swi pfumelelana ni xikhongotelo xa matsalwa lexi nge: “Swilo hinkwaswo a swi endliwe hi ku tenga ni hi ku hleleka.” (1 Kor. 14:40) Xana sweswo swi vula yini eka wun’wana ni wun’wana wa hina? Loko u vona mutshama-xitulu a tshame exitejini xiyimiso xi nga si sungula, u nga ha yimayimi, hatlisa u ya tshama ehansi. Sweswo swi ta endla leswaku u hlanganyela hi mbilu hinkwayo eka risimu leri pfulaka xiyenge xin’wana ni xin’wana, u dzunisa Yehovha.—Ps. 149:1.

⁵ Loko Xiyimiso Xi Ri Karhi Xi Ya eMahlweni: Ezra u “lunghiselele mbilu yakwe leswaku yi kambisisa nawu wa Yehovha ni ku wu endla.” (Ezra 7:10) Xana hi nga tilunghiselela njhani timbilu ta hina leswaku ti amukela ndzayo leyi Yehovha a yi nyikaka? Loko u ri karhi u kambisisa tinhloko-mhaka ta tinkulumo to hambana-hambana exiyimisweni xa wena, tivutise, ‘I yini leswi Yehovha a ndzi byelaka swona eka nongonoko lowu? Rungula leri ri nga ndzi pfuna njhani mina ni ndyangu wa ka hina?’ (Esa. 30:21; Efe. 5:17) Hambeta u tivutisa swivutiso sweswo entsombanweni hinkwawo. Tsala tinhla leti u lavaka ku ti tirhisa. Tinyike nkarhi wa ku bula ha tona eku heleni ka nongonoko wa siku rin’wana ni rin’wana. Sweswo swi ta ku pfuna leswaku u hlayisa rungula rero u tlhela u ri tirhisa.

⁶ Swi nga ha tikanyana ku tshama hi rhiye ndleve tiawara to hlayanyana. I yini lexi nga hi pfunaka ku lwisana ni mboyamelo wa ku yingayinga ka mianakanyo? I ku tirhisa matimba ya tihlo hi vutlhari. Nkarhi wo tala, leswi hi swi languteke hi swona leswi hi yisaka nyingiso eka swona. (Mat. 6:22) Hikwalaho, u nga pfumeli ku hundzuluxa nhloko ya wena u vona leswaku pongo leri u ri twaka ri huma kwihi kumbe ku lava ku vona xin’wana ni xin’wana lexi tshukatshukaka. Mahlo ya wena a ma tshame ma langute xivulavuri. Loko ku hlayiwa tsalwa, na wena hlaya tsalwa ra kona eBibeleni ya wena, naswona u siya Bibele yi pfuriwile loko tsalwa rero ri ri karhi ri hlamuseriwa.

⁷ Rirhandzu ra Vukreste ri ta hi susumetela ku papalata ku kavanyeta van’wana loko xiyimiso xi ri karhi xi ya emahlweni. (1 Kor. 13:5) Lowu i nkarhi wa ku “miyela” hi yingisela. (Ekl. 3:7) Hikwalaho, a hi papalateni ku vulavula swi nga fanelanga ni ku yingayinga. A hi hunguteni ku ya exihambukelweni ko tala, hi ya eka xona xiyimiso xi nga si sungula. Hi nga dyi kumbe ku nwa kukondza ku fika nkarhi wo wisa, handle ka loko ku ri hikwalaho ka vuvabyi lebyi xungetaka vutomi. Lava va taka ni tiselfoni, swiciyoti, tikhamera ta tivhidiyo ni tikhamera to susa swifaniso, a va fanelanga va swi tirhisa hi ndlela leyi nga ta kavanyeta van’wana. Vatswari va fanele ku hlela leswaku ndyangu hinkwawo—ku katsa ni vana va kondlo-a-ndzi-dyi—wu tshama swin’we leswaku va kota ku lawula vana va vona.—Swiv. 29:15.

⁸ N’wexemu, nkulu loyi ku nga khale a ya emintsombanweni u te: “Ndzi vona onge ntsombano lowu a wu hlawulekile hikwalaho ka xivangelo xin’wana. Kwalomu ka un’wana ni un’wana wa vayingiseri a a tsala tinhla, ku katsa ni vana. Sweswo a swi tsakisa ku swi vona. Tibibele a ti tirhisiwa hi mfanelo loko swivulavuri swi kombela leswaku ku hlayiwa tindzimana to karhi.” Kunene ku yingisa ko tano ka bumabumeriwa. A ku vuyerisi hina ni van’wana lava nga entsombanweni ntsena, kambe ku tlula hinkwaswo, ku yisa ku dzuneka eka Muleteri wa hina Lonkulu, Yehovha Xikwembu.—Esa. 30:20.