Yingisa U Tlhela U Dyondza
1. Ha yini swi lava leswaku hi endla matshalatshala lama engeteleke leswaku hi kota ku yingisa ni tlhela hi dyondza entsombanweni wa muganga?
1 Ku nga ri khale mintsombano ya miganga ya 2013 yi ta sungula. Se ma endliwile malunghiselelo ya nongonoko lowu vulavulaka hi swilaveko swa sweswinyana emisaveni hinkwayo. Xana se u ma endlile malunghiselelo yo va kona entsombanweni masiku ha manharhu ka wona? Mintsombano leyikulu yi nga ha va ni swikavanyeto swo tala, hikwalaho hi fanele hi endla matshalatshala lama engetelekeke leswaku hi kota ku yingiserisisa nongonoko hi vurhon’wana. Tanihi leswi xiyimiso xi nga ta teka nkarhi wo leha ku tlula wa minhlangano ya vandlha, hi fanele hi tshama hi xalamukile. Ku engetela kwalaho, ku famba ni swin’wana swi nga ha endla leswaku hi karhala. I yini lexi hi nga xi endlaka leswaku hi tshama hi xalamukile leswaku hi ta kota ku yingisa ni ku tlhela hi dyondza?—Det. 31:12.
2. Hi nga tilunghiselela njhani timbilu ta hina malunghana ni xiyimiso xa ntsombano?
2 Loko Ntsombano Wu Nga Si Sungula: Xiyimiso xa ntsombano wa matiko yo hambana-hambana (minkarhi ya xiyimiso xa laha Afrika Dzonga yi kombisiwile laha hansi) lexi katsaka ni tinhloko-mhaka ta tinkulumo hinkwato ni tsalwa rin’we kumbe mambirhi lawa ti sekeriweke eka wona, xa kumeka eka Web site ya www.jw.org/ts. Loko hi kota ku nghena eka Internet, ku kambisisa vuxokoxoko lebyi swi ta hi pfuna leswaku hi kota ku lunghiselela timbilu ta hina malunghana ni leswi nga ta dyondziwa. (Ezra 7:10) Hi nkarhi wa Vugandzeri bya n’wina bya Ndyangu bya nimadyambu, xana mi nga tinyika nkarhi wa leswaku mi kambisisa xiyimiso xa ntsombano lowu taka?
3. I yini lexi nga ta hi pfuna leswaku hi yingiserisisa hi vurhon’wana?
3 Hi Nkarhi Wa Ntsombano: Loko swi koteka, yanani eswihambukelweni xiyimiso xi nga si sungula. Timani tiselfoni leswaku ti nga mi kavanyeti loko vanhu va mi fonela kumbe va mi rhumelela marungula kumbe mi ringeka hi ku rhumelela van’wana marungula hi nkarhi wa xiyimiso. Loko swi boha leswaku u nga yi timi, yi endle leswaku yi rhurhumela kunene leswaku yi nga kavanyeti van’wana loko u foneriwa hi un’wana. Loko u tirhisa switirhisiwa swa elektroniki swo fana ni tablet hi nkarhi wa xiyimiso, swi tirhise hi ndlela leyi nga taka yi nga kavanyeti van’wana. Papalata ku dya kumbe ku nwa hi nkarhi wa xiyimiso. (Ekl. 3:1) Tshama u langute xivulavuri. Loko ku hlayiwa tsalwa, pfula eBibeleni ya wena. Tsala tinotsi to koma.
4. Xana vatswari va nga va pfuna njhani vana va vona leswaku va yingisa va tlhela va dyondza?
4 Hi lava leswaku ni vana va hina va yingisa va tlhela va dyondza. Swivuriso 29:15 yi ri: “Mufana la tshikiweke a ntshunxekile u ta n’wi khomisa tingana mana wakwe.” Hikwalaho, i swinene leswaku mindyangu yi tshama swin’we leswaku vatswari va kota ku tiyiseka leswaku vana va vona va yingiserisisa nongonoko hi vurhon’wana ematshan’weni yo va va vulavula, ku rhumela marungula kumbe ku famba-famba. Hambiloko va ri va ntsongo swinene lerova va nga swi twisisi leswi dyondziwaka, vana va nga leteriwa leswaku va tshama va xalamukile ni ku tshama va miyerile.
5. Ha yini swi vuyerisa ku pfuxeta nongonoko, naswona hi nga swi endlisa ku yini leswi?
5 Endzhaku Ka Xiyimiso Masiku Hinkwawo: Mi nga xuxi byi kondza byi va vusiku. Hatlani mi etlela leswaku mi ta wisa kahle. Loko mi pfuxeta leswi mi swi dyondzeke swi ta mi pfuna leswaku mi swi tsundzuka nkarhi wo leha. Hikwalaho, swi ta mi vuyerisa ku teka timinete ti nga ri tingani mi bula hi xiyimiso tanihi ndyangu madyambu man’wana ni man’wana. Loko u ya eswitolo leswi xavisaka swakudya ni vanghana, ha yini u nga teki tinotsi ta wena u famba na tona leswaku mi burisana hi yinhla kumbe timbirhi leti u ti tsakeleke? Loko mi tlhelela ekaya endzhaku ka ntsombano, mi nga ha heta nkarhinyana eka Vugandzeri bya n’wina bya Ndyangu bya nimadyambu mi ri karhi mi bula hi ndlela leyi mi nga ta swi tirhisa ha yona leswi mi swi dyondzeke tanihi ndyangu. Mi nga ha tlhela mi tihlawulela nkarhi wun’wana evhikini leswaku mi pfuxeta xiphemu xin’wana ni xin’wana xa minkandziyiso leyintshwa.
6. Xana ku va kona entsombanweni ntsena swi enerile? Hlamusela.
6 Nkhuvo wa tsakisa loko swakudya swi dyiwa. Hi nga ha vula leswi fanaka malunghana ni lunghiselelo ra swakudya swa moya leswi nyikeriwaka entsombanweni wa muganga. Onge hi nga vuyeriwa hi xitalo hi ku va kona eka nongonoko wun’wana ni wun’wana, ku yingisela hi vurhon’wana ni ku tirhisa leswi hi swi dyondzaka.