“Hlengeleta Vanhu”
1. Mintsombano ya muganga ni ya matiko yi yelana njhani ni nhlengeletano ya nkoka leyi Vaisrayele va veke na yona endzhakunyana ka loko va humile aEgipta?
1 Endzhakunyana ka loko Vaisrayele va humile aEgipta, Yehovha u lerise Muxe ku “hlengeleta vanhu” eNtshaveni ya Sinayi leswaku va ta twa marito ya Yena leswaku va ta N’wi chava va tlhela va dyondzisa vana va vona tindlela ta Yena. (Det. 4:10-13) Xiendlakalo xolexo xi fanele xi nga rivariwanga naswona xi fanele xi va tiyise ripfumelo. Eka tin’hweti ti nga ri tingani leti nga ta landzela, vanhu va Yehovha va ta hlengeletana emintsombanweni ya muganga ni ya matiko leswaku va dyondzisiwa hi yena. Hi fanele hi endla yini leswaku hi ta vuyeriwa swinene?
2. I yini leswi hi faneleke hi swi endla leswaku hi ‘lunghekela’ ntsombano wa hina?
2 ‘Lungheka’: Yehovha u lerise Vaisrayele leswaku va ‘lunghekela’ nhlengeletano yoleyo ya nkoka leyi a yi ta va eNtshaveni ya Sinayi. (Eks. 19:10, 11) Hilaha ku fanaka, hinkwavo lava nga ta va kona emintsombanweni va fanele va lunghiselela hi vukheta, a ku fanelanga ku lunghiselela ntsena lava nga ta va ni xiyenge eka nongonoko. Hi xikombiso, vo tala swi ta lava va teka masiku yo wisa emintirhweni ya vona ya ku tihanyisa. Kumbexana xiyimo xa wena xa fana ni xa Nehemiya. A a lava ku ntshunxiwa entirhweni wa yena wa ku va mucheri wa vhinyo wa Hosi Atazekiseki, leswaku a ta ya eYerusalema a ya pfuneta ku pfuxa marhangu ya muti wolowo, kambe a a swi tiva leswaku a swi ta endleka leswaku hosi yi nga n’wi pfumeleli. Nehemiya u khongerile ivi endzhaku ka sweswo a endla xikombelo xakwe xa tintswalo hi xivindzi. Hosi yi n’wi pfumelerile ku famba naswona yi tlhele yi seketela ntirho wolowo wo aka! (Neh. 2:1-9) Ku engetela eka ku kombela masiku yo wisa eka muthori wa wena, xana u tiyisekile hi malunghiselelo ya wena ya swo famba ni ndhawu leyi u nga ta etlela eka yona? Vakulu va tiyimiserile ku pfuna munhu wihi na wihi loyi a nga ha lavaka ku pfuniwa. Kunguhata ku fika ka ha ri ni nkarhi nongonoko wu nga si sungula, naswona tiyimisele ku “nyikela nyingiso lowukulu ku tlula lowu tolovelekeke” eka leswi u nga ta swi twa.—Hev. 2:1.
3. I yini lexi nga ta hi pfuna ku endla leswaku timbilu ta hina ti lunghekela ntsombano?
3 Nchumu wun’wana wa nkoka lowu katsekaka eka ku lungheka ka hina i ku lunghiselela timbilu ta hina leswaku hi ta yingisa hi tlhela hi dyondza. (Ezra 7:10) Nongonoko wa ntsombano wu ta hoxiwa ka ha ri emahlweni eka Web site ya jw.org/ts naswona wu ta va wu ri ni tinhloko-mhaka ta tinkulumo hinkwato swin’we ni tsalwa rin’we kumbe mambirhi lawa nkulumo ha yin’we yi sekeriweke eka wona. Leswi swi endla hi va ni rungula lerinene ngopfu ro ri kambisisa hi nkarhi wa Vugandzeri bya hina bya Ndyangu bya nimadyambu emavhikini ya le mahlweninyana ka ntsombano lowu hi averiweke wona. Vahuweleri van’wana va printa nongonoko wolowo kutani va wu tirhisela ku tsala tinhla to koma hi nkarhi wa ntsombano.
4. Vatswari va nga wu tirhisa njhani ntsombano ku dyondzisa vana va vona?
4 ‘Dyondzisa Vana Va Wena’: Xikongomelo xin’wana lexi boxiweke xa ntsombano lowu a wu ri eNtshaveni ya Sinayi a ku ri leswaku vatswari va Vaisrayele va “dyondzisa vana va vona.” (Det. 4:10) Ntsombano wu nyika vatswari nkarhi lowunene wo endla leswi fanaka. Vatswari va fanele va tshama ni vana va vona hi nkarhi wa nongonoko kutani va va pfuna leswaku va yingisela. Mindyangu yi nga bula hi nongonoko wolowo yi ri swin’we hi madyambu man’wana ni man’wana ya masiku ya ntsombano ni le ndzhaku ka wona hi nkarhi wa vugandzeri bya yona bya ndyangu.
5. Hi ta vuyeriwa njhani loko ho ya entsombanweni lowu taka?
5 Ntsombano wa nkoka lowu a wu ri eNtshaveni ya Sinayi wu pfune Vaisrayele ku tlangela lunghelo ra vona ro hlawuleka ra ku va vanhu va Xikwembu. (Det. 4:7, 8) Ntsombano wa hina lowu taka wu endleriwe ku hi vuyerisa hi ndlela leyi fanaka. Hi ta va hi humile ku ringana masiku manharhu emisaveni ya Sathana leyi fanaka ni mananga lawa swi tikaka ku va eka wona, kutani hi ya phyuphyisiwa hi tlhelo ra moya hi tlhela hi va ni vunakulobye lebyi akaka eparadeyisini ya hina ya moya. (Esa. 35:7-9) Leswi siku ra Yehovha ri tshinelaka, onge hi nga tshama hi ri karhi hi wu tsundzuka nkarhi lowu wo hlangana ni vamakwerhu leswaku hi ta khutazana!—Hev. 10:24, 25.