Ku Hlengeletana Swin’we Leswaku Hi Dzunisa Yehovha
1. Xi ri yini xihloko xa ntsombano naswona ha yini Yehovha swi n’wi fanela leswaku hi n’wi dzunisa?
1 Yehovha u ni matimba lama nga pimekiki, vutlhari bya yena a byi handzisiseki, u avanyisa hi ndlela leyi hetisekeke naswona i rirhandzu. Tanihi Muvumbi, Munyiki wa Vutomi ni Hosi ya Vuako Hinkwabyo, hi yena ntsena loyi hi faneleke hi n’wi gandzela. (Ps. 36:9; Nhlav. 4:11; 15:3, 4) Ntsombano wa Muganga ni wa Matiko Hinkwawo lowu nga ni xihloko lexi nge “Vangamisa Xikwembu” wu ta hi endla hi navela swinene ku xi dzunisa tanihi Xikwembu xi ri xin’we xa ntiyiso.—Ps. 86:8-10.
2, 3. Xana ku hlela kahle ku nga hi pfuna njhani leswaku hi vuyeriwa hi xitalo?
2 Ku Hlela Kahle Swa Laveka: Leswaku hi vuyeriwa hi xitalo eka nkhuvo wa swakudya swa moya lowu Yehovha a wu lunghiseleleke, i swa nkoka leswaku hi hlela kahle. (Efe. 5:15, 16) Xana se u hetile ku endla malunghiselelo ya byetlelo, xo famba ha xona ni ku kombela ku xwa entirhweni kumbe exikolweni? U nga hlweli ku endla malunghiselelo lawa ya nkoka. Loko wo hlwela ku kombela masiku, u nga ha lahlekeriwa hi xiyenge xin’wana xa xiendlakalo lexi xo tsakisa. Hinkwerhu ka hina hi fanele ku va kona eka xiyenge xin’wana ni xin’wana xa ntsombano. Ku vuriwa yini loko muthori wa wena a nga lavi ku ku nyika nkarhi? Kumbexana, ku n’wi hlamusela leswaku swiletelo leswi hi swi kumaka emintsombanweni swi hi pfuna leswaku hi va vatirhi lava tshembekaka ni lava gingiritekaka, swi nga n’wi endla leswaku a ku pfumelela. Xana ku na van’wana evandlheni ra ka n’wina lava nga lavaka ku pfuniwa leswaku va va kona entsombanweni? Vakulu ni van’wana evandlheni va fanele va xalamukela ku khathalela swilaveko swa lava kuleke ni lava vabyaka.
3 Swi endle pakani ya wena ku fika ka ha ri ni nkarhi entsombanweni siku ni siku. Sweswo swi ta endla leswaku u kota ku tshamiseka ku nga si sunguriwa hi risimu naswona swi ta ku endla u lunghekela ku yingisa rungula leri nga ta nyikeriwa. Tinyangwa ti ta pfuriwa hi 6:30 a.m siku rin’wana ni rin’wana. Hi kombela leswaku mi hlayisa switshamo swa swirho swa ndyangu kumbe lava mi fambaka na vona hi movha ntsena.
4. Ha yini hinkwerhu hi komberiwa ku ta ni swakudya leswi hi nga ta swi dya hi nkarhi wo wisa entsombanweni?
4 Hi kombela leswaku hinkwenu mi ta ni swakudya swa ninhlikanhi, ematshan’weni yo suka endhawini ya ntsombano, mi ya xava swakudya ehandle hi nkarhi wo wisa. Loko mi fambisana ni lunghiselelo leri, mi ta endla leswaku ku va ni moya wa ku rhula naswona swi ta endla leswaku ku va ni nkarhi wo tala wo vona vapfumeri-kuloni. (Ps. 133:1-3) Hi kombela mi tsundzuka leswaku mabodlhela lama fayekaka ni swakunwa leswi nga ni xihoko, a swi pfumeleriwi endhawini ya ntsombano.
5. Xana hi nga sungula njhani ku endla timbilu ta hina ti lunghekela ntsombano?
5 Yingisela U Tlhela U Dyondza: Ezra u lunghiselele mbilu ya yena hi xikhongelo leswaku a amukela rito ra Xikwembu. (Ezra 7:10) U voyamisele mbilu ya yena eka dyondzo ya Yehovha. (Swiv. 2:2) Hambiloko hi nga si suka ekaya hi ya entsombanweni, hi nga sungula ku lunghiselela timbilu ta hina hi ku anakanyisisa hi xihloko xa ntsombano ni ku bula ha xona ni mindyangu ya hina.
6. I yini lexi nga hi pfunaka leswaku minkarhi hinkwayo hi nyikela nyingiso enongonokweni? (Vona bokisi.)
6 Eholweni leyikulu ya ntsombano, ku nga va ni swilo swo tala leswi swi nga tekaka nyingiso wa hina. Swikavanyeti leswi swi nga yi susa hi ku olova mianakanyo ya hina eka leswi xivulavuri xi swi vulaka. Loko sweswo swi humelela hi lahlekeriwa hi rungula ra nkoka. Swiringanyeto leswi kumekaka eka bokisi leri nga laha, swi nga hi pfuna ku antswisa ku yingisa ka hina.
7, 8. Xana hi nga swi kombisa njhani leswaku ha va anakanyela van’wana naswona xana ntsombano wu ta sungula nkarhi muni naswona wu hela rini? (Vona bokisi.)
7 Kombisa Ku Anakanyela Van’wana: Tikhamera ni tivhidiyo khamera swi nga tirhisiwa hi nkarhi wa nongonoko, kambe leswaku mi nga kavanyeti van’wana, swi tirhiseni mi tshamile eswitshan’weni swa n’wina. Tiselefoni ni swiciyoti swi fanele swi endliwa leswaku swi nga kavanyeti van’wana. A ku na munhu la faneleke a tirhisa fambiselo ra gezi kumbe ro kurisa mpfumawulo, leri nga kona entsombanweni.
8 Hakunene hi swi langutele hi mahlo-ngati ku hlengeletana swin’we leswaku hi gandzela Yehovha! Onge hi nga tiyimisela ku n’wi dzunisa hi ku va kona eka nongonoko hinkwawo, hi ku yingiserisisa hi vukheta ni ku tirhisa leswi hi swi dyondzaka.—Det. 31:12.
[Bokisi leri nga eka tluka 3]
Ku Yingisela eMintsombanweni
▪ Anakanyisisa hi swihloko swa tinkulumo
▪ Pfula Bibele loko ku vuriwa matsalwa
▪ Tsala tinotsi to koma
▪ Hlawula tinhla leti u nga ta ti tirhisa
▪ Pfuxeta leswi u swi dyondzeke
[Bokisi leri nga eka tluka 4]
MINKARHI YA NONGONOKO
Ntsombano Wa Matiko Hinkwawo:
Ravumune 1:20 p.m. – 4:50 p.m.
Ravuntlhanu 9:00 a.m. – 3:55 p.m.
Mugqivela 9:00 a.m. – 3:40 p.m.
Sonto 9:00 a.m. – 3:45 p.m.
Ntsombano Wa Muganga:
Ravuntlhanu & Mugqivela 9:00 a.m. – 4:10 p.m.
Sonto 9:00 a.m. – 3:15 p.m.