“A Hi Tlakuseni Vito Rakwe Swin’we”
1. Hi kwihi laha hi nga ta tlakusa vito ra Xikwembu swin’we, naswona i malunghiselelo wahi lawa hi nga ma endlaka sweswi?
1 Mupisalema u yimbelele a ku: “Oho . . . twarisani Yehovha mi ri na mina, a hi tlakuseni vito rakwe swin’we.” (Ps. 34:3) Ntsombano wa hina wa Muganga lowu taka lowu nge “Famba Ni Xikwembu,” wu ta hi nyika nkarhi wo tlakusa vito ra Yehovha swin’we ni vamakwerhu vo huma emavandlheni yo tala. Xana se mi ma endlile malunghiselelo ya byetlelo, ya swo famba ni ku teka masiku yo wisa entirhweni wo tihanyisa? I vutlhari ku hlela timhaka leti ka ha ri ni nkarhi.—Swiv. 21:5.
2. Ha yini swi pfuna ku hlela ku fika entsombanweni ka ha ri ni nkarhi?
2 Ku Fika eNtsombanweni: Ku na swo tala leswi hi faneleke hi swi endla loko hi ya entsombanweni. Ku hatla hi suka ekaya swi ta hi pfuna leswaku hi nga siyiwi hi nkarhi hambiloko ho tshuka hi hlwerisiwa hi swin’wana endleleni swi nga rindzeriwanga, naswona swi ta hi pfuna leswaku hi tshamiseka hi kota ku hlanganyela loko ku yimbeleriwa risimu ro pfula ni xikhongelo. (Ps. 69:30) Timinete ti nga ri tingani loko xiyimiso xi nga si sungula, mutshama-xitulu u ta tshama exitejini loko ku ri karhi ku tlanga vuyimbeleri bya Mfumo. Hi nkarhi wolowo, hinkwerhu hi fanele hi tshamiseka leswaku nongonoko wu ta sungula hi ndlela leyi xiximekaka.—1 Kor. 14:33, 40.
3. Xana hi nga swi kombisa njhani leswaku ha va anakanyela van’wana loko hi hlayisa tindhawu to tshama eka tona?
3 Rito ra Xikwembu ri hi byela leswaku ‘timhaka ta hina hinkwato a ti endleke hi rirhandzu.’ (1 Kor. 16:14) Loko tinyangwa ti pfuriwa, ku anakanyela van’wana swi ta hi sivela ku tsutsuma ni ku susumetana leswaku hi rhangela ku ya kuma ndhawu leyi hi yi lavaka loko van’wana va nga si fika. U nga veka ndhawu yo tshama ya lava u fambaka swin’we na vona ntsena kumbe lava mi tshamaka swin’we ekaya.—1 Kor. 13:5; Filp. 2:4.
4, 5. (a) Hi wahi malunghiselelo ya nkarhi wa swakudya swa ninhlikanhi, naswona ya pfuna njhani? (b) Ha yini swi pfuna ku tiva minkarhi ya xiyimiso?
4 Hi kombela u titela ni swakudya ku ri na ku va u suka entsombanweni u ya xava swakudya hi nkarhi wo wisa. Leswi swi ta hi pfuna hinkwerhu leswaku hi tiphina hi xinakulobye lexi akaka nileswaku loko xiyimiso xa nindzhenga xi sungula hi va hi ri kona. Loko swi fanerile, mi nga tirhisa khula-bege leyitsongo leyi mi nga yi vekaka ehansi ka xitulu. Tikhula-bege letikulu ngopfu ti fanele ti vekiwa laha varindzi va nga ta hi lerisa leswaku hi ti veka kona. Mabodlhela lama fayekaka ni byala, a swi fanelanga swi tisiwa entsombanweni.
5 Leswaku mi kota ku lunghiselela kahle, hi kombela mi xiya minkarhi leyi xiyimiso xi nga ta sungula ni ku hela ha yona: Ravuntlhanu ni Mugqivela: 9:00 a.m.–4:10 p.m.; Sonto 9:00 a.m.–3:15 p.m.
6. Xana hi nga endla njhani leswaku timbilu ta hina ti lunghekela ndzetelo lowu hi nga ta wu kuma?
6 Swakudya Swa Moya Swi Hi Yimerile: Hosi Yehoxafati hi un’wana loyi a a “lunghiselele mbilu ya [yena] leswaku yi lavisisa Xikwembu xa ntiyiso.” (2 Tikr. 19:3) Xana hina hi nga endla njhani leswaku timbilu ta hina ti lunghekela ntsombano? Swihloko leswi nga eka tluka ro hetelela ra Xalamuka! ya May 22 ni ya June 8 hi Xinghezi, swi hi tsongolele swakudya leswi hi nga ta phameriwa swona. Ha yini u nga tinyiki nkarhi wo hlaya swihloko sweswo, u tiphomisa marha hi swakudya leswi Yehovha a hi vekeleke swona? Ku lunghiselela mbilu ya hina swi katsa ku kombela Yehovha leswaku a hi pfuna hi twisisa ndzetelo lowu hi nga ta wu kuma hi tlhela hi wu tirhisa.—Ps. 25:4, 5.
7. Xana hi navela yini, naswona ha yini?
7 Hinkwerhu ka hina hi navela ku dyondza swo tala eRitweni ra Xikwembu, hikuva ha swi tiva leswaku hi ta ponisiwa ha rona. (1 Pet. 2:2) Hikwalaho, a hi veni kona eNtsombanweni wa Muganga lowu nge “Famba Ni Xikwembu” kutani hi ‘tlakusa vito ra Yehovha swin’we.’—Ps. 34:3.
[Bokisi leri nga eka tluka 3]
Tindlela To Tlakusa Vito Ra Xikwembu
◼ Lunghiselela ka ha ri ni nkarhi
◼ Komba van’wana rirhandzu
◼ Lunghiselela mbilu ya wena