Bokisi Ra Swivutiso

◼ Loko hi endzela tindhawu leti tirhiseriwaka vugandzeri bya Yehovha ni le makaya ya Bethele, xana hi fanele hi ambala njhani?

Emisaveni hinkwayo, Tiholo ta Mfumo, Tiholo ta Tinhlengeletano ni makaya ya Bethele i tindhawu to hlawuleka leti nyiketeriweke vugandzeri bya Yehovha. A hi ta xiyimo xa le henhla kambe ti basile, ti hlelekile naswona ta xiximeka. Leswi swi hambanile swinene ni leswi hi swi vonaka emafambiselweni lawa ya swilo ya Sathana. Lava va endzelaka tindhawu leti tirhiseriwaka vugandzeri bya Yehovha, va fanele va tiviwa va ri vanhu va yena ni lava endlaka ku rhandza ka yena.

Tanihi Vakreste, “hi tibumabumela tanihi vatirheli va Xikwembu” hi tindlela hinkwato, ku katsa ni hi ndlela leyinene leyi hi ambalaka ni ku tisasekisa ha yona. (2 Kor. 6:3, 4) Nakambe hi languteriwe leswaku hi tikhoma kahle. Minkarhi hinkwayo ku ambala ni ku tisasekisa ka hina swi fanele swi va leswi xiximekaka naswona swi kombisa leswaku hi malandza ya Yehovha Xikwembu. Leswi swi fanele swi va tano ngopfu-ngopfu loko hi endzela eyindlu-nkulu le New York ni le marhavini emisaveni hinkwayo.

Loko buku leyi nge Ku Hleleriwa Ku Endla Ku Rhandza Ka Yehovha yi hlamusela nkoka wa maambalelo ni ku tisasekisa lokunene, yi vulavula hi xilaveko xa ku va lava baseke, lava ambalaka hi ndlela yo xiximeka, lava tilunghisaka kahle loko hi ya ensin’wini ni loko hi ya eminhlanganweni ya vandlha. Hikwalaho, eka tluka 139 ndzimana 1 yi ri: “Tsundzuka, vito leri nge Bethele ri vula ‘Yindlu ya Xikwembu.’ Hikwalaho ndlela leyi hi ambalaka ni ku tilunghisa ha yona swin’we ni ndlela leyi hi tikhomaka ha yona, swi fanele swi fana ni ndlela leyi hi endlaka ha yona loko hi ya eminhlanganweni ya vugandzeri eHolweni ya Mfumo.” Ku nga khathariseki leswaku vahuweleri va Mfumo va huma ekule kumbe ekusuhi ni le Bethele va fanele va ambala hi ndlela leyi hlamuseriweke laha henhla. Hi ndlela yoleyo, vaendzi va ta va va kombisa ku tlangela ni xichavo.—Ps. 29:2.

Swiambalo swa hina swi fanele swi kombisa leswaku hi vanhu ‘lava chavaka Xikwembu.’ (1 Tim. 2:10) Ku ambala ni ku tisasekisa ka hina swi pfuna vanhu van’wana leswaku va va ni langutelo lerinene hi vugandzeri bya Yehovha bya ntiyiso. Hambiswiritano, ku xiyiwe leswaku vamakwerhu va nga ri vangani loko va endzela tindhawu leti tirhiseriwaka vugandzeri bya Yehovha, va ambala hi ndlela leyi nga xiximekiki swinene, kumbe va ambala swiambalo swo vonikela. Vakreste a va fanelanga va ambala hi ndlela leyi nikan’we. Emhakeni leyi ya maambalelo ni le ka swin’wana leswi hi swi endlaka tanihi Vakreste evuton’wini bya hina, hi tiyimisele ku hanya hi ndlela leyi hi hambanisaka kahle ni misava leyi. Tanihi leswi hi nga vanhu va Xikwembu, hi endla swilo hinkwaswo leswaku hi xi vangamisa.—Rhom. 12:2; 1 Kor. 10:31.

Hikwalaho loko hi endzela eyindlu-nkulu le New York hambi ku ri emakaya ya Bethele etindhawini tin’wana hi fanele hi tivutisa swivutiso leswi landzelaka, ku nga khathariseki leswaku ho hundza hi kona kumbe hi endzela kona hi ku kongoma: ‘Xana maambalelo ni ku tisasekisa ka mina ku kombisa xichavo, ku basa, ni ku xixima ndhawu leyi ndzi nga ta yi endzela? Xana swi xi yimela kahle Xikwembu lexi ndzi xi gandzelaka? Xana ndlela leyi ndzi langutekaka ha yona yi ta khunguvanyisa van’wana?’ Onge hi nga “sasekisa dyondzo ya Muponisi wa hina, Xikwembu” hi ndlela leyi hi ambalaka ni ku tilunghisa ha yona minkarhi hinkwayo!—Tito 2:10.