Bokisi Ra Swivutiso

● Ha yini hi fanele ku nyikela nyingiso lowu hlawulekeke eka maambalelo ni ku tilunghisa ka hina loko hi endzela Bethele ya Afrika Dzonga ni miako hinkwayo ya marhavi emisaveni hinkwayo?

Vakriste va languteriwa ku hlayisa ku languteka lokunene. Maambalelo ni ku tilunghisa ka hina hi minkarhi hinkwayo swi fanele swi kombisa vunene ni ntikelo leswi fanelaka malandza ya Yehova Xikwembu. Leswi swi tano ngopfu-ngopfu loko u endzela Bethele ni tihofisi ni miako ya marhavi emisaveni hinkwayo. Loko yi hlamusela nkoka wa maambalelo ni ku tilunghisa loku faneleke, Organized to Accomplish Our Ministry yi hlamusela ehenhleni ka xilaveko xo basa ka miri ni maambalelo ni ku tilunghisa loku ringaneleke loko u ya evutirhelini bya nsimu ni ku va kona eminhlanganweni ya Vukriste. Kutani eka tluka 131, ndzimana 2, yi ri: “Leswi fanaka swi ta tirha loko ku endzeriwa kaya ra Bethele eBrooklyn kumbe yin’wana ni yin’wana ya tihofisi ra marhavi ya Sosayiti. Tsundzuka, vito leri nge Bethele ri vula ‘Yindlu ya Xikwembu,’ kutani maambalelo, ku tilunghisa ni ku tikhoma ka hina swi fanele swi fana ni leswi swi languteriwaka eka hina loko hi va kona eminhlanganweni ya vugandzeri eHolweni ya Mfumo.”

Muapostola Pawulo u vule leswaku hi “xihlamariso emisaveni hinkwayo, emahlweni ka tintsumi ne mahlweni ka vanhu.” (1 Vakor. 4:9) Hikwalaho, maambalelo ni ku tilunghisa ka hina ku fanele ku va ni nkucetelo lowunene eka van’wana ehenhleni ka ndlela leyi va langutaka vugandzeri bya ntiyiso bya Yehova ha yona. Hambi swi ri tano, swi xiyiwile leswaku vamakwerhu van’wana va xinuna ni va xisati, loko va endzela marhavi ya Sosayiti, va voyamela eku ntshunxekeni ku tlurisa mpimo eka maambalelo ya vona. Maambalelo yo tano a ma fanelanga loko u endzela miako ya marhavi. Emhakeni leyi, ku fana ni le timhakeni letin’wana hinkwato ta vutomi bya hina bya Vukriste, hi navela ku hlayisa mimpimanyeto leyi fanaka leyi tlakukeke leyi hlawulaka vanhu va Xikwembu tanihi lava va hambaneke ni misava hi ku endla swilo hinkwaswo leswaku ku dzunisiwa Xikwembu. (Varhoma 12:2; 1 Vakor. 10:31) Nakambe i swinene ku vulavula ni swichudeni swa hina swa Bibele ni van’wana lava nga ha endzelaka Bethele ya le Brooklyn kumbe yin’wana ni yin’wana ya tihofisi ta marhavi ya Sosayiti ro sungula leswaku u va tsundzuxa hi nkoka wa ku nyikela nyingiso eka maambalelo ni ku tilunghisa loku faneleke.

Kutani loko u endzela miako ya Sosayiti, tivutise: ‘Xana maambalelo ni ku tilunghisa ka mina ku ringanerile? (Mik. 6:8) Xana swi kombisa Xikwembu lexi ndzi xi gandzelaka khwatsi? Xana van’wana va nga karhatiwa kumbe ku vilerisiwa hi ku languteka ka mina? Xana ndzi veka xikombiso lexinene eka van’wana lava va nga ha vaka va endza ro sungula?’ Onge hi minkarhi hinkwayo, hi maambalelo ni ku tilunghisa ka hina hi nga “komba ku saseka ka leswi dyondzisiwaka hi tlhelo ra Xikwembu Muponisi wa hina.”—Tito 2:10.