Bokisi Ra Swivutiso

◼ Hi fanele hi ambala ni ku tisasekisa hi ndlela yihi loko hi endzela makaya ya Bethele ni miako ya marhavi?

Loko hi ya eBethele hi ya valanga ndhawu kumbe hi endzela swirho swa ndyangu wa Bethele, “maambalelo, ku tilunghisa ni mahanyelo ya hina swi fanele swi fana ni leswi swi languteriweke eka hina loko hi ya eminhlanganweni ya vugandzeri eHolweni ya Mfumo.” (om-TS 131) Hambiswiritano, hi xiye leswaku loko vamakwerhu van’wana va endzela tihofisi ta marhavi, va ta va ambale swiambalo leswi nga riki na xindzhuti. Sweswo a swi fanelanga loko u endzela miako leyi. Tanihi malandza ya Yehovha Xikwembu lama xiximekaka, hi fanele hi languteka hi ndlela leyi amukelekaka ni leyi xiximekaka.—1 Tim. 2:9, 10.

Leswi i swa nkoka ngopfu-ngopfu loko hi endzela makaya ya Bethele ni miako ya marhavi, hikuva vanhu lava nga riki Timbhoni va tshama va hi veke tihlo. Leswi vanhu vo tano va swi vonaka swi nga va susumetela ku fikelela makumu yo karhi hi vanhu va Xikwembu ni nhlengeletano ya xona. I swinene ku tsundzuxa swichudeni swa Bibele ni van’wana lava lavaka ku endza, leswaku va xiyisisa maambalelo ni ku tilunghisa ka vona. Ndyangu wa Bethele wu ta tlangela matshalatshala yo tano.

Tanihi Vakreste, hi fanele hi tivonela leswaku ku languteka ka hina ku nga khunguvanyisi van’wana. (2 Kor. 6:3, 4) Ku ri na sweswo, onge minkarhi hinkwayo hi nga “sasekisa dyondzo ya Muponisi wa hina, Xikwembu, eka swilo hinkwaswo,” hikwalaho ka ku languteka ka hina lokunene.—Tito 2:10.