Bokisi Ra Swivutiso

◼ Ha yini hi fanele hi nyikela nyingiso lowu hlawulekeke eka maambalelo ni ku tisasekisa ka hina loko hi endzela miako ya Sosayiti eNew York ni le tihofisini tin’wana ta marhavi emisaveni hinkwayo?

Vakreste va languteriwa ku tshama va ri karhi va languteka hi ndlela leyinene. Minkarhi hinkwayo maambalelo ni ku tisasekisa ka hina swi fanele swi kombisa ku faneleka ni xindzhuti leswi fanelaka malandza ya Yehovha Xikwembu. Leswi swi tano ngopfu-ngopfu loko u endzela miako ya Sosayiti eNew York ni le marhavini man’wana emisaveni hinkwayo.

Hi 1998, ku ta va ni mintsombano ya muganga ya matiko hinkwawo. Magidi ya vamakwerhu lava humaka ematikweni layo tala va ta endzela yindlu-nkulu ya Sosayiti eNew York ni le marhavini ematikweni man’wana. Hi fanele hi “ndlela yin’wana ni yin’wana hi tibumabumela tanihi vatirheli va Xikwembu,” ku katsa ni maambalelo ni ku tisasekisa loku faneleke ku nga ri loko hi endzela miako leyi ntsena kambe ni hi minkarhi yin’wana.—2 Kor. 6:3, 4.

Loko yi hlamusela nkoka wa maambalelo ni ku tisasekisa lokunene, buku leyi nge Ku Hleleriwa Ku Hetisisa Vutirheli Bya Hina yi hlamusela xilaveko xa ku basa emirini, maambalelo ni ku tisasekisa loku faneleke, loko hi ya evutirhelini bya nsimu ni le minhlanganweni ya Vukreste. Kutani eka tluka 131, ndzimana 2, yi ri: “Leswi swa tirha loko hi endzela kaya ra Bethele eBrooklyn kumbe etihofisini tihi na tihi ta rhavi ra Sosayiti. Tsundzuka, vito leri nge Bethele ri vula ‘Yindlu ya Xikwembu,’ hikwalaho swiambalo swa hina, ku tisasekisa ni mahanyelo ya hina swi fanele swi fana ni leswi languteriweke eka hina loko hi ya eminhlanganweni ya vugandzeri eHolweni ya Mfumo.” Mpimanyeto lowu tlakukeke wu fanele wu hlayisiwa hi vahuweleri va Mfumo va ndhawu ya ka n’wina kun’we ni lava humaka etindhawini ta le kule lava taka ku ta hungasa ni swirho swa ndyangu wa Bethele ni ku ta endzela miako ya rhavi.

Swiambalo swa hina swi fanele swi va ni nkucetelo lowunene eka van’wana malunghana ni ndlela leyi va langutaka vugandzeri bya Yehovha bya ntiyiso ha yona. Hambiswiritano, swi xiyiwile leswaku loko va endzela miako ya Sosayiti, vamakwerhu van’wana va xinuna ni va xisati va rhandza ku ambala hi ndlela yo ntshunxeka swinene. Maambalelo yo tano a ma faneleki loko u endzela makaya wahi na wahi ya Bethele. Emhakeni leyi, ku fana ni le ka swiyenge leswin’wana hinkwaswo swa vutomi bya Vukreste, hi navela ku hlayisa mimpimanyeto leyi tlakukeke leyi hambanisaka vanhu va Xikwembu ni misava hi ku endla swilo hinkwaswo leswaku ku dzunisiwa Xikwembu. (Rhom. 12:2; 1 Kor. 10:31) Nakambe i swinene ku vulavula ni swichudeni swa hina swa Bibele ni van’wana lava nga ha endzelaka Bethele ro sungula ni ku va tsundzuxa hi nkoka wa ku ambala ni ku tisasekisa lokunene.

Hikwalaho loko u endzela miako ya Sosayiti, tivutise: ‘Xana swiambalo ni ku tisasekisa ka mina ka xiximeka?’ (Ringanisa Mikiya 6:8.) ‘Xana swi kombisa muxaka wa Xikwembu lexi ndzi xi gandzelaka hi ndlela leyinene? Xana van’wana va ta hambukisiwa ni ku khunguvanyisiwa hi ndlela leyi ndzi langutekaka ha yona? Xana ndzi va vekela xikombiso lexinene lava endzaka ro sungula?’ Onge nkarhi na nkarhi, hi swiambalo ni hi ku tisasekisa ka hina, hi nga “sasekisa dyondzo ya Muponisi wa hina, Xikwembu, eka swilo hinkwaswo.”—Tito 2:10.