Ku Languteka Hi Ndlela Leyi Tengeke Ni Leyi Dzunekaka
1. Loko hi lunghiselela ntsombano wa muganga, ha yini hi fanele hi anakanyisisa hi ndlela leyi hi nga ta languteka ha yona?
1 “Timbhoni ta Yehovha i vanhu va kahle ngopfu! Vanhu va n’wina va ni musa naswona va ambala kahle, ni ku va ni xichavo swinene.” Ku vule muyimeri wa hotela, loko a vulavula hi vamakwerhu lava a va ye entsombanweni wun’wana wa muganga n’wexemu. Entsombanweni wun’wana, mutirhi wa le hotela u te: “Swa tikomba leswaku vanhu va n’wina va ambala hi ndlela leyi tsakisaka Xikwembu.” Ina, lava teke entsombanweni va vonaka hi maambalelo ya vona. Hikwalaho, hi lava ku ambala “hi mukhuva lowu fanelaka mahungu lamanene,” naswona hakanyingi sweswo swi susumetela vanhu leswaku va hi bumabumela naswona swi hi endla hi tikomba leswaku hi vatirheli va Xikwembu. (Filp. 1:27) Loko hi ri karhi hi lunghiselela ntsombano wa muganga, swi fanerile leswaku hi anakanyisisa ka ha ri ni nkarhi hi ndlela leyi hi nga ta languteka ha yona.
2. Ha yini swi tika ku ambala ni ku tisasekisa hi ndlela leyi tengeke?
2 Mudyondzisiwa Yakobo u tsarile: “Vutlhari lebyi humaka ehenhla xo sungula byi tengile.” (Yak. 3:17) Swi nga ha tika ku vonaka hi ri lava tengeke eka ndlela leyi hi ambalaka ha yona. Misava leyo biha ya Sathana yi kucetela vanhu leswaku va tekelela switayele leswi nga fanelangiki swa vudlakuta leswi nyanyulaka rimbewu. (1 Yoh. 2:15-17) Hikwalaho, loko hi hlawula swiambalo ni ndlela leyi hi nga ta tisasekisa ha yona, hi fanele hi yingisa xitsundzuxo xa Bibele xa leswaku hi “hambana ni ku nga xiximi Xikwembu ni ku navela ka misava, ni ku hanya hi mianakanyo yo hluteka . . . exikarhi ka mafambiselo lawa ya swilo ya sweswi.” (Tito 2:12) A hi lavi ku khunguvanyisa van’wana hi ndlela leyi hi langutekaka ha yona, hambi i vamakwerhu kumbe i vanhu van’wana.—1 Kor. 10:32, 33.
3. Hi swihi swivutiso leswi nga ta hi pfuna leswaku hi kambisisa ndlela leyi hi ambalaka ha yona?
3 Swiambalo Leswi Xiximekaka Ni Leswi Langutekaka: Loko u ri karhi u lunghiselela ntsombano, tivutise: ‘Xana swiambalo swa mina swa xiximeka, kumbe swi ndzi kokela mahlo swi nga fanelanga? Xana swi kombisa leswaku ndza yi anakanyela ndlela leyi vanhu van’wana va titwaka ha yona? Xana swiambalo swa mina swi siya swifuva ni makhwiri ehandle? Xana tirhoko ta mina ta vonikela kumbe ta ndzi manya? Xana swiambalo swa mina swi basile naswona a swi na risema? Loko ndzi wisile endzhaku ka ntsombano, xana ndzi ta va ndzi languteka ndzi basile tanihi muchumayeri wa mahungu lamanene, kumbe ndzi ta ambala hi ndlela ya futa, ndzi ambala swiambalo leswi nga langutekiki leswi nga faneliki eka loyi a ambaleke beje ya ntsombano? Xana swiambalo leswi ndzi swi ambalaka endzhaku ka ntsombano swi ta ndzi khomisa tingana lerova ndzi chava ku chumayela hi xitshuketa?’—Rhom. 15:2, 3; 1 Tim. 2:9.
4. Vanhu van’wana va nga hi pfuna njhani leswaku hi languteka hi ndlela leyi tengeke?
4 Hi nga pfuneka loko hi yingisa swiringanyeto swa Vakreste lava vupfeke. Vavasati va fanele va vutisa vanuna va vona leswaku van’wana va ta swi languta njhani swiambalo swa vona. Vatswari lava nga Vakreste va nga pfuna vana va vona va kondlo-a-ndzi-dyi leswaku va ambala kahle. Ku tlula kwalaho, vamakwerhu va xisati lavakulu lava nga ni xichavo va nga “vuyisa mianakanyo ya vaxisati lavatsongo . . . [leswaku] va va lava hlutekeke emianakanyweni, [va va] lavo tenga” hi ndlela leyi va langutekaka ha yona “leswaku rito ra Xikwembu ri nga tseketseriwi.” (Tito 2:3-5) Minkandziyiso ya hina yi na swifaniso leswi hi pfunaka ku vona maambalelo lama xiximekaka.
5. Xana hinkwerhu ka hina hi nga n’wi dzunisa njhani Yehovha hi nkarhi wa ntsombano?
5 Dzunisani Yehovha: Mintsombano ya muganga yi hi nyika nkarhi wa leswaku hinkwerhu hi dzunisa Yehovha, ku nga ri lava yaka exitejini ntsena. Ina, hi ta n’wi dzunisa hi mahanyelo ni hi mavulavulelo ya hina ya Vukreste. Kambe nchumu wo sungula lowu vanhu va wu xiyaka hi hina i maambalelo ni ku tilunghisa ka hina. Onge hinkwerhu hi nga dzunisa Yehovha hi ku languteka hi ndlela leyi tengeke, leyi dzunekaka.—Ps. 148:12, 13.
[Bokisi leri nga eka tluka 6]
Leswi Nga Hi Pfunaka Leswaku Hi Languteka Hi Ndlela Leyi Dzunekaka
◼ Rito ra Xikwembu
◼ Ku tikambisisa
◼ Ku vutisa van’wana leswaku va hi vona hi ri njhani
◼ Minkandziyiso ya Vukreste