Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • wt ndz. 15 matl. 136-143
  • Yingisa Xitsundzuxo U Tlhela U Amukela Ndzayo

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Yingisa Xitsundzuxo U Tlhela U Amukela Ndzayo
  • Gandzela Xikwembu Xi Ri Xin’we Xa Ntiyiso
  • Swihloko
  • Tinhlokomhaka Tin'wana Leti Yelana Na Yona
  • Swikombiso Leswi Hi Faneleke Hi Swi Kambisisa
  • Ku Amukela Xitsundzuxo
  • Timfanelo Ta Nkoka Leti Hi Faneleke Hi Ti Hlakulela
  • U Nga Bakanyi Ndzayo Ya Yehovha
  • Yingisa Loko U Tshinyiwa, U Amukela Ndzayo
    Vun’we Eku Gandzeleni Ka Xikwembu Xi Ri Xin’we Xa Ntiyiso
  • “Yingisa Marito Ya Lavo Tlhariha”
    Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2022
  • Xana Minkarhi Hinkwayo Wa Twisisa?
    Xihondzo xo Rindza Xi Huwelela Mfumo Wa Yehovha—1987
  • Xana Ndzayo Ya Wena Yi “Tsakisa Mbilu”?
    Xihondzo xo Rindza Xi Huwelela Mfumo Wa Yehovha (Lexi Dyondziwaka eVandlheni)—2022
Vona Swo Tala
Gandzela Xikwembu Xi Ri Xin’we Xa Ntiyiso
wt ndz. 15 matl. 136-143

Ndzima Ya Vukhume-ntlhanu

Yingisa Xitsundzuxo U Tlhela U Amukela Ndzayo

1. (a) Hikwalaho ka yini hinkwerhu hi lava xitsundzuxo ni ndzayo? (b) I xivutiso xihi lexi hi faneleke hi xi kambisisa?

EKA Yakobo 3:2, Bibele yi ri “hinkwerhu ha khunguvanyeka minkarhi yo tala.” Hi nga anakanya hi minkarhi yo tala leyi eka yona hi tsandzekeke ku va vanhu lava Rito ra Xikwembu ri hi khutazaka leswaku hi va vona. Kutani ha pfumela leswaku Bibele yi tiyisile loko yi ku: “Yingisa xitsundzuxo u tlhela u amukela ndzayo, leswaku u ta tlhariha eka vumundzuku bya wena.” (Swivuriso 19:20) A swi kanakanisi leswaku se hi yi endlile mindzulamiso evuton’wini bya hina, leswaku hi hanya hi ku pfumelelana ni tidyondzo ta Bibele. Kambe, xana hi angula njhani loko Mukreste-kulorhi a hi nyika xitsundzuxo eka mhaka yo karhi?

2. Hi fanele hi endla yini loko hi nyikiwa xitsundzuxo hi ku kongoma?

2 Van’wana va nga ha ringeta ku titsetselela, va vevukisa mhaka kumbe va sola van’wana. Kambe swa antswa ku amukela xitsundzuxo kutani u xi tirhisa. (Vaheveru 12:11) I ntiyiso, a nga kona munhu la faneleke a langutela leswaku van’wana va hetiseka naswona a nga fanelanga a tshamela ku nyika vanhu xitsundzuxo ni le ka swilo leswi nga nyawuriki kumbe eka timhaka leti Bibele yi ti siyelaka ripfalo ra munhu. Nakambe, swi nga ha endleka leswaku munhu loyi a nyikaka xitsundzuxo a a nga tivi timhaka hinkwato, naswona a nga ha tsundzuxiwa tona hi xichavo. Kambe, emhakeni leyi landzelaka, a hi swi tekeni onge xitsundzuxo ni ndzayo leswi nyikeriweke swi fanerile naswona swi sekeriwe eBibeleni. Xana munhu u fanele a angula njhani?

Swikombiso Leswi Hi Faneleke Hi Swi Kambisisa

3, 4. (a) Xana Bibele yi ni rungula rihi leri nga hi pfunaka leswaku hi va ni langutelo lerinene hi xitsundzuxo ni ndzayo? (b) Xana Hosi Sawulo u angule njhani loko a nyikiwa xitsundzuxo, naswona ku ve ni vuyelo byihi?

3 Rito ra Xikwembu ri ni mintokoto ya vanhu lava amukeleke xitsundzuxo lexi lavekaka. Minkarhi yin’wana, xitsundzuxo a xi fambisana ni ndzayo. Munhu un’wana la xi kumeke a ku ri Hosi Sawulo wa le Israyele. A nga n’wi yingisanga Yehovha mayelana ni tiko ra Amaleke. Vaamaleke va kanete malandza ya Xikwembu, naswona Yehovha a a vule leswaku Vaamaleke swin’we ni swifuwo swa vona a va fanelanga va tshikiwa va hanya. Kambe Hosi Sawulo a nga yi dlayanga hosi ya vona swin’we ni swifuwo vona leswo nona.—1 Samuwele 15:1-11.

4 Yehovha u rhumele muprofeta Samuwele leswaku a ya tshinya Sawulo. Xana Sawulo u angule njhani? U lo konyolola a vula leswaku Vaamaleke u va hlurile, kambe u lo hlawula ku ponisa hosi ntsena. Hambiswiritano, sweswo a swi nga ri swona leswi Yehovha a a lerise swona. (1 Samuwele 15:20) Sawulo u ringete ku titsetselela a vula leswaku vanhu hi vona va nga swi dlayangiki swifuwo sweswo, a ku: “Ndzi chave vanhu, ndzi yingisa rito ra vona.” (1 Samuwele 15:24) U vonake a karhateka swinene hi vito rakwe, lerova a kombela Samuwele leswaku a n’wi katekisa emahlweni ka vanhu. (1 Samuwele 15:30) Eku heteleleni, Yehovha u bakanye Sawulo leswaku a nga ha vi hosi.—1 Samuwele 16:1.

5. Ku humelele yini hi Hosi Uzhiya loko a bakanye xitsundzuxo?

5 Hosi Uzhiya wa le Yuda u ‘endle hi ndlela leyi pfumalaka ku tshembeka eka Yehovha Xikwembu xa yena, a fika etempeleni ya Yehovha ku ta hisa mirhi ya risuna.’ (2 Tikronika 26:16) Kambe hi nawu, a ku ri vaprista ntsena lava a va fanele ku hisa murhi wa risuna. Loko muprista lonkulu a ringeta ku tshikisa Uzhiya, hosi yi hlundzukile. Xana ku humelele yini? Bibele yi ri: “Ku huma nhlokonho emombyeni wakwe . . . hikuva Yehovha a a n’wi bile. Uzhiya lowa hosi a hambeta a va ni nhlokonho ku fikela esikwini ra ku fa kakwe.”—2 Tikronika 26:19-21.

6. (a) Ha yini Sawulo na Uzhiya va ale xitsundzuxo? (b) Hikwalaho ka yini ku ala xitsundzuxo ku ri xiphiqo lexikulu namuntlha?

6 Hikwalaho ka yini Sawulo na Uzhiya va kume swi tika ku amukela xitsundzuxo? Xiphiqo lexikulu a ku ri ku tikukumuxa, hinkwavo ka vona a va titlakusa ku tlula mpimo. Vanhu vo tala va tivangela nhlomulo hikwalaho ka mukhuva lowu. Eka vona, ku amukela ndzayo swi kombisa ku tsana kumbe swi onha ndhuma ya vona. Kasi ku tikukumuxa hi kona ku nga ku tsana. Ku tikukumuxa ku tekela munhu dzano, ku n’wi endla a bakanya mpfuno lowu humaka eka Yehovha hi ku tirhisa Rito rakwe ni nhlengeletano yakwe. Kutani Yehovha wa tsundzuxa: “Ku tinyungubyisa ku le kusuhi ni ku wa, ni moya lowu titlakusaka wu le kusuhi ni ku khunguvanyeka.”—Swivuriso 16:18; Varhoma 12:3.

Ku Amukela Xitsundzuxo

7. Hi swihi swilo swa kahle leswi hi nga swi dyondzaka eka ndlela leyi Muxe a anguleke ha yona loko a nyikiwa xitsundzuxo?

7 Nakambe Matsalwa ma ni swikombiso swa kahle swa vanhu lava amukeleke xitsundzuxo, naswona hi nga dyondza eka vona. Anakanya hi Muxe, loyi mukon’wana wakwe a n’wi nyikeke xitsundzuxo mayelana ni ndlela yo hetisisa vutihlamuleri byakwe byo tika. Muxe u n’wi yingisile kutani a namba a swi endla. (Eksoda 18:13-24) Hambileswi Muxe a a ri ni vulawuri lebyikulu, ha yini a amukele xitsundzuxo? Hikuva a a titsongahata. “Muxe a a rhule ku tlula vanhu hinkwavo lava a va ri ehenhla ka vuandlalo bya misava.” (Tinhlayo 12:3) Xana ku rhula i ka nkoka hi ndlela yihi? Sofaniya 2:3 yi kombisa leswaku ku titsongahata swi vula vutomi bya hina.

8. (a) I swidyoho swihi leswi Davhida a swi endleke? (b) Xana Davhida u angule njhani loko a tshinyiwa hi Natani? (c) Xana byi ve byihi vuyelo bya swidyoho swa Davhida?

8 Hosi Davhida u endle vuoswi na Bati-xeba kutani a ringeta ku banga manyala hi ku endla leswaku nuna wakwe Uriya, a dlawa. Yehovha u rhumele muprofeta Natani leswaku a ya tshinya Davhida. U hundzukile naswona hi ku hatlisa u pfumerile a ku: “Ndzi dyohele Yehovha.” (2 Samuwele 12:13) Hambiloko Xikwembu xi amukele ku hundzuka ka Davhida, a a fanele a tshovela leswi a swi byaleke. Yehovha u n’wi byele leswaku “banga a ri nge suki endlwini ya [yena],” vavasati vakwe a va ta nyiketiwa “munhu-kulo[bye],” naswona n’wana loyi a tswariweke hikwalaho ka vuoswi bya yena a “ta fa.”—2 Samuwele 12:10, 11, 14.

9. I yini lexi hi nga fanelangiki hi xi rivala loko hi nyikiwa xitsundzuxo kumbe ndzayo?

9 Hosi Davhida a a byi tiva vuyelo bya ku yingisa ndzayo leyinene. Nkarhi wun’wana, u khense Xikwembu hi munhu loyi xi n’wi tirhiseke ku n’wi nyika ndzayo. (1 Samuwele 25:32-35) Xana hi fana na yena? Loko ho fana na yena hi ta papalata ku vula ni ku endla swilo leswi nga hi dyisaka mbitsi. Kambe ku vuriwa yini loko hi tikuma hi ri eswiyin’weni leswi lavaka leswaku hi nyikiwa xitsundzuxo kumbe ndzayo? A hi fanelanga hi rivala leswaku lexi i xikombiso xa leswaku Yehovha wa hi rhandza naswona u lava leswaku hi hlayiseka hilaha ku nga heriki.—Swivuriso 3:11, 12; 4:13.

Timfanelo Ta Nkoka Leti Hi Faneleke Hi Ti Hlakulela

10. I mfanelo yihi leyi Yesu a kombiseke leswaku i ya nkoka eka lava nga ta nghena eMfun’weni?

10 Leswaku hi kota ku va ni vuxaka lebyinene na Yehovha ni vamakwerhu lava nga Vakreste, hi fanele hi hlakulela timfanelo to karhi. Yesu u hlamusele yin’wana ya tona loko a veka n’wana exikarhi ka vadyondzisiwa va yena kutani a ku: “Loko mi nga hundzuluki mi kotisa vana lavatsongo, a mi nge ngheni nikatsongo emfun’weni wa matilo. Hikokwalaho, mani na mani la nga ta titsongahata kukotisa n’wana loyi lontsongo hi yena lonkulu eka hinkwavo emfun’weni wa matilo.” (Matewu 18:3, 4) Vadyondzisiwa va Yesu a va fanele va hlakulela ku titsongahata, tanihi leswi a va banana hi rhanga ro hisa mayelana ni leswaku hi wihi lonkulu exikarhi ka vona.—Luka 22:24-27.

11. (a) I vamani lava hi faneleke ku titsongahata eka vona, naswona hikwalaho ka yini? (b) Loko hi titsongahata, xana hi ta angula njhani loko hi nyikiwa ndzayo?

11 Muapostola Petro u tsarile: “Hinkwenu tikhameni hi mianakanyo yo titsongahata un’wana eka un’wana, hikuva Xikwembu xi lwisana ni lava titlakusaka, kambe lava titsongahataka xi va nyika musa lowu nga faneriwiki.” (1 Petro 5:5) Ha swi tiva leswaku hi fanele ku titsongahata eka Xikwembu, kambe ndzimana leyi yi kombisa leswaku hi fanele hi titsongahata ni le ka vapfumeri-kulorhi. Loko hi titsongahata, a hi nge swi bakanyi swiringanyeto leswi van’wana va hi nyikaka swona, kambe hi ta dyondza eka vona.—Swivuriso 12:15.

12. (a) I mfanelo yihi ya nkoka leyi fambisanaka swinene ni ku titsongahata? (b) Hikwalaho ka yini hi fanele hi karhateka hi ndlela leyi mahanyelo ya hina ma khumbaka vanhu van’wana ha yona?

12 Nchumu wun’wana lowu fambisanaka swinene ni ku titsongahata i ku anakanya hi vuhlayiseki bya van’wana. Muapostola Pawulo u tsarile: “Un’wana ni un’wana a a hambete a lava leswaku ku pfuneka un’wana, hayi yena n’wini. . . . Hikokwalaho, hambi mi dya kumbe mi nwa kumbe mi endla yini na yini, endlani hinkwaswo leswaku mi vangamisa Xikwembu. Kendlukelani ku va xikhunguvanyiso eka Vayuda ni le ka Magriki ni le ka vandlha ra Xikwembu.” (1 Vakorinto 10:24-33) Pawulo a a nga vuli swona leswaku hi tshika swilo hinkwaswo leswi hi swi lavaka, kambe u hi khutaze leswaku hi nga endli nchumu lexi nga ta sindzisa munhu un’wana ku endla leswi ripfalo rakwe ri n’wi byelaka leswaku swi hoxile.

13. Hi xihi xikombiso lexi nga ha kombisaka leswaku ha xi tirhisa xitsundzuxo xa Matsalwa?

13 Xana u rhangisa vuhlayiseki bya vanhu van’wana ematshan’weni yo rhangisa swilaveko swa wena? Hinkwerhu hi fanele hi dyondza ku endla tano. Leswi swi nga endliwa hi tindlela to tala. Hi xikombiso, anakanya hi mhaka ya ku ambala ni ku tilunghisa. Leswi swi lava leswaku munhu a tihlawulela leswi a swi rhandzaka kambe a ri karhi a landzela nkongomiso wa Matsalwa malunghana ni ku ringanisela, ku languteka ni ku basa. Kambe loko wo kuma leswaku ndlela leyi u ambalaka ni ku tilunghisa ha yona a yi fambisani ni ndhavuko wa kwalaho naswona yi endla vanhu va kona va nga yingiseli rungula ra Mfumo, xana u ta endla mindzulamiso? Ina, ku pfuna munhu un’wana leswaku a kuma vutomi lebyi nga heriki i swa nkoka swinene ku tlula ku titsakisa.

14. Hikwalaho ka yini swi ri swa nkoka ku hlakulela ku titsongahata ni ku anakanyela van’wana?

14 Yesu u veke xikombiso lexinene emhakeni ya ku titsongahata ni ku anakanyela van’wana, hi ku hlambisa vadyondzisiwa va yena milenge. (Yohane 13:12-15) Rito ra Xikwembu ri vula leswi ha yena: “Hlayisani langutelo leri ra mianakanyo eka n’wina leri a ri ri kona ni le ka Kreste Yesu, loyi, hambileswi a a ri ni xivumbeko xa Xikwembu, a nga ehleketangiki hi ku lwa, ku nga ku lwela ku ringana ni Xikwembu. E-e, kambe u tichulurile kutani a teka xivumbeko xa hlonga, a fana ni vanhu. Ku tlula sweswo, loko a tikuma a ri eka xiyimo lexi fanaka ni xa munhu, u titsongahatile kutani a yingisa ku ya fika eku feni.”—Vafilipiya 2:5-8; Varhoma 15:2, 3.

U Nga Bakanyi Ndzayo Ya Yehovha

15. (a) Xana i ku cinca kwihi loku hi faneleke hi ku endla leswaku vumunhu bya hina byi tsakisa Xikwembu? (b) Yehovha u tirhise yini leswaku hinkwerhu a hi nyika xitsundzuxo ni ndzayo?

15 Tanihi leswi hinkwerhu hi nga vadyohi, ku laveka leswaku hi cinca langutelo ra hina ni ku tikhoma ka hina loko hi lava ku tekelela vumunhu bya Xikwembu xa hina. Hi fanele hi “tiambexa vumunhu lebyintshwa.” (Vakolosa 3:5-14) Xitsundzuxo ni ndzayo swi hi pfuna ku vona lomu hi faneleke ku endla mindzulamiso kona, kutani hi kuma ndlela leyi hi nga swi endlaka ha yona. Xihlovo xa ndzetelo lowu hi wu lavaka i Bibele hi yoxe. (2 Timotiya 3:16, 17) Tibuku ta Bibele ni minhlangano leyi lunghiseleriwaka hi nhlengeletano ya Yehovha swi ta hi pfuna ku tirhisa Rito ra Xikwembu. Hambiloko hi tshame hi xi twa xitsundzuxo xa kona, xana hi ta ringeta ku vona ndlela leyi xi tirhaka ha yona eka hina kutani hi ringeta ku antswisa?

16. I mpfuno wihi lowu Yehovha a wu nyikaka un’wana ni un’wana wa hina?

16 Yehovha wa hi pfuna eka swiphiqo swa hina hikwalaho ka leswi a hi rhandzaka. Timiliyoni ti pfuniwe hi tidyondzo ta le kaya ta Bibele. Vatswari va sirhelela vana va vona eka mahanyelo lama nga va petaka ekhombyeni, hi ku va tsundzuxa ni ku va laya. (Swivuriso 6:20-23) Evandlheni, hakanyingi van’wana va kombela xitsundzuxo ni swiringanyeto eka vatirheli lava nga ni ntokoto leswaku va ta kota ku antswisa ntirho wa vona wa nsimu. Minkarhi yin’wana vakulu va nga ha kombela mpfuno eka vakulu-kulobye kumbe eka van’wana lava nga ni ntokoto. Lava va nga ni timfanelo ta moya va tirhisa Bibele leswaku va pfuna lava va lavaka mpfuno, naswona va swi endla hi moya wo rhula. Loko u nyika xitsundzuxo, tsundzuka ku swi endla ‘u ri karhi u tiveka tihlo, hi ku chava leswaku na wena u nga ringiwa.’ (Vagalatiya 6:1, 2) Ina, hinkwerhu hi lava xitsundzuxo ni ndzayo leswaku hi kota ku gandzela Xikwembu xi ri xin’we hi vun’we.

Mpfuxeto

• Xana Yehovha hi rirhandzu u hi pfuna njhani leswaku hi vona laha hi faneleke hi lulamisa kona?

• Ha yini vo tala swi va tikela ku amukela xitsundzuxo lexi lavekaka, naswona sweswo swi ni khombo rihi?

• I timfanelo tihi ta nkoka leti nga ta hi pfuna leswaku hi amukela ndzayo, naswona Yesu u veke xikombiso xihi eka leswi?

[Xifaniso lexi nga eka tluka 142]

Uzhiya u bakanye xitsundzuxo kutani a biwa hi nhlokonho

[Xifaniso lexi nga eka tluka 142]

Muxe u vuyeriwile hi ku yingisa xitsundzuxo lexi humaka eka Yetro

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela