Xiphemu 7
I Vamani Lava Nga eVukhongerini Bya Ntiyiso?
1. Xana hi fanele hi endla yini loko hi lava ku tsakisa Xikwembu?
LOKO hi lava ku va ni vuxaka lebyinene ni Xikwembu hi fanele hi nga tshineli eka vukhongeri bya mavunwa. Hi fanele hi tihlanganisa ni vukhongeri bya ntiyiso. Namuntlha vanhu va timiliyoni emisaveni hinkwayo va endla sweswo.
2. Timbhoni ta Yehovha ti kumeka kwihi naswona hi wihi ntirho lowu ti wu endlaka?
2 Hilaha Bibele yi vuleke ha kona, vagandzeri va ntiyiso va endla “ntshungu lowukulu” lowu humaka “eka matiko hinkwawo ni tinyimba hinkwato ni vanhu hinkwavo ni tindzimi hinkwato.” (Nhlavutelo 7:9) Ematikweni ya 235, timiliyoni ta Timbhoni ta Yehovha ti pfuna vanhu van’wana leswaku va dyondza tindlela ta Yehovha ta rirhandzu ni swilaveko swa yena.
Ku Vona Vagandzeri Va Ntiyiso
3. Xana Timbhoni ti gandzela mani, naswona hi byihi vugandzeri lebyi ti byi papalataka?
3 Timbhoni ta swi xiya leswaku i Yehovha ntsena loyi a faneriwaka hi ku gandzeriwa. A ti pfumeli ku nkhinsamela swifaniso swa hava kumbe swifaniso swa vukhongeri. (1 Yohane 5:21) A ti hlanganyeli eka mikhuva ya ku xixima vafi hi ku endla mirindzelo kumbe minkhuvo yin’wana leyi fambisanaka ni tidyondzo ta vukhongeri bya mavunwa ‘ni tidyondzo ta madimona.’ (1 Timotiya 4:1) Hambiswiritano, ta va chavelela lava feriweke hi ku va hlamusela xitshembiso xa Xikwembu xa leswaku lava feke va ta pfuxiwa, va pfuxeriwa emisaveni ya paradeyisi.—Yohane 5:28, 29; Mintirho 24:15.
4. Vanhu va Xikwembu va ma languta njhani masalamusi?
4 Timbhoni a ti ma tirhisi masalamusi, vungoma kumbe vuloyi, hikuva ta swi tiva leswaku swilo leswi swi huma eka Diyavulosi. A ti tisirheleli hi ku tirhisa vungoma—ti tshemba Yehovha.—Swivuriso 18:10.
5. Xana Timbhoni ta Yehovha a hi “xiphemu xa misava” hi ndlela yihi?
5 Yesu u vule leswaku vadyondzisiwa va yena a va nge vi “xiphemu xa misava.” (Yohane 17:16) Yesu na yena u arile ku nghenelela etimhakeni ta tipolitiki esikwini rakwe. (Yohane 6:15) Xisweswo, Timbhoni a ti hlanganyeli eka minkwetlembetano ya misava leyi ya swa tipolitiki, vutiko ni ku hlongorisa swikhundlha. Hambiswiritano, ta swi hakela swibalo naswona ta yi yingisa milawu ya tiko leri ti tshamaka eka rona.—Yohane 15:19; Varhoma 13:1, 7.
6. Hi byihi vukongomisi lebyi landzeriwaka hi malandza ya Xikwembu etimhakeni ta vukati naswona ma pfuniwa hi yini leswaku ma papalata ku dlaya vukati?
6 Leswi ti yingisaka nkongomiso wa hulumendhe, Timbhoni ti tsarisa vukati bya tona ximfumo. (Tito 3:1) Ta wu yingisa nkongomiso wa Xikwembu, hi yona mhaka leyi ti papalataka tshengwe. (1 Timotiya 3:2) Ku engetela kwalaho, a swi talanga ku vona vukati bya malandza ya Xikwembu byi fa, hikuva ma tirhisa misinya ya milawu ya Bibele evuton’wini bya wona.
7. Xana Timbhoni ti kombisana njhani leswaku ta rhandzana?
7 Timbhoni ta rhandzana. Rirhandzu leri ti nga na rona swin’we ni ku rhandza ka tona Xikwembu, swi ti endla ti va ni vun’we bya ntiyiso hambileswi ti humaka emigangeni ni le matikweni yo tala. Loko ku humelela timhangu kumbe ku va ni swilaveko swo karhi, Timbhoni a ti hlweli ku pfunana. Timbhoni ti kombisa rirhandzu hi ndlela leyi ti hanyaka ha yona.—Yohane 13:35.
8. Hi yihi mikhuva yo biha leyi vanhu va Xikwembu va yi papalataka?
8 Vanhu va Yehovha va ti karhatela ku hanya hi ku tshembeka ni ku endla leswo lulama. Va papalata ku yiva, ku hemba, mahanyelo yo biha, vundzendzele ni ku nga tshembeki etimhakeni ta mabindzu. Vavanuna a va va himeteli vasati va vona. Van’wana loko va nga si va Timbhoni, a va swi endla swilo leswi, kambe sweswi va swi tshikile hi ku pfuniwa hi Yehovha. Va “hlantswiwile [va] basa” emahlweni ka Xikwembu.—1 Vakorinto 6:9-11.
Vanhu Lava Endlaka Ku Rhandza Ka Xikwembu
9. I yini leswi buku yin’wana yi nga swi vula malunghana ni tikereke ta moya?
9 Ina, vukhongeri byo tala byi vula leswaku byi le ntiyisweni. Byi nga ha boxa mintirho yo karhi leyi xiyekaka leswaku byi seketela marito ya byona. Hi xikombiso, malunghana ni tikereke ta moya ta laha Afrika, buku yin’wana yi ri: “Mintirho ya mungoma kumbe ya n’anga se yi endliwa hi [mintlawa leyintshwa ya Vukreste]. . . . Yi vula leswaku ya swi kota ku endlela vanhu switshungulo ni ku endla masingita. Vaprofeta va kona va vona swivono va tlhela va swi hlamusela. Va tirhisa mati yo kwetsima, mafurha yo kwetsima, minkuma, makhandlhela ni murhi wa risuna leswaku va hanyisa ni ku sivela mavabyi.”
10, 11. Hikwalaho ka yini masingita lama endliwaka namuntlha, ma nga kombisi swona leswaku vukhongeri lebyi ma endlaka byi huma eka Xikwembu?
10 Vanhu lava nghenaka tikereke leti va vula leswaku ku endla masingita swi kombisa leswaku vukhongeri bya vona bya amukeleka eka Xikwembu. Kambe masingita lawa va nge va ma endla a ma kombisi swona leswaku vukhongeri byebyo bya amukelaka eka Yehovha. Sathana u nyika vagandzeri van’wana va mavunwa matimba ya leswaku va endla ‘mintirho ya matimba.’ (2 Vatesalonika 2:9) Ku tlula kwalaho, Bibele yi vula leswaku tinyiko to huma eka Xikwembu, ta ku endla masingita yo tanihi ku profeta, ku vulavula hi tindzimi ni vutivi byo hlawuleka, ti “ta hela.”—1 Vakorinto 13:8.
11 Yesu u tsundzuxile: “A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni. Vo tala va ta ku eka mina hi siku rero, ‘Hosi, Hosi, xana a hi profetanga hi vito ra wena, hi hlongola madimona hi vito ra wena ni ku endla mintirho yo tala ya matimba hi vito ra wena ke?’ Kutani hi nkarhi wolowo ndzi ta va byela ndzi ku: A ndzi kalanga ndzi mi tiva! Sukani eka mina, n’wina vaendli va leswo kala nawu.”—Matewu 7:21-23.
12. I vamani lava nga ta nghena eMfun’weni wa matilo?
12 Kutani ke, i vamani lava nga ta nghena eMfun’weni wa matilo? Hi lava va endlaka ku rhandza ka Yehovha.
Vachumayeri Va Mfumo Wa Xikwembu
13. Hi wihi ntirho lowu Xikwembu xi lavaka leswaku vanhu va xona va wu endla namuntlha, naswona i vamani lava va wu endlaka?
13 Xana Xikwembu xi lava leswaku vanhu va endla yini namuntlha? Yesu u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo.” (Matewu 24:14) Lowu hi wona ntirho lowu Timbhoni ta Yehovha ti wu endlaka hi ku hiseka.
14. Mfumo wa Xikwembu i yini, naswona i vamani lava nga ta fuma eka Mfumo lowu?
14 Timbhoni ta Yehovha “emisaveni hinkwayo leyi akiweke,” ti twarisa Mfumo wa Xikwembu leswaku i hulumendhe ya le tilweni, leyi nga ta fuma misava hinkwayo hi ku lulama. Ti dyondzisa leswaku Yehovha u veke Kreste Yesu leswaku a va Hosi ya Mfumo wolowo, swin’we ni lava va 144 000 lava nga ta fuma na yena, lava hlawuriweke exikarhi ka vanhu va laha misaveni.—Daniyele 7:14, 18; Nhlavutelo 14:1, 4.
15. I yini leswi Mfumo wu nga ta swi herisa?
15 Timbhoni ti tirhisa Bibele ku kombisa vanhu leswaku Mfumo wa Xikwembu wu ta herisa mafambiselo hinkwawo ya Sathana. Vukhongeri bya mavunwa swin’we ni tidyondzo ta byona leti onhaka Xikwembu vito kutani ti vangamisa Diyavulosi, swi ta herisiwa! (Nhlavutelo 18:8) Tihulumendhe hinkwato leti lwisanaka ni Xikwembu na tona ti ta va ti nga ha ri kona!—Daniyele 2:44.
16. I vamani lava nga ta fumiwa hi Kreste Yesu, naswona va ta tshama kwihi?
16 Ku tlhandlekela kwalaho, Timbhoni ta Yehovha ti byela vanhu leswaku Kreste Yesu u ta katekisa vanhu hinkwavo lava endlaka leswi Xikwembu xi swi lavaka. Va ta fumiwa hi yena va ri emisaveni. Bibele ya tshembisa: “Yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta va ni nsovo eka loyi a pfumalaka ni loyi a nga xisiwana, yi ta ponisa moya-xiviri wa swisiwana.”—Pisalema 72:12, 13.
17. I vamani ntsena lava twarisaka Mfumo wa Xikwembu?
17 A wu kona ntlawa wun’wana lowu endlaka ku rhandza ka Xikwembu hi ku chumayela mahungu lamanene ya Mfumo. I Timbhoni ta Yehovha ntsena leti tivisaka Mfumo wa Xikwembu emisaveni hinkwayo.
[Swifaniso leswi nga eka tluka 23]
Timbhoni ta Yehovha ti ni vun’we emisaveni hinkwayo