Xikombiso Lexinene—Hezekiya

Hezekiya a a langutane ni xiyimo xo tika. U ve hosi ya Yuda a ri ni malembe ya 25. Xana a a ta va hosi ya njhani? Xana a a ta landzela xikombiso xo biha xa tata wa yena Hosi Akazi? Tata wakwe u kale a fa a ri mugwinehi. A a gandzela swikwembu swa hava naswona u kale a endla xitlhavelo hi buti wa Hezekiya ealitarini ya swikwembu swa hava. (2 Tikronika 28:1-4) Hambiswiritano, Hezekiya a nga pfumelanga leswaku mahanyelo yo biha ya tata wa yena ma n’wi hlohlotela ku tshika ku gandzela Yehovha nileswaku a titwa a boheka ku endla swihoxo leswi fanaka ni swa tata wakwe. Ku ri na sweswo u ‘namarhele Yehovha.’—2 Tihosi 18:6.

Xana un’wana wa vatswari va wena u hlekula vugandzeri bya Yehovha? Xana u ku khoma hi ndlela yo biha kumbe u ni mahanyelo yo biha? Loko swi ri tano, a wu fanelanga u endla swihoxo leswi fanaka ni swa mutswari wa wena! Hezekiya a nga pfumelanga leswaku vutomi bya yena byi onhiwa hi ku kulela eka ndyangu lowu nga ni mahanyelo yo biha. Entiyisweni, u ve hosi leyinene ngopfu lerova “endzhaku ka yena a ku vanga na munhu la faneke na yena exikarhi ka tihosi hinkwato ta Yuda.” (2 Tihosi 18:5) Na wena swi nga ku fambela kahle evuton’wini ku fana na Hezekiya hambiloko u kulele endyangwini lowu nga riki xikombiso lexinene. U nga swi endla njhani sweswo? Hi ku “namarhela Yehovha.”