Xiyenge 5

Ku Twisisa Timfanelo Ta Xikwembu Leti Nga Pimekiki

MATSALWA yo Kwetsima ma hi byela hi timfanelo to tala ta Xikwembu leti hlamarisaka naswona ma hi pfuna leswaku hi xi tiva. Hi xikombiso, ma hi byela hi timfanelo ta xona letikulu ta mune—matimba, vululami, vutlhari ni rirhandzu. A hi kambisiseni ha yin’we ya tona.

Matimba Lama Nga Pimekiki

Yehovha u byele Abrahama a ku: “Ndzi Xikwembu xa Matimba Hinkwawo.” (Genesa 17:1) Matimba ya xona a ma pimanisiwi na nchumu naswona a ma heli. Xikwembu xi tirhise matimba ya xona leswaku xi tumbuluxa swilo hinkwaswo.

Xikwembu a xi nge pfuki xi ma tirhise hi ndlela yo biha matimba ya xona. Minkarhi hinkwayo xi ma tirhisa hi ndlela leyinene ni leyi nga ni xikongomelo. Matimba ya xona ma fambisana ni vululami bya xona, vutlhari ni rirhandzu.

Yehovha u tirhisa matimba ya yena eka malandza yakwe yo tshembeka. “Mahlo yakwe ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.” (2 Tikronika 16:9) Xana leswi a swi ku endli leswaku u tshinela eka Xikwembu lexi xa matimba ni lexi khathalaka?

Xikwembu Xa Vululami

“Yehovha u rhandza vululami.” (Pisalema 37:28) Minkarhi hinkwayo u endla leswinene hi ku ya hi ndlela yakwe leyi hetisekeke.

Xikwembu xi venga ku kala vululami. I Xikwembu lexi nga “hlawuliki hambi ku ri ku amukela xifumbarheriso.” (Deteronoma 10:17) A xi va lavi vanhu lava tshikilelaka van’wana naswona xa va pfuna lava lavaka mpfuno ku katsa “noni yihi ni yihi kumbe n’wana la nga riki na tatana.” (Eksoda 22:22) Xi languta vanhu hinkwavo hi ndlela leyi fanaka. “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mintirho 10:34, 35.

Vululami bya Yehovha byi hetisekile. A nga debyisi voko naswona a nga na tihanyi. Vanhu lava nga hundzukiki wa va xupula kambe lava hundzukaka u va komba musa. “Yehovha u ni tintswalo ni nsovo, u hlwela ku hlundzuka naswona u ni musa wa rirhandzu wo tala. A nge tshameli ku kuma xihoxo nkarhi hinkwawo, hambi ku ri ku tshama a karihile. A nga hi khomanga hi ku ya hi swidyoho swa hina; naswona a nga hi tiselanga leswi swi hi faneleke hi ku ya hi swihoxo swa hina.” (Pisalema 103:8-10) Nakambe, Xikwembu xa ma tsundzuka xi tlhela xi ma nyika hakelo malandza ya xona yo tshembeka. Xana vululami lebyi bya Xikwembu a byi ku endli u xi tshemba?

Xikwembu Xa Vutlhari

Yehovha i Xihlovo xa vutlhari. “Mawaku ku enta ka rifuwo ni vutlhari ni vutivi bya Xikwembu!” (Varhoma 11:33) Vutlhari bya xona a byi pimeki naswona a byi heli.

Vutlhari bya Xikwembu byi vonaka kahle eka ntumbuluko wa xona. Mupisalema u te: “Mintirho ya wena yi tele swinene, Wena Yehovha! Hinkwayo ka yona u yi endle hi vutlhari.”—Pisalema 104:24.

Nakambe, vutlhari bya Xikwembu byi kumeka eMatsalweni yo Kwetsima. Hosi Davhida u tsale a ku: “Xitsundzuxo xa Yehovha xa tshembeka, xi tlharihisa la nga riki na ntokoto.” (Pisalema 19:7) U nga vuyeriwa eka vutlhari bya Xikwembu lebyi nga pimekiki! Xana swi kona leswi u nga swi endlaka leswaku u vuyeriwa?

“Xikwembu I Rirhandzu”

Mfanelo ya Yehovha leyikulu i rirhandzu. Matsalwa ma hi byela leswaku “Xikwembu i rirhandzu.” (1 Yohane 4:8) Rirhandzu hi rona ri xi susumetelaka ni ku xi kongomisa eka hinkwaswo leswi xi swi endlaka.

Xikwembu xi kombisa rirhandzu ra xona eka hina hi tindlela to tala. Xi hi nyika swilo leswinene. “Xi endle leswinene, xi mi nyika timpfula ta le tilweni ni tinguva ta mihandzu, xi tata timbilu ta n’wina hi ku helela hi swakudya ni ku khana lokukulu.” (Mintirho 14:17) Hakunene, “nyiko yin’wana ni yin’wana leyinene ni nyiko yin’wana ni yin’wana leyi hetisekeke yi huma ehenhla, hikuva yi xika hi le ka Tata wa mavoningo ya le xibakabakeni.” (Yakobo 1:17) Eka nyiko ya risima ku nga Matsalwa, Xikwembu xi hi byela ntiyiso ha xona xi tlhela xi hi dyondzisa milawu ya xona ya rirhandzu. Yesu u khongele a ku: “Rito ra wena i ntiyiso.”—Yohane 17:17.

Xikwembu xi tlhela xi hi pfuna leswaku hi langutana ni swiphiqo swa hina. “Lahlela ndzhwalo wa wena eka Yehovha, u ta ku seketela. A nge pfuki a pfumerile leswaku la lulameke a tsekatseka.” (Pisalema 55:22) U hi rivalela swidyoho swa hina. “Oho Yehovha, u lonene naswona u lunghekele ku rivalela; musa wa rirhandzu wu tele eka hinkwavo lava ku vitanaka.” (Pisalema 86:5) Naswona u hi nyika ni vutomi lebyi nga heriki. ‘U ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.’ (Nhlavutelo 21:4) U nga ri tlangela njhani rirhandzu ra Xikwembu? Xana na wena u ta xi rhandza?

Tshinela Eka Xikwembu

Xikwembu xi lava leswaku u xi tiva kahle. Rito ra xona ra ku khutaza ri ku: ‘Tshinela eka Xikwembu, kutani xi ta tshinela eka wena.’ (Yakobo 4:8) Xikwembu xi vule leswaku Abrahama muprofeta wo tshembeka, i “nakulorhi.” (Esaya 41:8) Yehovha u lava leswaku na wena u va munghana wa yena.

Loko u ya u dyondza swo tala hi Xikwembu, u ta tshinela eka xona naswona u ta tsaka. “Wa tsaka munhu” loyi a ‘tsakelaka nawu wa Yehovha, naswona nawu wakwe u wu hlaya hi rito ra le hansi vusiku ni nhlikanhi.’ (Pisalema 1:1, 2) Hikokwalaho, yana emahlweni u dyondza Matsalwa yo Kwetsima. Anakanyisisa hi timfanelo ta Xikwembu ni mintirho ya xona. Kombisa rirhandzu ra wena eka Xikwembu hi ku tirhisa leswi u swi dyondzaka. “Hikuva ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.” (1 Yohane 5:3) Kutani, khongela ku fana ni mupisalema la nga te: “Oho Yehovha, ndzi tivise tindlela ta wena; ndzi dyondzise mintila ya wena. Ndzi fambise entiyisweni wa wena.” (Pisalema 25:4, 5) U ta kuma leswaku Xikwembu ‘a xi le kule ngopfu ni un’wana ni un’wana wa hina.’—Mintirho 17:27.

U Anakanya Yini?

• Hi tihi timfanelo ta Xikwembu leti u ti rhandzaka ngopfu? Ha yini?

• U nga tshinela njhani eka Xikwembu?

[Xifaniso lexi nga eka tluka 12, 13]

Xikwembu xi ni matimba lamakulu

[Xifaniso lexi nga eka tluka 13]

Xikwembu a xi yi hi nghohe

[Xifaniso lexi nga eka tluka 13]

Loko hi languta ntumbuluko wa Xikwembu hi vona vutlhari bya xona lebyi hlamarisaka

[Xifaniso lexi nga eka tluka 13]

Matsalwa yo Kwetsima ma ni vutlhari bya Xikwembu

[Xifaniso lexi nga eka tluka 14]

Ku khongela ni ku anakanyisisa hi timfanelo ta Xikwembu swi ta ku tshineta eka xona