Xiyenge 6
Hi Xihi Xikongomelo Xa Xikwembu Hi Misava?
XIKWEMBU xi vumbe misava leswaku vanhu va tshama eka yona. Rito ra xona ri ri: “Matilo, i matilo ya Yehovha, kambe misava u yi nyike vana va vanhu.”—Pisalema 115:16.
Loko Xikwembu xi nga si vumba wanuna wo sungula Adamu, xi hlawule ndhawu leyitsongo leyi xi yi vitaneke Edeni kutani xi byala swimila swo saseka eka yona. Matsalwa ma vula leswaku nambu wa Yufrata ni wa Tigri (Hidekele) a yi khuluka yi huma aEdeni.a Ku vuriwa leswaku ntanga wa Edeni wu kumeka endhawini leyi sweswi yi nga evuxeni bya Turkey. I ntiyiso leswaku ntanga wa Edeni a wu ri kona laha misaveni.
Xikwembu xi vumbe Adamu kutani xi n’wi veka entangeni wa Edeni “leswaku a wu rima ni ku wu khathalela.” (Genesa 2:15) Endzhakunyana, Xikwembu xi vumbele Adamu nsati ku nga Evha. Xikwembu xi lerise mpatswa lowu xi ku: “Tswalanani mi andza, mi tata misava, mi yi fuma.” (Genesa 1:28) Xikwembu ‘a xi yi tumbuluxelanga swa hava misava, kambe xi yi vumbele leswaku ku akiwa eka yona.’—Esaya 45:18.
Kambe Adamu na Evha va xandzukele Xikwembu hi ku nga yingisi nawu wa xona hi vomu. Kutani xi va hlongola entangeni wa Edeni. Sweswo swi endle leswaku Paradeyisi yi lahleka. Xidyoho xa Adamu a xi helelanga kwalaho. Matsalwa ma ri: “Tanihi leswi xidyoho xi ngheneke emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.”—Varhoma 5:12.
Xana Xikwembu xi tshike xikongomelo xa xona xa leswaku misava yi va paradeyisi leyi ku tshamaka vanhu lava tsakeke? Doo! Xikwembu xi ri: “Rito ra mina leri humaka enon’wini wa mina . . . a ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.” (Esaya 55:11) Paradeyisi yi ta pfuxetiwa laha misaveni!
Xana vutomi byi ta va njhani eParadeyisini? Anakanya hi switshembiso leswi humaka eMatsalweni leswi kombisiweke eka matluka mambirhi lama landzelaka.
[Nhlamuselo ya le hansi]
a Genesa 2:10-14 yi ri: “A ku ri ni nambu lowu a wu khuluka wu huma aEdeni wu cheleta ntanga, kutani ku suka kwalaho wu avana wu va onge i tinhloko ta mune. Vito ra lowo sungula i Pixoni . . . vito ra nambu wa vumbirhi i Gihoni . . . vito ra nambu wa vunharhu i Hidekele [kumbe Tigri]; hi wona lowu yaka evuxeni bya Asiriya. Nambu wa vumune i Yufrata.” Laha milambu yimbirhi yo sungula yi kumekaka kona a ku tiviwi.
U Nga Hlamula Njhani?
• A xi ri xihi xikongomelo xa Xikwembu hi misava ni hi vanhu?
• Hi swi tiva njhani leswaku Xikwembu xi ta xi hetisisa xikongomelo xexo?
[Bokisi/Swifaniso leswi nga eka tluka 16, 17]
Misava Ya Paradeyisi Leyi Taka
Vafi va ta pfuxiwa: “Hinkwavo lava nga eka masirha-bako ya xitsundzuxo va . . . ta twa rito ra yena kutani va huma.”—Yohane 5:28, 29.
Ku dyuhala, vuvabyi ni rifu a swi nge he vi kona: “Ku hava munhu la tshamaka kona la nga ta ku: ‘Ndza vabya.’” (Esaya 33:24) Xikwembu “xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:4.
Ku ta va ni swakudya swo tala: “Kunene misava yi ta humesa swimila swa yona; Xikwembu, Xikwembu xa hina xi ta hi katekisa.”—Pisalema 67:6.
Ku ta va ni tiyindlu letinene ni mintirho leyi enerisaka: “Kunene va ta aka tindlu va tshama eka tona . . . Ntirho wa mavoko ya vona, vahlawuriwa va mina va ta wu tirhisa hi xitalo.”—Esaya 65:21, 22.
Nyimpi, vugevenga kumbe madzolonga a swi nge hi vi kona: Yehovha “u herisa tinyimpi ku ya fika emakumu ya misava.” (Pisalema 46:9) “Lavo homboloka, va ta dlayiwa emisaveni.”—Swivuriso 2:22.