Xiyenge 8

Mesiya A Humelela

ENDZHAKU ka malembe yo tlula 500 Daniyele a profetile, Gabriyele ntsumi ya Xikwembu u humelele eka nhwana la vuriwaka Mariya loyi a a ri ntukulu wa Hosi Davhida. Gabriyele u te: “Xewani, wena loyi a tsakeriweke swinene, Yehovha u na wena.” (Luka 1:28) Kambe Mariya a a chava. Xana Gabriyele a a lava yini eka Mariya?

Gabriyele u te: “U nga chavi, Mariya, hikuva Xikwembu xi ku tsakerile; kutani waswivo, u ta tika embelekweni wa wena, u ta veleka n’wana wa jaha, vito ra yena u ta n’wi thya Yesu, . . . Yehovha Xikwembu u ta n’wi nyika xiluvelo xa Davhida tata wakwe, naswona . . . mfumo wakwe a wu nge vi na makumu.” (Luka 1:30-33) Lawa a ku ri mahungu lamanene! Mariya a a ta veleka Mesiya, “mbewu” leyi a ku ri khale yi rindziwile.

Yesu u velekiwe eBetlehema endzhaku ka lembe loko Gabriyele a vulavule na Mariya. Hi vusiku byebyo ntsumi yi tivise varisi va kwalaho yi ku: “Maswivo, ndzi mi byela mahungu lamanene ya ntsako lowukulu . . . hikuva namuntlha mi velekeriwe Muponisi, loyi a nga Kreste Hosi, emutini wa Davhida.” (Luka 2:10, 11) Hi ku famba ka nkarhi, ndyangu wa ka va Yesu wu rhurhele eNazareta laha a kuleleke kona.

Hi 29 C.E., ku nga lembe leri Mesiya a a ta humelela ha rona—Yesu u sungule ku va muprofeta wa Xikwembu loko a ri ni “malembe ya kwalomu ka 30 hi vukhale.” (Luka 3:23) Vanhu vo tala va swi xiyile leswaku a a rhumiwe hi Xikwembu. Va te: “Ku vekiwe muprofeta lonkulu exikarhi ka hina.” (Luka 7:16, 17) Kambe, Yesu a a dyondzisa yini?

Yesu u dyondzise vanhu ku rhandza Xikwembu ni ku xi gandzela: U te: “Yehovha Xikwembu xa hina i Yehovha un’we, naswona u fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Marka 12:29, 30) U tlhele a ku: “U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.”—Luka 4:8.

Yesu u khutaze vanhu leswaku va rhandzana: U te: “U fanele u rhandza warikwenu kukota loko u tirhandza.” (Marka 12:31) U tlhele a ku: “Swilo hinkwaswo, leswi mi lavaka vanhu va swi endla eka n’wina, na n’wina mi fanele mi swi endla eka vona; leswi, entiyisweni hi leswi vuriwaka hi Nawu ni Vaprofeta.”—Matewu 7:12.

Yesu u byele van’wana hi Mfumo wa Xikwembu hi ku hiseka: U te: “Ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.” (Luka 4:43) Ha yini Mfumo wa Xikwembu wu ri wa nkoka?

Matsalwa ma dyondzisa leswaku Mfumo wa Xikwembu i hulumendhe ya le matilweni leyi nga ta fuma misava. Yesu la nga Mesiya i Hosi leyi hlawuriweke hi Xikwembu. Muprofeta Daniyele u vone xivono, laha eka xona Xikwembu a xi nyika Mesiya “ku fuma ni xindzhuti ni mfumo” ematilweni. (Daniyele 7:14) Mfumo wolowo wu ta tisa Paradeyisi emisaveni hinkwayo wu tlhela wu nyika malandza ya Xikwembu vutomi lebyi nga heriki. Hakunene wolawo i mahungu yo tsakisa!

U Nga Hlamula Njhani?

• I yini leswi Gabriyele ntsumi ya Xikwembu a swi byeleke Mariya?

• Hi byihi vuprofeta lebyi hetisekeke hi 29 C.E?

• I yini leswi Yesu a a swi dyondzisa?

• Mfumo wa Xikwembu i yini naswona wu ta endla yini?

[Bokisi/Xifaniso lexi nga eka tluka 21]

Xana Yesu A A Ri Mesiya?

Rito leri nge “Mesiya” ni leri nge “Kreste” ma vula “Mutotiwa,” leswi vulaka loyi a hlawuriweke hi Xikwembu. Xikwembu xi nyike Yesu la nga Mesiya vutomi. Xi endle leswaku Mariya a veleka Yesu hi ndlela ya singita handle ko va ni vuxaka bya rimbewu ni tatana la nga munhu.

I yini leswi endleke leswaku vanhu vo tala va pfumela eka Yesu? Hikwalaho ka swivangelo swi nga ri swingani leswi landzelaka:

• Tidyondzo takwe a ti sekeriwe eMatsalweni yo Kwetsima.

• Tidyondzo takwe ni ndlela leyi a a hanya ha yona swi koke vanhu lava a va rhandza ntiyiso ni vululami.

• U endle masingita yo tala hi matimba ya Xikwembu.

• U hetisise vuprofeta byo tala bya le Matsalweni yo Kwetsima.

[Xifaniso lexi nga eka tluka 20, 21]

Gabriyele u byele Mariya leswaku u ta veleka Mesiya