Xiyenge 10
Nala Wa Ripfumelo A Paluxiwa
YEHOVHA Xikwembu u rhange a vumba tintsumi etilweni a nga si vumba misava. Hi ku famba ka nkarhi, ntsumi yin’wana yi sungule ku navela ku gandzeriwa, ku nga leswi a swi fanela Xikwembu ntsena. Hi ku endla tano, u vitaniwe Sathana leswi vulaka “Mukaneti,” ku nga loyi a kanetaka Xikwembu. Xana Sathana u xi kanete njhani Xikwembu?
Sathana u xise Evha leswaku a nga yingisi Xikwembu. Hi vukanganyisi, u vule leswaku Yehovha Xikwembu a a tumbetela Evha leswinene loko a n’wi yirisa ku dya eka murhi wo karhi. U ve ni ntiya-nhlana wo vitana Xikwembu leswaku i muhembi naswona a vula leswaku Evha u fanele a ala ku kongomisiwa hi xona, hi ku vula marito lama nge: “Xikwembu xi tiva leswaku siku mi nga ta dya eka wona, mahlo ya n’wina ma ta pfuleka kutani mi ta fana ni Xikwembu, mi ta tiva leswinene ni leswo biha.” (Genesa 3:5) Hi vuphukuphuku Evha u tshembe mavunwa wolawo ya Sathana. U tlule nawu wa Xikwembu a tlhela a kucetela Adamu ku endla leswi fanaka. Ku sukela kwalaho, Sathana u hundzuke nala eka hinkwavo lava nga ni ripfumelo ra xiviri. U hambete a kanganyisa vanhu ku ta fikela namuntlha. Njhani?
Ku Hangalaka Ka Tidyondzo Ta Mavunwa
Sathana u tirhise swifaniso swa hava ni mindhavuko ya vanhu leswaku a kanganyisa vana va Israyele. Yesu la nga Mesiya, u byele varhangeri va vona leswaku leswi va endlaka “swileriso swa vanhu va swi endla tidyondzo leti nga enawini,” vugandzeri bya vona a byi nga pfuni nchumu. (Matewu 15:9) Xikwembu xi tshike tiko rero hileswi ri aleke Mesiya. Yesu u va byele a ku: “Mfumo wa Xikwembu wu ta tekiwa eka n’wina wu nyikiwa tiko leri humesaka mihandzu ya wona.” (Matewu 21:43) Kutani Xikwembu xi sungule ku tsakela valandzeri va Yesu.
Kutani Sathana u lave ku kanganyisa valandzeri va Yesu. Xana u swi kotile? Yesu u vule leswi a swi ta humelela hi ku tirhisa xifaniso xa vuprofeta. Eka xifaniso xexo, wanuna un’wana u haxe mbewu ya koroni ensin’wini. Endzhaku ka sweswo, nala u haxe mfava exikarhi ka koroni yoleyo. Timbewu leti ti tshikiwe ti kula swin’we kukondza ku fika nkarhi wa ntshovelo. Kutani mfava wu susiwile eka koroni ivi wu hisiwa. Kambe koroni yi hlengeletiwile yi yisiwa eka xitlati xa n’wini wa nsimu.
Kutani, Yesu u hlamusele vadyondzisiwa vakwe leswi xifaniso lexi a xi vula swona. Yena i Muhaxi. U ye emahlweni a ku: “Loko ku ri mbewu leyinene, vona i vana va mfumo; kambe mfava i vana va lowo homboloka, naswona nala loyi a yi haxeke i Diyavulosi. Ntshovelo i makumu ya mafambiselo lawa ya swilo, naswona vatshoveri i tintsumi.” (Matewu 13:38, 39) Yesu u fanise vadyondzisiwa vakwe va ntiyiso ni koroni. Kambe Sathana u haxe vadyondzisiwa va mavunwa lava fanaka ni mfava exikarhi ka valandzeri va ntiyiso va Yesu. Kutani hilaha Yesu a a profete hakona, endzhaku ka malembe-xidzana a file ku humelele vadyondzisiwa va mavunwa. Kutani leswi swi endle leswaku ku va ni tidyondzo ta vugwinehi to tanihi Vunharhu-un’we ku nga vanhu vanharhu eka Xikwembu xin’we. Vadyondzisiwa volavo va mavunwa va sungule ku gandzela swikwembu swa hava ni ku nghenelela eka swa tipolitiki. Lava khomeleleke eka tidyondzo ta Yesu a va nga tati ni xandla.
Lava Va Nga Ni Ripfumelo Ra Xiviri Va Ta Ponisiwa
Hambiswiritano, Yesu u vule leswaku hi ku famba ka nkarhi swilo a swi ta cinca. Tintsumi ta Xikwembu a ti ta tsavula lava nga riki na ripfumelo ra xiviri leswaku va lovisiwa. Kutani lava nga ni ra xiviri a va ta vonaka kahle. Eku heteleleni, Sathana Diyavulosi nala wa ripfumelo ra xiviri, na yena a a ta lovisiwa. Ripfumelo ra xiviri a ri ta hlula!
Kambe u nga va vona njhani vanhu lava nga ni ripfumelo ra xiviri namuntlha? Hi ta tlhuvutsa nhlamulo ya kona eka nhloko-mhaka leyi landzelaka.
U Nga Hlamula Njhani?
• Sathana u huma kwihi?
• Sathana u ringete ku onha ripfumelo hi ndlela yihi?
• Hlamusela xifaniso xa Yesu xa koroni ni mfava.
[Xifaniso lexi nga eka tluka 25]
Sathana u tirhise nyoka ku kanganyisa Evha
[Xifaniso lexi nga eka tluka 25]
Sathana u tirhise swifaniso swa hava ni mindhavuko ya vanhu leswaku a va kanganyisa
[Xifaniso lexi nga eka tluka 25]
Tintsumi ta Xikwembu ti lavana ni vanhu lava tsakelaka ku va ni ripfumelo ra xiviri