I Vamani Lava Yingiseke Ni Lava Nga Yingisangiki Hi Nkarhi Wa Ndhambi Leyikulu?

Vanhu vo tala enkarhini wa Nowa a va endla swilo swo biha. Genesa 6:5

Adamu na Evha va ve ni vana, hiloko vanhu va andza emisaveni. Hi ku famba ka nkarhi, tintsumi tin’wana ti xandzuke na Sathana.

Ti te emisaveni kutani ti tihundzula vanhu leswaku ti ta teka vavasati. Vavasati volavo va veleke vana va majaha lama a ma ri ni matimba yo tlula ya vanhu naswona a ma ri ni tihanyi.

Misava yi tale hi vanhu lava a va endla swilo swo biha. Bibele yi ri: “Vubihi bya vanhu byo ya byi nyanya emisaveni nileswaku a va tshamela ku ehleketa swilo swo biha.”

Nowa u yingise Xikwembu kutani a aka ngalava. Genesa 6:13, 14, 18, 19, 22

Nowa a a ri wanuna wo lulama. Yehovha u n’wi byele leswaku u ta lovisa vanhu vo homboloka hi ndhambi leyikulu.

Xikwembu xi tlhele xi byela Nowa leswaku a aka xikepe lexikulu, lexi vitaniwaka ngalava leswaku a ta nghenisa ndyangu wakwe eka xona ni swiharhi swa mixaka hinkwayo.

Nowa u lemukise vanhu hi Ndhambi leyi a yi ri eku teni kambe a va n’wi yingisanga. Van’wana a va n’wi hleka; van’wana a va n’wi venga.

Loko ngalava yi herile, Nowa u nghenise swiharhi.