Xikombiso Lexinene—Timotiya

Timotiya se a a ta rhurha ekaya ka vona—a a nga balekeli ndyangu wa ka vona kambe a a ta va murhumiwa la tirhisanaka na muapostola Pawulo! Swi nga ha endleka leswaku Timotiya a a ha ku hundza emalembeni ya kondlo-a-ndzi-dyi, kambe se a a ri jaha leri nga ni vutihlamuleri leri a ku “vulavuriwa kahle ha [rona] hi vamakwavo va le Listra ni le Ikoniya.” (Mintirho 16:2) Pawulo a a tiyiseka leswaku Timotiya a a ta hetisisa swilo leswikulu entirhweni wa Xikwembu. Naswona u swi hetisisile! Emalembeni lama landzeleke, Timotiya u teke maendzo yo tala swinene, a simeka mavandlha lamantshwa ni ku tiyisa vamakwerhu. Timfanelo letinene ta Timotiya ti endle leswaku a rhandziwa hi Pawulo, loyi endzhaku ka malembe ya kwalomu ka 11 a byeleke Vafilipiya a ku: “A ndzi na un’wana la nga ni mboyamelo wo fana ni wa yena loyi a nga ta swi khathalela hakunene swilo leswi khumbaka n’wina.”—Vafilipiya 2:20.

Xana u tiendla u kumeka leswaku u ta tirhisiwa entirhweni wa Xikwembu? Loko u endla tano, u ta kuma mikateko yo tala! Hakunene Yehovha u va teka va ri va risima vantshwa lava ‘tinyikelaka hi ku tirhandzela.’ (Pisalema 110:3) Ku tlula kwalaho, u nga tiyiseka leswaku Yehovha Xikwembu ‘a nga pfumali ku lulama lerova a nga rivala ntirho wa wena.’—Vaheveru 6:10.