U Nga Tshinela Njhani Eka Xikwembu?

1. Xana Xikwembu xi yingisa swikhongelo hinkwaswo?

Xikwembu xi rhamba vanhu va matiko hinkwawo leswaku va tshinela eka xona hi xikhongelo. (Pisalema 65:2) Kambe, a xi yingisi kumbe ku amukela swikhongelo hinkwaswo. Hi xikombiso, swikhongelo swa wanuna loyi a xanisaka nsati wakwe swi nga siveriwa. (1 Petro 3:7) Nakambe, loko Vaisrayele va tshamela ku endla swilo swo biha, Xikwembu a xi swi yingisanga swikhongelo swa vona. Swi le rivaleni leswaku ku khongela i lunghelo. Nilokoswiritano, Xikwembu xi yingisa ni swikhongelo swa vanhu lava endleke swidyoho leswikulu, loko va hundzuka.—Hlaya Esaya 1:15; 55:7.

Hlalela vhidiyo leyi nge Xana Xikwembu Xi Yingisa Swikhongelo Hinkwaswo?

2. Hi fanele hi khongerisa ku yini?

Xikhongelo i xiphemu xa vugandzeri bya hina kutani hi fanele hi khongela eka Yehovha Muvumbi wa hina ntsena. (Matewu 4:10; 6:9) Nakambe leswi hi nga hetisekangiki hi fanele hi khongela hi vito ra Yesu hikuva u fele swidyoho swa hina. (Yohane 14:6) Yehovha a nga lavi leswaku hi phindha-phindha swikhongelo leswi nhlokohatiweke kumbe leswi tsariweke. U lava leswaku hi khongela swi huma embilwini.—Hlaya Matewu 6:7; Vafilipiya 4:6, 7.

Muvumbi wa hina u kota ku twa hambi ku ri swikhongelo leswi vuriwaka hi mbilu. (1 Samuwele 1:12, 13) U hi rhamba leswaku hi khongela nkarhi na nkarhi, ku fana ni loko hi pfuka ni loko hi etlela, loko hi lava ku dya ni loko hi ri ni swiphiqo.—Hlaya Pisalema 55:22; Matewu 15:36.

3. Ha yini Vakreste va hlangana swin’we?

Ku tshinela eka Xikwembu a swi olovi hikuva hi hanya ni vanhu lava nga riki na ripfumelo eka Xikwembu, lava sandzaka xitshembiso xa xona xa ku tisa ku rhula emisaveni. (2 Timotiya 3:1, 4; 2 Petro 3:3, 13) Kutani hi fanele hi hlangana ni Vakreste-kulorhi leswaku hi kota ku khutazana.—Hlaya Vaheveru 10:24, 25.

Ku hlangana swin’we ni vanhu lava rhandzaka Xikwembu swi hi pfuna leswaku hi tshinela eka xona. Loko hi va kona eminhlanganweni ya Timbhoni ta Yehovha hi kuma nkarhi wo khutaziwa hi ripfumelo ra van’wana.—Hlaya Varhoma 1:11, 12.

4. U nga tshinela njhani eka Xikwembu?

U nga tshinela eka Yehovha hi ku anakanyisisa hi leswi u swi dyondzeke eRitweni ra yena. Anakanya hi leswi u nga swi dyondzaka eka mintirho ya yena, switsundzuxo ni switshembiso swakwe. Xikhongelo ni ku anakanyisisa swi hi pfuna ku twisisa nkoka wa rirhandzu ni vutlhari bya Xikwembu.—Hlaya Yoxuwa 1:8; Pisalema 1:1-3.

U nga va munghana wa Xikwembu ntsena loko u xi tshemba naswona u ri ni ripfumelo eka xona. Kambe ripfumelo ri fana ni nchumu lowu hanyaka lowu lavaka ku khathaleriwa minkarhi hinkwayo. U fanele u khathalela ripfumelo ra wena minkarhi hinkwayo hi ku anakanyisisa hi leswi u swi pfumelaka.—Hlaya Matewu 4:4; Vaheveru 11:1, 6.

5. Ku tshinela eka Xikwembu swi ta ku vuyerisa njhani?

Yehovha wa va khathalela lava va n’wi rhandzaka. A nga va sirhelela eka nchumu wun’wana ni wun’wana lowu nga dlayaka ripfumelo ni ntshembo wa vona wa vutomi lebyi nga heriki. (Pisalema 91:1, 2, 7-10) U hi lemukisa hi mahanyelo lama nga xungetaka rihanyo ni ntsako wa hina. Yehovha u hi dyondzisa ndlela leyinene yo hanya ha yona.—Hlaya Pisalema 73:27, 28; Yakobo 4:4, 8.