Ntukulu Wa Pawulo A A Nga Chavi

A hi dyondzeni hi jaha leri poniseke vutomi bya malume wa rona. Malume wa jaha rero a ku ri muapostola Pawulo. A hi ri tivi vito ra jaha leri, kambe ha swi tiva leswaku ri endle nchumu wun’wana lowu kombisaka leswaku a ri nga chavi. Xana u nga tsakela ku twa leswi ri swi endleke?—

Pawulo a a pfaleriwe ejele eYerusalema. A a pfaleriwe hikwalaho ko chumayela hi Yesu. Vavanuna van’wana vo biha lava a va venga Pawulo, va endle kungu ro biha. Va te: ‘A hi kombeleni murhangeri wa masocha leswaku a ma byela ma yisa Pawulo ehubyeni. Hi ta tumbela endleleni kutani loko a hundza hi ta n’wi dlaya!’

Ntukulu wa Pawulo u twe hi ta kungu leri. Xana a a ta endla yini? U ye ejele kutani a byela Pawulo hi mhaka leyi. Xikan’we-kan’we, Pawulo u n’wi byele leswaku u fanele a byela mukongomisi wa masocha hi kungu leri ro biha. Xana u ehleketa leswaku ntukulu wa Pawulo a swi n’wi olovela ku vulavula ni mukongomisi?— Doo, hikuva mukongomisi a ku ri muchaviseki. Kambe ntukulu wa Pawulo a a nga chavi kutani u vulavule ni mukongomisi.

Mukongomisi a a swi tiva kahle leswi a faneleke a swi endla. U hlele masocha ya kwalomu ka 500 leswaku ma sirhelela Pawulo! U ma byele leswaku ma teka Pawulo vusiku byebyo ma n’wi yisa eKhezariya. Xana Pawulo u ponile?— Ina, vavanuna volavo vo biha a va n’wi hlaselanga! Kungu ra vona ro biha a ri tirhanga.

Xana u nga dyondza yini emhakeni leyi?— Na wena u nga va loyi a nga chaviki ku fana ni ntukulu wa Pawulo. Hi fanele hi nga chavi loko hi vulavula ni van’wana hi Yehovha. Xana u nge chavi kutani u ya emahlweni u vulavula hi Yehovha?— Loko u endla tano, u nga ha ponisa vutomi bya un’wana.