Timotiya A A Lava Ku Pfuna Vanhu

Timotiya a ku ri jaha leri a ri tsakela ku pfuna vanhu. U fambe tindhawu to tala a pfuna vanhu. Hikwalaho ka sweswo, a a hanya vutomi byo tsakisa. Xana u nga tsakela ku twa ha byona?—

Timotiya u kulele emutini lowu vuriwaka Listra. Loko a ha ri n’wana, kokwa wakwe Luwisa ni mana wakwe Yunisi va sungule ku n’wi dyondzisa hi Yehovha. Loko Timotiya a ri karhi a kula, a a lava ku pfuna vanhu ku dyondza hi Yehovha.

Loko Timotiya a ha ri jaha, Pawulo u n’wi kombele leswaku a famba na yena va ya chumayela etindhawini tin’wana. Timotiya u te: ‘Swi lulamile!’ A a lunghekele ku famba a ya pfuna van’wana.

Timotiya u fambe na Pawulo va ya emutini wa Makedoniya lowu vuriwaka Tesalonika. Leswaku va kota ku fika kwalaho, a va fanele va famba nkarhi wo leha hi milenge ni hi xikepe. Loko va fikile, va pfune vanhu vo tala ku dyondza hi Yehovha. Kambe vanhu van’wana a va nga va tsakeli naswona va ringete ku va vavisa. Kutani Pawulo na Timotiya va boheke ku famba va ya chumayela etindhawini tin’wana.

Loko ku hundze tin’hwetinyana, Pawulo u kombele Timotiya ku tlhelela eTesalonika a ya pfuxela vamakwerhu. A swi lava a nga chavi ku tlhelela emutini wolowo lowu chavisaka! Kambe Timotiya u tlhelerile hikuva a a karhateka hi vamakwerhu va kwalaho. U tlhelele eka Pawulo a ri ni mahungu lamanene. A swa ha va fambela kahle vamakwerhu va le Tesalonika!

Timotiya u tirhe na Pawulo ku ringana malembe yo tala. Pawulo u tshame a tsala leswaku Timotiya a a ri munhu loyi a fanelekaka loyi a nga n’wi rhumaka leswaku a pfuna mavandlha. Timotiya a a rhandza Yehovha swin’we ni vanhu.

Xana wa va rhandza vanhu ni ku lava ku va pfuna leswaku va dyondza hi Yehovha?— Loko u va rhandza, u nga hanya vutomi lebyi tsakisaka ku fana na Timotiya!