Ndlela Yo Lulamisa Swiphiqo

Loko wena ni nkataku mi sungula ku tshama swin’we, mi ta va ni swiphiqo swo hambana-hambana. Swi nga ha va swi vangiwa hi leswi mi nga anakanyiki hi ndlela leyi fanaka, mi nga titwiki hi ndlela leyi fanaka ni leswi mi endlaka swilo hi ndlela leyi nga faniki hikwalaho ka ndlela leyi mi kurisiweke ha yona. Kumbe swi nga ha va swi vangiwa hi vanhu van’wana kumbe swilo swin’wana ni hi swiendlakalo leswi nga languteriwangiki.

Hi nga ha titwa hi navela ku papalata ku langutana ni swiphiqo, kambe Bibele yi hi khutaza leswaku hi langutana ni swiphiqo swa hina. (Matewu 5:23, 24) U ta kuma tindlela letinene to lulamisa swiphiqo swa wena loko u tirhisa milawu leyi kongomisaka ya le Bibeleni.

1 BULANI HI XIPHIQO XA KONA

LESWI BIBELE YI SWI VULAKA: ‘Ku ni nkarhi wa ku vulavula.’ (Eklesiasta 3:1, 7) Tiyisekani leswaku mi tinyika nkarhi wo vulavula hi xiphiqo xa kona. Byela nkataku hi ku tshembeka ndlela leyi u titwaka ha yona ni leswi u swi ehleketaka hi mhaka yoleyo. Minkarhi hinkwayo ‘vulavula ntiyiso’ ni nkataku. (Vaefesa 4:25) Hambiloko mi hlundzukile, papalatani moya wo lava ku lwa. Nhlamulo yo rhula yi sivela timholovo.—Swivuriso 15:4; 26:20.

Hambiloko mi nga voni swilo hi tihlo rin’we, vanani ni musa, naswona mi nga rivali ku kombisana rirhandzu ni xichavo. (Vakolosa 4:6) Ringetani ku lulamisa xiphiqo hi ku hatlisa naswona mi nga tshiki ku vulavurisana.—Vaefesa 4:26.

LESWI U NGA SWI ENDLAKA:

• Vekani nkarhi lowu mi nga ta bula hi xiphiqo lexi nga kona

• Loko ku ri nkarhi wa wena wo yingisela, papalata ku nghena nkataku enon’wini. U ta wu kuma nkarhi wo vulavula

2 YINGISELA U TLHELA U TWISISA

LESWI BIBELE YI SWI VULAKA: “Mi va ni xinakulobye lexikulu . . . Vanani lavo rhanga eku xiximaneni.” (Varhoma 12:10) Ndlela leyi u yingiselaka ha yona i ya nkoka swinene. Ringeta ku twisisa vonelo ra nkataku u tlhela u n’wi ‘ntwela-vusiwana ni ku titsongahata.’ (1 Petro 3:8; Yakobo 1:19) U nga tiendli onge wa n’wi yingisela kasi a wu yingiselanga. Loko swi koteka, tshika leswi u swi endlaka kutani u n’wi yingisela kahle, kumbe u n’wi kombela leswaku mi bula hi mhaka yoleyo hi nkarhi wun’wana. Loko u teka nkataku tanihi munghana wa wena ku nga ri nala wa wena, a wu nge “hatliseli ku hlundzukisiwa emoyeni wa wena.”—Eklesiasta 7:9.

LESWI U NGA SWI ENDLAKA:

• Yana emahlweni u n’wi yingisela handle ko n’wi xopaxopa, hambiloko leswi a swi vulaka swi nga ku tsakisi

• Twisisa mongo wa leswi a swi vulaka. Xiya ndlela leyi a tshukatshukisaka miri wa yena ha yona ni mpfumawulo wa rito ra yena

3 ENDLANI LESWI MI TWANANEKE HA SWONA

LESWI BIBELE YI SWI VULAKA: “Ku ni vuyelo lebyinene eka ku tikarhata ka muxaka wun’wana ni wun’wana, kambe rito ra milomu ntsena ri helela eku pfumaleni.” (Swivuriso 14:23) Ku pfumelelana hi mhaka yo karhi a swi enelanga. Mi fanele mi endla leswi mi twananeke ha swona. Leswi swi nga ha lava leswaku mi tirha hi matimba ni ku endla matshalatshala, kambe swi ta va ni vuyelo lebyinene. (Swivuriso 10:4) Loko mi tirhisana, mi ta kuma “hakelo leyinene” ya ntirho wa n’wina wa matimba.—Eklesiasta 4:9.

LESWI U NGA SWI ENDLAKA:

• Hlelani leswaku ha un’we wa n’wina u ta endla yini leswaku mi lulamisa xiphiqo xa n’wina

• Nkarhi na nkarhi kambisisani nhluvuko lowu mi wu endleke