Matewu A Vitaniwa

Endzhaku ka loko a horise wanuna la omeke swirho, Yesu u tshame nkarhinyana eKapernawume ekusuhi ni Lwandle ra Galeliya. Nakambe ntshungu wu te eka yena, hiloko a sungula ku wu dyondzisa. Loko a ri karhi a famba u vone Matewu, loyi a vuriwaka Levhi a tshame ehofisini ya xibalo. Hiloko Yesu a n’wi rhamba a ku: “Vana mulandzeri wa mina.”—Matewu 9:9.

Swi vonaka onge Matewu se a a tolovelane ni tidyondzo ni mitirho leyi Yesu a yi endleke endhawini yoleyo, ku fana na Petro, Andriya, Yakobo na Yohane. Hilaha va endleke ha kona, Matewu na yena a nga kanakananga. Matewu u hlamusele mhaka leyi eka Evhangeli ya yena a ku: ‘Hiloko [Matewu] a suka a yima a landzela Yesu.’ (Matewu 9:9) Kutani Matewu u tshike ntirho wakwe wo hakerisa xibalo a ya va mudyondzisiwa wa Yesu.

Kumbexana leswaku Matewu a kombisa ku tlangela hikwalaho ka leswi Yesu a n’wi viteke, endzhaku ka nkarhi u endle nkhuvo lowukulu endlwini yakwe. I vamani lava a va rhambiwile enkhubyeni lowu, ku engetela eka Yesu ni vadyondzisiwa vakwe? A ku ri ni vanghana va Matewu va khale ni van’wana lava a va tirha ku hakerisa xibalo. A va hakerisa xibalo xa mfumo wa Rhoma lowu a va wu venga, ku katsa ni swibalo swa swikepe leswi a swi ta ehlalukweni, swa vanhu lava fambaka va ri mitlawa ku katsa ni swibalo swa nhundzu leyi humaka ematikweni man’wana. Hi ntolovelo Vayuda a va va teka njhani vanhu volavo lava hakerisaka xibalo? Vanhu a va va venga hikuva a va dyelela vanhu hi ku va hakerisa mali yo tala ya xibalo ku tlula leyi faneleke ku hakeriwa. Nakambe a ku ri ni vadyohi enkhubyeni lowu, lava a va dume hi ku endla swilo swo biha.—Luka 7:37-39.

Loko Vafarisi lava tiendlaka va n’wavunene, lava a va ri kwalaho va vona Yesu a ri karhi a dya ni vanhu vo tano va vutise vadyondzisiwa vakwe va ku: “Hikwalaho ka yini mudyondzisi wa n’wina a dya ni valuvisi ni vadyohi?” (Matewu 9:11) Yesu u va twile kutani u va hlamule a ku: “Vanhu lava hanyeke kahle a va lavi dokodela, kambe u laviwa hi lava vabyaka. Kutani, fambani mi ya dyondza nhlamuselo ya marito lawa: ‘Ndzi lava tintswalo, ku nga ri gandzelo.’ Hikuva ndzi tele ku ta vitana vadyohi, ku nga ri vanhu lava lulameke.” (Matewu 9:12, 13; Hosiya 6:6) Loko Vafarisi va vula leswaku Yesu i “mudyondzisi” a swi nga humi embilwini kambe va nga dyondza swo karhi eka yena loko swi ta emhakeni ya leswo lulama.

A swi kanakanisi leswaku Matewu a rhambe vahakerisi va xibalo ni vadyohi leswaku va ta yingisela Yesu kutani va va ni vuxaka ni Xikwembu “hikuva vo tala va vona a va sungule ku n’wi landzela.” (Marka 2:15) Yesu a a lava ku va pfuna leswaku va va ni vuxaka lebyinene ni Xikwembu. Yesu a a nga va vengi vanhu vo tano, a a hambanile ni Vafarisi lava a va tiendla va n’wavunene. A a susumetiwa hi ntwelavusiwana ni tintswalo. A a pfuna vanhu hinkwavo lava lavaka ku va ni vuxaka ni Xikwembu.

Yesu a a ri ni tintswalo eka vahakerisi va xibalo ni vadyohi, ku nga ri ku pfumelela swidyoho leswi a va swi endla kambe a va twela vusiwana hilaha a a endla hakona eka vanhu lava vabyaka. Hi xikombiso, tsundzuka nkarhi lowu a kombiseke ntwelavusiwana eka munhu loyi a ri ni nhlokonho hi ku n’wi khumba kutani a ku: “Ndza swi lava! Basisiwa.” (Matewu 8:3) Xana na hina a hi fanelanga hi va ni tintswalo ni ku pfuna lava pfumalaka, ngopfungopfu leswaku va va ni vuxaka ni Xikwembu?