I Yini Lexi Pfumeleriwaka Hi Savata?

Hi Savata yin’wana Yesu u ye esinagogeni, kumbexana eGaleliya. Kwalaho u kume wanuna la khwanyaleke voko. (Luka 6:6) Vatsari ni Vafarisi a va honolele Yesu. Hikwalahokayini? Va paluxe xikungu xa vona loko va vutisa Yesu va ku: “Xana swa pfumeleriwa ku hanyisa munhu hi Savata?”—Matewu 12:10.

Varhangeri va vukhongeri bya Vayuda va pfumela leswaku ku hanyisa swa pfumeleriwa hi Savata loko ntsena vutomi byi ri ekhombyeni. Hi xikombiso, hi Savata a swi nga pfumeleriwi ku boha rhambu ri ololoka kumbe ku bandicha munhu la sulekeke nenge, hikuva a swi veki vutomi bya munhu ekhombyeni. Swi le rivaleni leswaku vatsari ni va Vafarisi va vutisa Yesu swivutiso ku nga ri hi leswi va twelaka vusiwana wanuna loyi a nga le ku xanisekeni. Kambe a va ringeta ku phasa Yesu hi marito.

Hambiswiritano, Yesu a a swi tiva leswi va swi ehleketaka. U xiye leswaku a va ri ni langutelo leri hundzeletiweke, leri nga fambisaniki ni matsalwa leri a ri lwisana ni ku endla mitirho hi Savata. (Eksoda 20:8-10) A a nga sunguli ku sandziwa hikwalaho ka mitirho leyinene leyi a yi endla. Kutani Yesu u sungule njhekanjhekisano lowukulu hi ku byela wanuna la khwanyaleke voko a ku: “Tana u ta yima laha xikarhi.”—Marka 3:3.

Kutani Yesu u hundzuluke a languta vatsari ni Vafarisi a ku eka vona: “I mani eka n’wina loyi loko nyimpfu yakwe leyi nga yoxe yo wela emugodini hi Savata, a nga ta ka a nga yi humesi?” (Matewu 12:11) Tanihileswi nyimpfu yi nghenisaka mali yo tala, a va nga ta yi siya emugodini kutani va yi landza hi siku leri landzelaka hikuva yi nga ha fa naswona sweswo a swi ta endla leswaku va lahlekeriwa. Handle ka sweswo, Matsalwa ma ri: “Lowo lulama wa swi hlayisa swifuwo swakwe.”—Swivuriso 12:10.

Leswaku a kombisa ku fana loku, u ye emahlweni a ku: “Xana munhu a hi wa nkoka swinene ku tlula nyimpfu? Kutani swa pfumeleriwa ku endla nchumu lowunene hi Savata.” (Matewu 12:12) Hikwalaho, Yesu a ta va a nga tluli nawu wa Savata hi ku horisa wanuna. Varhangeri va vukhongeri va hlulekile ku kaneta mhaka leyi, leyi twisisekaka ni leyi kombisaka ntwelavusiwana. Va lo vhela va ku whii!

Leswi a a karihile ni ku karhatiwa hileswi a va tiomisa nhloko, Yesu u langute ematlhelo. Kutani a ku eka wanuna: “Ololoxa voko ra wena.” (Matewu 12:13) Loko wanuna yoloye a tshambuluta voko, xisweswo ri hola. Wanuna yoloye a a nga tikoti hi ku tsaka kambe xana lava a va lava ku phasa Yesu swi va khome njhani?

Ematshan’weni ya leswaku Vafarisi va tsaka hileswi voko ra wanuna ri horisiweke, va hume hi xihatla va ya n’wi bohela kungu “ni ntlawa lowu seketelaka Heroda, leswaku va ta n’wi dlaya.” (Marka 3:6) Swi vonaka ntlawa lowu wa politiki wu katse ni swirho swa ntlawa wa vukhongeri lebyi vuriwaka Vasaduki. Hi ntolovelo Vasaduki ni Vafarisi a va nga okelani ndzilo kambe sweswi se va yima swin’we leswaku va kaneta Yesu.