U Tshovela Koroni Hi Savata

Yesu ni vadyondzisiwa vakwe se a va kongoma en’walungwini ekusuhi na Galeliya. A ku ri ximun’wana naswona le masin’wini a ku ri ni koroni etinhlangeni. Leswi xivambalana se a xi buba, vadyondzisiwa va tshove koroni va dya. Kambe a a ku ri siku ra Savata naswona Vafarisi a va ri karhi va va vona.

Tsundzuka leswaku a hi khale Vayuda van’wana eYerusalema a va lava ku dlaya Yesu, va n’wi lumbeta leswaku u tlula nawu wa Savata. Kutani sweswi Vafarisi a va n’wi lumbeta hikwalaho ka swiendlo swa vadyondzisiwa vakwe. “Languta! Vadyondzisiwa va wena va endla swilo leswi nawu wu nga pfumeliki leswaku swi endliwa hi Savata.”—Matewu 12:2.

Vafarisi a va vula leswaku ku tshova koroni kumbe ku yi khoma hi voko leswaku u yi dya a a ku ri ku tshovela kumbe ku hula. (Eksoda 34:21) Swinawanawana swa vona swa siku ra Savata a swi tika, kasi a ri endleriwe ku va siku ro tsakisa ni ku tiyisa vuxaka ni Xikwembu. Yesu u lulamise langutelo ra vona leri hoxeke hi ku tirhisa swikombiso, ku kombisa leswaku Yehovha Xikwembu a a nga lavi leswaku nawu wakwe wa siku ra Savata wu tirhisiwa hi ndlela leyi.

Xin’wana xa swikombiso leswi Yesu a swi tirhiseke i xa Davhida ni vavanuna vakwe. Loko va khomiwe hi ndlala va nghene etabernakeleni va dya swinkwa swa swifanekiselo. Swinkwa sweswo leswi se a swi susiwile emahlweni ka Yehovha kutani swi siviwa hi leswintshwa, se a swi vekeriwe muprista leswaku a swi dya. Hambiswiritano, eka xiyimo lexi Davhida ni vavanuna vakwe a va xupuriwanga hi leswi va swi dyeke.—Levhitika 24:5-9; 1 Samuwele 21:1-6.

Eka xikombiso xakwe xa vumbirhi Yesu u te: “Xana a mi hlayanga eNawini leswaku hi Tisavata vaprista va tirha etempeleni hi Savata kambe va nga vi na nandzu?” Yesu a a vula leswaku hambi hi siku ra Savata, vaprista a va dlaya swifuwo tanihi magandzelo ni ku endla mitirho yin’wana etempeleni. Yesu u te: “Kambe ndza mi byela leswaku laha mi nga kona ku ni munhu wa nkoka swinene ku tlula tempele”—Matewu 12:5, 6; Tinhlayo 28:9.

Nakambe Yesu a a tirhisa matsalwa leswaku a ta yi basisa kahle mhaka leyi, u te: “Loko a mi yi twisise kahle nhlamuselo ya tsalwa leri nge, ‘Ndzi lava tintswalo, ku nga ri gandzelo,’ a mi ta va mi nga va gwevanga lava nga riki na nandzu.” U gimete hi ku vula a ku: “Hikuva N’wana wa munhu i Hosi ya Savata.” Yesu a vulavula hi nkarhi lowu a nga ta Fuma malembe ya gidi hi ku rhula.—Matewu 12:7, 8; Hosiya 6:6.

I khale Sathana a xanisa vanhu tanihi mahlonga, a tirhisa madzolonga ni tinyimpi. Kambe a swi nge vi tano hi Savata leyikulu laha ku nga ta va ku fuma Kreste, laha a nga ta hi nyika nkarhi wo wisa lowu hi wu lavaka ni lowu hi wu languteleke!