Dyondzo Hi Ku Rivalela

Vanhu va angula hi ndlela leyi hambaneke eka leswi Yesu a swi vulaka ni ku swi endla hi ku ya hi ndlela leyi va titwaka hayona. Sweswo swi vonaka kahle endlwini yin’wana eGaleliya. Mufarisi loyi a vuriwaka Simoni u rhamba Yesu eswakudyeni, kumbexana leswaku a ta n’wi vonela ekusuhi hileswi a endlaka masingita yo hlamarisa. Swi nga endleka leswaku Yesu u amukele xirhambo xexo leswaku a kota ku chumayela lava nga kwalaho, hilaha a endleke hakona loko a amukela xirhambo xa ku dya ni valuvisi ni vadyohi.

Hambiswiritano, Yesu a nga khomiwanga hi ndlela leyi vaendzi hi ntolovelo va khomiwaka hayona. Leswi ePalestina a ku ri ni magondzo lama nga ni ritshuri, lava nga ambala maphaxana, mikondzo ya vona a yi va yi hisa yi tlhela yi thyaka kutani a ku ri xiendlo lexi tolovelekeke xo kombisa malwandla ku hlambisa mikondzo ya vaendzi hi mati yo titimela. Sweswo a swi endliwanga eka Yesu. Hambi ku ri ku ntswontswiwa a nga ntswontswiwanga hambileswi sweswo a swi tolovelekile. Swin’wana leswi a swi tolovelekile a ku ri ku kombisa tintswalo ni malwandla eka muendzi hi ku tota misisi yakwe hi mafurha. Kambe na leswi Yesu u lo swi komba hi rintiho. Kahlekahle, xana Yesu hakunene a amukeriwile?

Hiloko ku sungula ku dyiwa ni vaendzi lava a va tshame etafuleni. Loko va ri karhi va dya, ku nghena wansati loyi a nga rhambiwangiki. Wansati loyi, “a a tiviwa emutini leswaku i mudyohi.” (Luka 7:37) Hambileswi vanhu hinkwavo va nga vadyohi, wansati loyi a a tikhoma ku biha hi swa masangu naswona swi nga endleka a a ri nghwavava. Kumbexana u twe hi tidyondzo ta Yesu leti katsaka ni xirhambo eka ‘hinkwavo lava tikeriwaka leswaku va ta phyuphyisiwa.’ (Matewu 11:28, 29) Swi tikomba onge u khumbiwe hi marito ni hi swiendlo swa Yesu naswona sweswi u n’wi kumile.

U ta hi le ndzhaku ka Yesu etafuleni a fika a khinsama emilengeni yakwe. Hiloko mihloti yakwe yi xiririkela emilengeni ya Yesu kutani a yi sula hi misisi yakwe. Kutani a tswontswa milenge yakwe ivi a n’wi tota mafurha yo nun’hwela lawa a teke na wona. Loko Simoni a vona leswi, a swi n’wi tsakisanga hiloko a ku: “Loko wanuna loyi a a ri muprofeta hakunene, a a ta swi tiva leswaku i wansati wa muxaka muni loyi a n’wi khumbaka. A a ta swi tiva leswaku i mudyohi.”—Luka 7:39.

Loko Yesu a vona ndlela leyi Simoni a a ehleketa hayona, u ri: “Simoni, ku ni leswi ndzi lavaka ku ku byela swona.” Yena a ku: “Mudyondzisi, ndzi byele!” Kutani Yesu a ya emahlweni a ku: “A ku ri ni vavanuna vambirhi lava a va kolota munhu loyi a lombisaka mali; un’we a a kolota tidenari ta 500, loyi un’wana a a kolota ta 50. Havambirhi a va swi kotanga ku n’wi hakela, kutani mulombisi a sula swikweleti swa vona. Hikwalaho, i mani exikarhi ka vona loyi a nga ta n’wi rhandza ngopfu?” Hiloko Simoni a n’wi hlamula a ku: “Ndzi ehleketa leswaku hi loyi a a n’wi kolota mali yo tala.”—Luka 7:40-43.

Yesu u pfumelelana na yena. Hiloko a langutisa wansati kutani a ku eka Simoni: “Xana wa n’wi vona wansati loyi? Loko ndzi nghena endlwini ya wena; a wu ndzi nyikanga mati yo hlamba milenge. Kambe wansati loyi u tsakamise milenge ya mina hi mihloti yakwe a yi sula hi misisi yakwe. A wu ndzi tswontswanga, kambe wansati loyi u tswontswe milenge ya mina ku sukela loko ndzi nghene endlwini ya wena. A wu ndzi chelanga mafurha enhlokweni, kambe wansati loyi u chele milenge ya mina hi mafurha yo nun’hwela.” Yesu a a swi vona leswaku wansati loyi u hundzuke hi mbilu hinkwayo eka swiendlo swakwe swa ku tikhoma hi ndlela yo biha hi swa masangu. Kutani u gimete hi ku vula a ku: “Ndza ku byela, swidyoho swa yena swi rivaleriwile hambileswi swi nga tala, hikuva u kombise rirhandzu lerikulu. Kambe loyi a rivaleriwaka leswitsongo, u rhandza katsongo.”—Luka 7:44-47.

Yesu a nga yi seketeli mhaka ya ku tikhoma ko biha. Ku ri na sweswo, u kombisa ntwelavusiwana eka vanhu lava endleke swidyoho leswikulu ivi endzhaku va kombisa leswaku va ti sola ni ku tlhelela eka Kreste leswaku va ta kuma mpfuno. Anakanya ndlela leyi wansati loyi a titweke hayona loko Yesu a ku: “Swidyoho swa wena swi rivaleriwile. . . . Ripfumelo ra wena ri ku ponisile; famba hi ku rhula.”—Luka 7:48, 50.