Vutomi Ni Vutirheli Bya Yesu

Dyondzo Ya Ntwelo-Vusiwana

YESU a nga ha va a ha ri eNayini, laha sweswinyana a pfuxeke n’wana wa noni, kumbexana u endzela muti lowu nga kusuhinyana. Mufarisi la vitaniwaka Simoni u lava ku xiyisisa munhu la endlaka mintirho yo tano yo hlamarisa. Kutani u rhamba Yesu leswaku a ta dya swakudya na yena.

Hi ku teka xiendlo xexo tanihi nkarhi wo tirhela lava nga kona, Yesu u amukela xirhambo, tanihi laha a swi amukeleke ha kona swirhambo swo dya ni valuvisi ni vadyohi. Kambe, loko a nghena endlwini ya Simoni, Yesu a nga amukeli maxewetelo lama hakanyingi ma nyikiwaka vaendzi.

Minkondzo leyi nga ni timphaxana yi twa ku hisa ni ku thyaka hikwalaho ka ku famba emagondzweni lama nga ni ritshuri ya Galeliya, naswona i xiendlo lexi tolovelekeke xa malwandla ku hlantswa milenge ya vaendzi hi mati yo titimela. Kambe minkondzo ya Yesu a yi hlantswiwi loko a fika. Naswona a nga amukeriwi hi ku ntswontswiwa, lowu nga mukhuva lowunene lowu amukelekaka. Naswona mafurha lama tolovelekeke ya malwandla a nga ma nyikiwi ku tota misisi yakwe.

Hi nkarhi wa swakudya, loko vaendzi va tshame etafuleni, wansati un’wana la nga rhambiwangiki u nghena endlwini hi ku ngungumela. U tiveka emutini a ri la hanyaka vutomi bya vunghwavava. Kahle-kahle u twile ku dyondzisa ka Yesu, ku katsa ni xirhambo xakwe xa ‘hinkwavo lava tikeriwaka, a ta va wisisa.’ Naswona hi ku susumetiwa swinene hi leswi a swi voneke ni ku swi twa, sweswi u lavalava Yesu.

Wansati u ta endzhaku ka Yesu etafuleni ivi a nkhinsama emilengeni yakwe. Loko mihloti yakwe yi ri karhi yi wela eminkondzweni yakwe, u yi sula hi misisi ya yena. Nakambe u teka mafurha yo nun’hwela exibyeni xakwe, naswona loko a ri karhi a ntswontswa minkondzo ya yena hi rirhandzu, a yi chela hi mafurha. Simoni u languta a ri karhi a sola. “Loko munhu loyi a ri muprofeta,” ku vula yena, “a a ta va a tivile leswaku nsati loyi a n’wi khumbaka i mani, leswaku i munhu muni, hikuva i mudyohi.”

Hi ku tiva mianakanyo yakwe, Yesu a ku: “Simoni, ndzi ni rito eka wena.”

“Vulavula, Mudyondzisi,” ku hlamula yena.

Yesu a ku: “A ku ri ni vanhu vambirhi lava a va ri ni nandzu eka munhu wa mabindzu. Un’wana a a ri ni nandzu wa macheleni ya 500, un’wana ya 50. Leswi a va pfumala xo riha ha xona, munhu loyi a va rivalela hi vumbirhi bya vona. Xana hi wihi exikarhi ka vona loyi a nga ta n’wi rhandza ngopfu ke?”

“Ndza tshemba,” ku vula Simoni, kumbexana a ri eku hlamaleni hi mhaka ya xivutiso lexi vonakaka xi nga fanelanga, “hi loyi a nga rivaleriwa leswo tala.”

“U vula swona,” ku vula Yesu. Kutani a hundzuluka a languta wansati, a ku ka Simoni: “Nsati loyi, wa n’wi vona ke? Ndzi nghene endlwini ya wena, a wu ndzi hanga mati ndzi hlamba milenge; kambe yena ú tsakamisile milenge ya mina hi mihloti, a tlhela a yi sula hi misisi ya yena. A wu ndzi ntswontswanga; kambe loyi, hi mpfhuka ndzi nghena la, a nga tshikanga ku ndzi ntswontswa milenge. A wu ndzi totanga mafurha enhlokweni; kambe loyi ú totile milenge ya mina hi mafurha layo nun’hwela.”

Wansati xisweswo u nyike vumbhoni bya ku hundzuka ka mbilu hinkwayo eka vunghwavava bya yena bya nkarhi lowu hundzeke. Kutani Yesu wa dlayelela: “Hikwalaho ndzi ri, swidyoho swa yena leswo tala swi rivaleriwile, hikuva ú rhandzile ngopfu; kambe loyi a rivaleriwaka leswintsongo, ú rhandza kutsongo.”

Yesu a nga rivaleri kumbe ku sasekisa vunghwavava. Kambe, xiendlakalo lexi xi komba ku twisisa kakwe ka ntwelo-vusiwana ka vanhu lava endlaka swihoxo evuton’wini kambe lava kutani va kombisaka leswaku va tisola hikwalaho ka swona ivi va ta eka Yesu leswaku va ntshunxeka. Loko a nyika wansati ku wisa ka ntiyiso, Yesu u ri: “Swidyoho swa wena swi rivaleriwile. . . . Ku pfumela ka wena ku ku ponisile, famba hi ku rhula.” Luka 7:36-50; Matewu 11:28-30.

◆ Xana Yesu u amukeriwa njhani hi Simoni n’wini wa muti?

◆ I mani la lavalavaka Yesu, naswona ha yini?

◆ I xifaniso xihi lexi Yesu a xi nyikelaka, naswona u xi tirhisa njhani?