Yesu A Miyeta Xidzedze Elwandle

Yesu u karhele swinene endzhaku ko tirha dyambu hinkwaro. Loko se ri pela, u byela vadyondzisiwa vakwe a ku: “A hi tluleleni eribuweni lerin’wana ra lwandle,” ku nga ku tlula ku suka eribuweni ra Kapernawume.—Marka 4:35.

Evuxeni bya ribuwa ra Lwandle ra Galeliya, ku ni tiko ra Vagerasa. Ndhawu leyi yi tlhela yi tiveka tanihi Dekapolisi. Hambileswi ku nga ni Vayuda vo tala lava tshamaka kwalaho, miti ya Dekapolisi yi tele hi ndhavuko wa Xigriki.

Vanhu va n’wi vona Yesu loko a suka eKapernawume. Ku ni swikepe swin’wana leswi sungulaka ku tsemakanya lwandle. (Marka 4:36) Entiyisweni, a ku nga ri kule ngopfu. Lwandle ra Galeliya ri fana ni tiva lerikulu ra mati lama nga riki na munyu, ri lehe 21 wa tikhilomitara ri tlhela ri anama 12 wa tikhilomitara. Nilokoswiritano, ri entile.

Hambileswi Yesu a nga riki na xidyoho, swa twisiseka leswi a karhaleke endzhaku ko endla ntirho wakwe wo chumayela. Kutani endzhaku ka loko va tlutile, u ye emakumu ka xikepe a fika a etlela ehenhla ka xikhigelo ivi a khomiwa hi vurhongo.

Vaapostola vo hlayanyana va swi kota ku tluta xikepe kambe leri a ri nga ta va riendzo ro olova. Ndhawu leyi va nga eka yona yi rhendzeriwe hi tintshava naswona mati ya lwandle ra Galeliya mikarhi yo tala ma kufumela. Mikarhi yin’wana moya wo titimela etintshaveni wu hungela ehansi wu ya hlangana ni mati yo kufumela, kutani sweswo swi vanga xidzedze xa matimba elwandle. Sweswo hi swona swi nga eku endlekeni sweswi. Hi ku hatlisa, magandlati ma ba xikepe. Hiloko xi sungula “ku tala mati xi lava ni ku mbombomela.” (Luka 8:23) Nilokoswiritano, Yesu wa ha etlele.

Vatluti va tirha hi matimba leswaku va lawula xikepe eka xidzedze xolexo, hilaha a va tolovele ku endla hakona loko va langutane ni swidzedze. Kambe sweswi va tsandzeka. Leswi va nga chuha, va ya va ya pfuxa Yesu kutani va ku: “Hosi, hi ponise, ha lova!” (Matewu 8:25) Vadyondzisiwa se a va chava leswaku va ta nwela.

Loko Yesu a pfuka, u vutisa vaapostola a ku: “Hikwalaho ka yini mi chava, n’wina va ripfumelo leritsongo?” (Matewu 8:26) Kutani Yesu u lerisa moya ni lwandle a ku: “Miyela, u ku whii!” (Marka 4:39) Hiloko moya wu yima naswona lwandle ri va leri rhuleke. (Marka na Luka va vulavula hi xiendlakalo lexi xo tsakisa, xo sungula va vulavula hi singita ra Yesu ro miyeta xidzedze, kutani endzhaku va vulavula hi vadyondzisiwa lava a va kayivela ripfumelo.)

Ehleketa ndlela leyi vadyondzisiwa va titweke hayona hi xiendlakalo lexi. Va ha ku heta ku vona lwandle leri a ri karihile ri va leri rhuleke hi ku helela. Sweswo swi endle leswaku va sungula ku chava. Hiloko va sungula ku byelana va ku: “Kahlekahle i mani munhu loyi? Hambi ku ri moya ni lwandle swa n’wi yingisa.” Hiloko va fika etlhelo lerin’wana ra lwandle va hlayisekile. (Marka 4:41–5:1) Kumbexana swikepe leswi va sukeke na swona swi swi kotile ku tlhelela ehlalukweni ra le vupeladyambu.

Hakunene swa chavelela ku tiva leswaku N’wana wa Xikwembu u ni matimba yo lawula maxelo! Loko se a ta va a fuma misava hi nkarhi wa Mfumo wakwe, vanhu hinkwavo va ta va lava hlayisekeke hikuva ku ta va ku nga ha ri na timhangu leti chavisaka ta ntumbuluko.