Vutomi Ni Vutirheli Bya Yesu

Ku Miyeta Xidzedze Lexi Chavisaka

SIKU ra Yesu ri tatiwe hi ntirho, ri katsa ku dyondzisa mintshungu ehlalukweni kutani endzhaku ka sweswo a hlamusela swifaniso exihundleni eka vadyondzisiwa va yena. Loko ri pela, u ri: “A hi peleleni entsungeni.”

Entsungeni eribuweni ra le vuxeni ra Lwandle ra Galeliya ku na tiko leri vitaniwaka Dekapolisi, leri humaka eka deʹka ya Xigriki, leri vulaka “khume,” na poʹlis, leri vulaka “muti.” Miti ya Dekapolisi i ntsindza wa ndhavuko wa Magriki, hambi leswi swi nga kanakanisiki leswaku yi tlhela yi va kaya ra Vayuda vo tala. Hambi swi ri tano, ntirho wa Yesu etikweni leri, i wuntsongo ngopfu. Hambi ku ri erendzweni leri, hi laha hi nga ta vona ha kona endzhaku, u siveriwa ku tshama nkarhi wo leha.

Loko Yesu a kombela leswaku va ya eribuweni rin’wana, vadyondzisiwa va khandziya na yena ebyatsweni. Hambi swi ri tano, ku suka ka vona ku xiyiwile. Hi ku hatlisa van’wana va khandziya mabyatso ya vona leswaku va famba na vona. A hi le kule ngopfu. Kahle-kahle, Lwandle ra Galeliya i tiva lerikulu ra kwalomu ka 21 wa tikhilomitara hi ku leha ni kwalomu ka 12 wa tikhilomitara hi ku anama.

Yesu u karhele swinene. Kutani, hi ku hatlisa endzhaku ka ku suka ka vona, u etlela ehansi endzhaku ka byatso, a veka nhloko ya yena exikhigelweni, ivi a etlela vurhongo. Vo tala va vaapostola i vatluti lava nga ni ntokoto lava phaseke tinhlampfi ngopfu eLwandle ra Galeliya. Kutani va langutela ku fambisiwa ka byatso.

Kambe leri a ri nga ta va riendzo ro olova. Hikwalaho ka mahiselo lama kufumelaka evuandlalweni bya tiva lebyi nga kwalomu ka 210 wa timitara ehansi ka vuandlalo bya lwandle ni moya wo titimela etintshaveni ta le kusuhi, minkarhi yin’wana mimoya ya matimba yi hungela ehansi ivi yi vumba xidzedze xa xitshuketa xa vukari etiveni. Leswi hi swona leswi manuku swi humelelaka. Hi ku hatlisa magandlati ya banana ni byatso ivi ya khapela endzeni ka rona, lerova ri le kusuhi ni ku khukhuriwa. Kambe, Yesu u hambeta a etlela!

Vatluti lava nga ni ntokoto va tirha hi ku chava leswaku va kongomisa byatso. A swi kanakanisi leswaku va tshame va hlangana ni swidzedze. Kambe enkarhini lowu va heleriwe hi mano. Hi ku tsetselela vutomi bya vona, va pfuxa Yesu. Va ku ka yena: ‘Mudyondzisi, a wu na mhaka xana? Ha mbombomela! Hi ponise hi ta mbombomela!’

Loko a pfuka, Yesu u tshinya mheho ni lwandle a ku: ‘Miyela, u ku ntse!’ Kutani moya lowu hungaka wu yima ivi lwandle ri miyela. Loko a hundzulukela eka vadyondzisiwa va yena, wa vutisa a ku: ‘Ha yini mi ri matoya? A mi si va ni ku pfumela xana?’

Enkarhini wolowo, ku chava loku nga tolovelekangiki ku tela vadyondzisiwa. Va vutisana va ku: ‘Xana munhu loyi i munhu muni, leswi mheho ni lwandle swi n’wi yingisaka ke?’

Mayana matimba lawa Yesu a ma kombisaka! Swi tlhela swi hi tiyisekisa swonghasi ku tiva leswaku Hosi ya hina yi na matimba ehenhla ka swilo swa ntumbuluko ni leswaku loko nyingiso wa yena hinkwawo wu kongomisiwe emisaveni ya hina enkarhini wa vulawuri bya Mfumo wa yena, hinkwerhu hi ta tshama hi ku hlayiseka eka makhombo lama chavisaka ya ntumbuluko!

Nkarhi wun’wana endzhaku ka loko xidzedze xi miyerile, Yesu ni vadyondzisiwa va yena va fika eribuweni ra le vuxeni va hlayisekile. Kumbexana mabyatso laman’wana ma hlayisiwile eka matimba ya xidzedze ivi ma tlhelela ekaya ma hlayisekile. Marka 4:35–5:2; Matewu 8:18, 23-28; Luka 8:22-27.

◆ Dekapolisi i yini xana, naswona yi le kwihi?

◆ I swivumbeko swihi leswi xiyekaka leswi tihlamulelaka hikwalaho ka swidzedze swa vukari eLwandle ra Galeliya?

◆ Loko vutshila bya vona bya ku tluta byi tsandzeka ku va ponisa, vadyondzisiwa va endla yini xana?

[Xifaniso lexi tataka tluka hinkwaro lexi nga eka tluka 8]