Munhu A Dlayiwa Enkhubyeni Wa Siku Ra Ku Velekiwa

Loko vaapostola va Yesu va ri karhi va endla ntirho wa vona wo chumayela eGaleliya, munhu loyi a huweleleke hi ta ku ta ka Yesu, u le khotsweni. Se swi endla malembe mambirhi Yohane Mukhuvuri a ri ekhotsweni.

Yohane u swi vule erivaleni leswaku a swi hoxile ku va Hosi Heroda Antipasi a teke Herodiya nsati wa makwavo Filipi, a va nsati wakwe. Heroda u tshike nsati wakwe wo sungula leswaku a ta teka Herodiya. Hi ku ya hi Nawu wa Muxe lowu Heroda a vulaka leswaku wa wu landzela, vukati lebyi i bya vuoswi naswona a byi le nawini. Loko a angula xisolo xa Yohane, Heroda u endle leswaku Yohane a hoxiwa ekhotsweni kumbexana hi ku hlohloteriwa hi Herodiya.

Heroda a nga swi tivi leswaku u ta endla yini hi Yohane hikuva vanhu va “n’wi teka a ri muprofeta.” (Matewu 14:5) Hambiswiritano, Herodiya a nga kanakani. U n’wi “khome hi mbilu” naswona u ya emahlweni a lava ndlela ya leswaku a dlayiwa. (Marka 6:19) Eku heteleleni, u pfulekeriwa hi nkarhi.

Emahlweninyana ka Paseka ya 32 C.E., Heroda u lunghiselela nkhuvo lowukulu wa siku ra ku velekiwa kakwe. Tindhuna hinkwato leti tlakukeke ta Heroda ni tindhuna ta masocha, swin’we ni vaakatiko lava tivekaka va Galeliya, va hlengeletana enkhubyeni. Hi nkarhi wa nkhuvo lowu, Salome n’wana wa nhwanyana wa Herodiya ni khale ka nuna wakwe Filipi, wa tisiwa leswaku a ta cinela vapfhumba. Vavanuna va tsakisiwa hi ku cina kakwe.

Leswi a tsakisiweke hi n’wana wakwe, Heroda u n’wi byela a ku: “Kombela xin’wana ni xin’wana lexi u xi lavaka, ndzi ta ku nyika xona.” U tlhela a hlambanya hi ku vula a ku: “Xin’wana ni xin’wana lexi u nga ta xi kombela, ndzi ta ku nyika xona, hambi hafu ya mfumo wa mina.” Loko a nga si hlamula, Salome u ya eka mana wakwe ivi a n’wi vutisa a ku: “Xana ndzi nga kombela yini?”—Marka 6:22-24.

Lowu hi wona nkarhi lowu Herodiya a a wu lava! U hlamula hi ku hatlisa a ku: “Nhloko ya Yohane Mukhuvuri.” Hi ku hatlisa, Salome u tlhelela eka Heroda ni xikombelo xakwe ivi a ku: “Ndzi lava u ndzi nyika nhloko ya Yohane Mukhuvuri yi ri enkambaneni sweswi.”—Marka 6:24, 25.

Leswi swi heta Heroda matimba kambe vapfhumba vakwe va n’wi twile loko a hlambanyela Salome. Swi n’wi khomisa tingana ku ala ku n’wi nyika swona hambiloko leswi swi vula ku dlayiwa ka munhu loyi a nga riki na nandzu. Hikwalaho, Heroda u rhuma murindzi ekhotsweni a ri ni swileriso. Swi nga siya kwihi, murindzi u vuya ni nhloko ya Yohane yi ri enkambaneni. U yi nyika Salome ivi a yi yisa eka mana wakwe.

Loko vadyondzisiwa va Yohane va twa leswi endlekeke, va ta va ta teka ntsumbu wakwe va ya wu lahla. Endzhaku va vikela Yesu mhaka leyi.

Endzhakunyana, Heroda wa pfilunganyeka loko a twa ndlela leyi Yesu a horisaka vanhu ni ku hlongola madimona hayona. U tivutisa loko Yesu loyi a endlaka swilo leswi, ku nga ri Yohane Mukhuvuri loyi sweswi a ‘pfuxiweke eku feni.’ (Luka 9:7) Hikwalaho, Heroda Antipasi u swi navela hi mbilu hinkwayo ku vona Yesu. A nga endleli ku vona Yesu loko a chumayela. Kambe u lava ku vona Yesu leswaku a tiyiseka loko leswi swi n’wi karhataka swi ri ntiyiso kumbe swi ri mavunwa.