Vutomi Ni Vutirheli Bya Yesu

Ku Dlaya eNkarhini Wa Nkhuvo Wa Siku Ra Ku Velekiwa

ENDZHAKU ka ku nyika swileriso eka vaapostola vakwe, Yesu u va rhuma emutini hi vambirhi-mbirhi. Kumbexana vamakwavo Petro na Andriya va fambe kun’we, hi laha Yakobo na Yohane, Filipi na Bartolomi, Tomasi na Matewu, Yakobo na Tadiya, na Simoni na Yudasi Iskariyota va endleke ha kona. Mintlawa ya tsevu ya vachumayeri yi twarisa mahungu lamanene ya Mfumo ni ku endla mahlori yo hanyisa hinkwako laha yi yaka kona.

Manuku, Yohane Mukhuvuri wa ha ri ekhotsweni. Se i malembe mambirhi a ri kwalaho. U nga tsundzuka leswaku Yohane u vule erivaleni leswaku a swi hoxile eka Heroda Antipas ku teka Herodiya, nsati wa Filipi makwavo, tanihi nsati wa yena. Tanihi leswi Heroda Antipas a a vula leswaku u landzela Nawu wa Muxe, Yohane hi laha ku fanelaka u paluxe ntwanano lowu wa vuoswi. Hi yona mhaka leyi Heroda a endleke leswaku Yohane a nghenisiwa ekhotsweni, kumbexana hi ku hlohloteriwa hi Herodiya.

Heroda Antipas u xiya leswaku Yohane i munhu wo lulama kutani wa n’wi yingisa hi ntsako. Kutani wa kanakana leswaku u ta endla yini hi yena. Herodiya, hi tlhelo rin’wana, u venga Yohane naswona nkarhi na nkarhi u lava leswaku a dlawa. Eku heteleleni, nkarhi lowu a a wu rindzerile wa fika.

Hi ku hatlisa emahlweni ka Paseka ya 32 C.E., Heroda u lunghiselela nkhuvo lowukulu wa siku ra ku velekiwa ka yena. Lava hlengeletaneke enkhubyeni i tihosana ni tindhuna hinkwato ta nyimpi ya yena, kun’we ni vakulukumba va Galeliya. Loko byi sikula, Salome, n’wana wa Herodiya wa xisati la n’wi kumeke ni khale ka nuna wa yena Filipi, u rhumiwa ku ya cinela vapfhumba. Vahlaleri va xinuna va tsakisiwa hi macinelo yakwe, lawa handle ko kanakana ya tsakisaka swinene.

Heroda u tsakisiwile swinene hi Salome. U ri: “Kombela leswi u swi rhandzaka eka mina, ndzi ta ku nyika swona.” U tlhela a hlambanya: “Leswi u nga ta swi kombela eka mina, ndzi ta ku nyika swona, hambi ku ri ku ku avanyisela hi le xikarhi tiko leri ndzi ri fumaka.”

A nga si hlamula, Salome u ya a ya vutisa mana wa yena. “Ndzi ta kombela yini xana?” wa vutisa.

Mawaku nkarhi lowunene eku heteleleni! “Nhloko ya Yohane Mukhuvuri,” Herodiya u hlamula handle ko kanakana.

Hi ku anghwetla Salome u tlhelela eka Heroda ivi a kombela: “Ndzi lava leswaku u ndzi nyika nhloko ya Yohane Mukhuvuri enkambaneni, sweswi-sweswi.”

Heroda u khomiwa hi tingana swinene. Kambe hikwalaho ka leswi vapfhumba vakwe va tweke ku hlambanya kakwe, u khomiwa hi tingana ku n’wi alela, hambi loko leswi swi vula ku dlaya munhu lonene. Mulanguteri u rhumiwa hi ku anghwetla ekhotsweni ni swileriso swo chavisa. Hi ku hatlisa u vuya ni nhloko ya Yohane enkambaneni, kutani a yi nyika Salome. Na yena, u yi yisa eka mana wa yena. Loko vadyondzisiwa va Yohane va twa leswi humeleleke, va ta ivi va ta teka ntsumbu wakwe kutani va ya wu lahla, ivi va ya vika mhaka eka Yesu.

Endzhakunyana, loko Heroda a twa ku hanyisa ka Yesu vanhu ni ku hlongola mademona, u le ku chaveni, u chava leswaku Yesu i Yohane loyi a pfuxiweke eku feni. Endzhaku ka sweswo, u navela swinene ku vona Yesu, hayi ku twa ku chumayela ka yena, kambe ku tiyiseka loko ku chava kakwe ku sekeriwe kahle kumbe e-e. Matewu 10:1-5; 11:1; 14:1-12; Marka 6:14-29; Luka 9:7-9.

◆ Ha yini Yohane a ri ekhotsweni, naswona hikwalaho ka yini Heroda a nga lavi leswaku a dlawa?

◆ Xana eku heteleleni Herodiya u kota ku endla leswaku Yohane a dlayiwa hi ndlela yihi?

◆ Endzhaku ka rifu ra Yohane, ha yini Heroda a lava ku vona Yesu?

[Xifaniso lexi tataka tluka hinkwaro lexi nga eka tluka 9]