A Phamela Vanhu Va Magidi Hi Swinkwa Ni Tihlampfi Tintsongo

Vaapostola va 12 va tiphinile hi ku ya chumayela eGaleliya naswona va byela Yesu “swilo hinkwaswo leswi va swi endleke ni ku swi dyondzisa.” Swa twisiseka leswi va nga karhala. Hambi ku ri nkarhi wo dya ava na wona hikuva vanhu vo tala va nghena kasi van’wana va huma. Kutani Yesu u ri: “Tanani, a hi yeni endhawini leyi nga riki na vanhu, leswaku mi ta ya wisanyana.”—Marka 6:30, 31.

Va khandziya xikepe kumbexana ekusuhi na Kapernawume kutani va ya endhawini leyi nga evuxeni bya Nambu wa Yordani hi le Betsayida. Hambiswiritano, vanhu vo tala va va vona loko va suka kasi van’wana va lo swi twa kunene leswaku va fambile. Hinkwavo va te milenge yimbirhi va tsutsumela ehlalukweni naswona loko xikepe xi fika na vona se a va fikile.

Loko Yesu a chika exikepeni, u vona ntshungu kutani a wu twela vusiwana hikuva wu fana ni tinyimpfu leti nga riki na murisi. Hiloko a sungula “ku wu dyondzisa swilo swo tala” hi Mfumo. (Marka 6:34) U tlhela a hanyisa “lava vabyaka.” (Luka 9:11) Loko nkarhi wu ri karhi wu famba, vadyondzisiwa vakwe va n’wi byela leswi: “Hi le kule ni miti naswona se ri perile; byela mintshungu leyi leswaku yi ya eswimitanini yi ya tixavela swakudya.”—Matewu 14:15.

Hiloko Yesu a hlamula a ku: “Va nga fambi; n’wina va nyikeni swakudya.” (Matewu 14:16) Hambileswi Yesu a tivaka leswi a nga ta swi endla, u vutisa Filipi a ku: “Hi nga va xavela kwihi xinkwa vanhu lava leswaku va ta dya?” Leswi Filipi a humaka ekusuhi ni le Betsayida, hi yena a faneleke a vutisiwa. Kambe ku xava xinkwa swi nge pfuni nchumu hikuva ku ni vavanuna va kwalomu ka 5 000. Swi nga endleka nhlayo yi tele swinene loko ku hlayiwa vavasati ni vana. Filipi u hlamula a ku: “Hambiloko ho xava swinkwa hi tidenari ta 200 [denari yi ringana ni muholo wa siku] a swi nge va ringani.”—Yohane 6:5-7.

Loko a kombisa ndlela leyi kumbexana swi nga ta tika hayona ku va phamela hinkwavo, Andriya u ri: “Hi loyi mufana loyi a nga ni swinkwa swa maxalana swa ntlhanu ni tihlampfi timbirhi letitsongo. Kambe swi nga endla yini eka vanhu vo tarisa xileswi?”—Yohane 6:9.

I ximun’wana, Paseka ya 32 C.E. a yi si fika naswona byanyi bya rihlaza byi funengete ntshava. Yesu ni vadyondzisiwa vakwe va byela vanhu leswaku va tshama ebyanyini hi mitlawa ya 50 ni ya 100. Hiloko a teka swinkwa swa ntlhanu ni tihlampfi timbirhi kutani a khongela eka Xikwembu. Endzhaku ka sweswo, a phema swinkwa ivi a ava tihlampfi. Yesu u nyika vadyondzisiwa vakwe swakudya leswi leswaku va swi nyika vanhu. Lexi tsakisaka, vanhu hinkwavo va dya va xurha!

Endzhakunyana, Yesu u byela vadyondzisiwa vakwe a ku: “Hlengeletani leswi saleke leswaku ku nga tlangisiwi nchumu.” (Yohane 6:12) Hiloko va hlengeleta swakudya leswi saleke ivi va tata tibasikiti ta 12!