Vutomi Ni Vutirheli Bya Yesu

Yesu U Phamela Magidi Hi Hlori

VAAPOSTOLA va 12 va tsakele pfhumba leri xiyekaka ro chumayela eGaleliya hinkwaro. Manuku, hi ku hatlisa endzhaku ka ku dlayiwa ka Yohane, va tlhelela eka Yesu ivi va n’wi rungulela mintokoto ya vona leyi hlamarisaka. Loko a vona leswaku va karhele ni leswaku vanhu vo tala ngopfu va ta ni ku famba lerova va pfumala nkarhi wa ku dya, Yesu u ri: ‘Tanani hi ya tshama hi ri hexe laha ku nga mananga, mi ta kota ku wisanyana.’

Loko va khandziya byatso ra vona, kumbexana ekusuhi na Kapernawume, va kongoma ndhawu leyi nga handle ka ndlela, entiyisweni evuxeni bya Yordani entsungeni wa Betsayida. Hambi swi ri tano, vanhu vo tala va va vona va famba, naswona van’wana va byeriwa ha swona. Lava hinkwavo va tsutsumela emahlweni hi ribuwa, naswona loko byatso byi yima, va va kwalaho leswaku va va hlanganisa.

Loko a huma ebyatsweni kutani a vona ntshungu lowukulu, Yesu a susumetiwa hi ntwelo-vusiwana hikuva vanhu va fana ni tinyimpfu leti nga riki na murisi. Kutani u horisa vavabyi va vona ivi a sungula ku va dyondzisa swilo swo tala.

Hi ku hatlisa nkarhi wa hundza, na swona vadyondzisiwa va Yesu va ta eka yena ivi va ku: “Lomu i mananga, naswona ri perile; va tlherise, va ya eswimitaneni ni le mitini leyi nga kusuhi va ya tixavela swakudya.”

Hambi swi ri tano, loko a hlamula Yesu u ri: “Va phameleni n’wina!” Kutani, tanihi leswi Yesu ana se a a tiva leswi a a ta swi endla, u ringe Filipi hi ku n’wi vutisa a ku: “Xana hi nga xava kwihi swinkwa leswaku vanhu lava va kota ku dya ke?”

Hi ku ya hi langutelo ra Filipi xiyimo a xi koteki. Ina, ku na kwalomu ka vavanuna va 5 000 ntsena, naswona kumbexana ku tlula 10 000 wa vanhu loko hi hlaya vavasati ni vana! Filipi wa hlamula a ku: “Swikwa swa tidenari ta 200 [denari hi nkarhi wolowo a yi ri hakelo ya siku rin’we] swi nga ka swi nga ringani hambi loko un’wana ni un’wana a nga kuma xiphemu lexitsongo ntsena.”

Kumbexana ku kombisa ku nga koteki ko phamela vanhu vo tarisa leswi, Andriya u ri: “Ku ni mufana kwala, la nga ni swinkwa swa ntlhanu swa maxalana, ni tinhlampfinyana timbirhi;” a engetela a ku: “Kambe swi nga ringana mani eka vanhu vo tarisa leswi xana?”

Tanihi leswi ku nga nkarhi wa ximun’wana, emahlweninyana ka Paseka ya 32 C.E., ku ni byanyi byo tala bya rihlaza. Kutani Yesu u rhuma vadyondzisiwa va yena leswaku va byela vanhu ku tshama ebyanyini hi mintlawa ya 50 ni ya 100. U teka swinkwa swa ntlhanu ni tinhlampfi timbirhi, a languta etilweni, ivi a khongela. Kutani u sungula ku phemelela swinkwa ni ku avanyisa tinhlampfi. U swi nyika vadyondzisiwa va yena, lava na vona va swi avelaka vanhu. Hi laha ku hlamarisaka, vanhu hinkwavo va dya ku fikela loko va xurha!

Endzhaku ka sweswo Yesu u byela vadyondzisiwa va yena a ku: “Hlengeletani mahlanhla lama saleke, leswaku ku nga cukumetiwi nchumu.” Loko va endla tano, va ta ta swirhundzu swa 12 hi leswi saleke eka leswi va swi dyeke! Matewu 14:13-21; Marka 6:30-44; Luka 9:10-17; Yohane 6:1-13.

◆ Ha yini Yesu a lavela vaapostola va yena ndhawu ya xihundla?

◆ Xana Yesu u yisa vadyondzisiwa vakwe kwihi, naswona hikwalaho ka yini xilaveko xa vona xo wisa xi nga hetiseki?

◆ Loko ri perile xana vadyondzisiwa va khutaza yini, kambe xana Yesu u khathalela vanhu hi ndlela yihi?