Mufumi Loyi A Nga Lawulaka Moya Ni Lwandle

Vanhu va tsakisiwe swinene hi leswi Yesu a phameleke vanhu va magidi hi singita. Va gimete hi ku vula leswaku “hakunene loyi hi yena Muprofeta loyi a a fanele ku ta emisaveni,” ku nga Mesiya nileswaku a a ta va mufumi lonene. (Yohane 6:14; Deteronoma 18:18) Kutani vanhu va kunguhata ku khoma Yesu leswaku va ta n’wi endla hosi.

Hambiswiritano, Yesu wa swi vona leswi vanhu lava va swi kunguhataka. Hiloko a byela ntshungu leswaku wu hangalaka ivi a byela vadyondzisiwa vakwe leswaku va tlhelela exikepeni. Xana a va ya kwihi? Va ya eKapernawume naswona va ta hundza hi le kusuhi na Betsayida. Loko ku ri Yesu, u ya entshaveni a ri yexe leswaku a ya khongela vusiku byebyo.

Leswi a ka ha ri ni n’weti naswona a ri nga si xa, Yesu u vona xikepe xa ha ri ekule. Magandlati ya lwandle ma hungiwa hi xidzedze naswona vaapostola swa va ‘tikela ku fambisa xikepe hileswi ku baka moya lowukulu.’ (Marka 6:48) Hiloko Yesu a ehla entshaveni kutani a sungula ku famba ehenhla ka magandlati a ya eka vona. Hi nkarhi lowu, se a “va fambe kwalomu ka ntlhanu kumbe tsevu wa tikhilomitara.” (Yohane 6:19) Vadyondzisiwa va vona onge Yesu u lava ku va hundza kutani va huwelela hi ku chava va ku: “I yini lexi taka?”—Marka 6:49.

Yesu u va chavelela a ku: “Mi nga chavi; hi mina.” Kambe Petro a hlamula a ku: “Hosi, loko ku ri wena, ndzi pfumelele ndzi famba ehenhla ka mati ndzi ta eka wena.” Yesu a n’wi hlamula a ku: “Tana!” Hiloko Petro a xika exikepeni, a famba ehenhla ka mati a ya eka Yesu. Kambe loko Petro a languta xidzedze, a sungula ku chava ivi a mbombomela. Kutani a huwelela a ku: “Hosi, ndzi ponise!” Yesu a n’wi khoma hi voko kutani a ku: “Wena wa ripfumelo leritsongo, hikwalaho ka yini u kanakana?”—Matewu 14:27-31.

Hiloko Petro na Yesu va nghena exikepeni kutani xidzedze xi yima. Vadyondzisiwa vakwe va sale va lo gabaa kambe xana a va fanele va hlamala? Loko a va lo twisisa “nhlamuselo ya singita ra swinkwa,” ku nga singita leri Yesu a ri endleke eka tiawara ti nga ri tingani leti hundzeke loko a phamela vanhu va magidi, vaapostola a va ta va va nga hlamarisiwanga hileswi Yesu a fambeke ehenhla ka mati ni ku miyeta xidzedze. Kambe sweswi a va sungula ku n’wi khinsamela va ku: “Hakunene u N’wana wa Xikwembu.”—Marka 6:52; Matewu 14:33.

Va hetelele va fike endhawini yo saseka swinene naswona yi noneke, leyi nga rivala ra Genesareta edzongeni wa Kapernawume. Hiloko va boha xikepe eka nsoma kutani va kongoma ehlalukweni. Vanhu va n’wi vonile Yesu ku katsa ni van’wana lava nga ekusuhi ni tiko rero, kutani va n’wi tisela vanhu lava vabyaka. Loko vanhu lava va khoma xiambalo xa Yesu xa le handle, a va hola.

Nilokoswiritano, ntshungu lowu voneke loko vanhu va magidi va phameriwa hi singita, wu xiya leswaku Yesu u fambile. Kutani loko ku fika xikepe lexitsongo xa le Tiberiyo, vanhu va khandziya va ya eKapernawume leswaku va ya lava Yesu. Endzhaku ko n’wi kuma, va n’wi vutisa va ku: “Rabi, u fike rini laha?” (Yohane 6:25) Yesu u wu tshinya hi ndlela leyinene hilaha hi nga ta swi vona hakona.