Vutomi Ni Vutirheli Bya Yesu

Mufumi La Tlulaka Munhu La Naveriwaka

LOKO Yesu hi singita a phamela magidi, vanhu va hlamala. “Hakunene, loyi hi yena Muprofeta la faneleke ku ta emisaveni,” ku vula vona. A va dlayeleli hi ku vula leswaku Yesu u fanele a ri muprofeta wo tlula Muxe ntsena kambe ni leswaku u ta va mufumi la navelekaka. Kutani va kunguhata ku n’wi khoma ivi va n’wi endla hosi.

Hambi swi ri tano, Yesu wa swi tiva leswi va swi kunguhataka. Kutani hi ku anghwetla wa suka ku papalata ku vutliwa hi vona. U hangalasa ntshungu, a sindzisa vadyondzisiwa vakwe ku ya khandziya ebyatsweni bya vona ivi va tlhelela eKapernawume, ivi a tlhelela entshaveni ku ya khongela. Hi vusiku byebyo Yesu u kwale a ri yexe.

Hi ku anghwetla ri nga si xa Yesu u languta hi le xivandleni xakwe lexi tlakukeke ivi a vona magandlati lama hungiwaka hi bubutsa lerikulu elwandle. Hi ku vonakala ka n’weti lowu heleleke, tanihi leswi ku nga kusuhi ni Paseka, Yesu u vona byatso ni vadyondzisiwa vakwe va ri karhi va tsandzeka ku hlula magandlati. Vavanuna va tluta hi matimba ya vona hinkwawo.

Loko a vona leswi, Yesu a rhelela entshaveni ivi a sungula ku ya ebyatsweni a tsemakanya magandlati. Loko a hlanganisa mpfhuka wa kwalomu ka tikhilomitara ta ntlhanu kumbe tsevu, u fika eka vadyondzisiwa vakwe. Hambi swi ri tano, u ya emahlweni a endla onge wa va hundza. Loko va n’wi vona, va huwelela: “I xipuku!”

Yesu hi ku chavelela wa hlamula: “Hi mina; mi nga chaveni!”

Kambe Petro a ku: “Hosi, loko u ri wena hakunene, lerisa leswaku ndzi ta kwalaho hi le henhla ka mati.”

“Tana!” ku hlamula Yesu.

Kutani, Petro, a huma ebyatsweni, a famba ehenhla ka mati a ya eka Yesu. Kambe loko a vona mheho, Petro a khomiwa hi ku chava, kutani a sungula ku mbombomela, a huwelela: “Hosi, ndzi ponise!”

Hi ku hatlisa a tshambuluta voko rakwe, Yesu a n’wi khoma, a ku: “Munhu wa ku pfumela lokutsongo, u kanakanile ha yini xana?”

Endzhaku ka loko Petro na Yesu va nghenile ebyatsweni, bubutsa ra miyela, kutani vadyondzisiwa va hlamala. Kambe a va fanele ku va tano? Loko va twisisile “mahlori ya swinkwa” hi ku tlangela singita lerikulu leri Yesu a ri endleke hi tiawara ti nga ri tingani emahlweninyana ro phamela magidi hi swinkwa swa ntlhanu ni tinhlampfi timbirhi letintsongo ntsena, kutani a swi nga fanelanga swi tikombe swi hlamarisa loko a kote ku famba henhla ka mati ni ku endla leswaku bubutsa ri miyela. Hambi swi ri tano, sweswi vadyondzisiwa va nkhinsamela Yesu ivi va ku: “Hakunene u N’wana wa Xikwembu.”

Hi xinkarhana va fika eGenesareta, rivala ro xonga, leri nga ni mihandzu ekusuhi na Kapernawume. Kwalaho va kuleka byatso. Kambe loko va ya eribuweni, vanhu va tiva Yesu ivi va ya etikweni hinkwaro, va lava lava vabyaka. Loko lava va tisiwa hi tinhlaka ta vona ivi va khumba makumu ya nguvu ya Yesu ntsena, va hanyisiwa.

Siku leri tlhandlamaka ntshungu lowu voneke singita ra ku phamela ka magidi wu tshubula leswaku Yesu u fambile. Kutani loko mabyatso lama humaka eTiberiyasi ma fika, va khandziya mabyatso lawa ivi va pelela eKapernawume ku ya lava Yesu. Loko va n’wi kuma, va vutisa: “Mufundhisi, u tile rini la?” Nhlamulo ya Yesu yi ta va leyi hlavutelaka. Yohane 6:14-25; Matewu 14:22-36; Marka 6:45-56.

◆ Endzhaku ka loko Yesu hi singita a phamele magidi, xana vanhu va lava ku endla yini hi yena?

◆ Yesu u vona yini entshaveni leyi a balekeleke eka yona, kutani u endla yini?

◆ Ha yini vadyondzisiwa va nga fanelanga ku hlamarisiwa hi swilo leswi?

◆ Ku humelela yini loko va fika eribuweni?

[Xifaniso lexi tataka tluka hinkwaro lexi nga eka tluka 9]