I Mani N’wana Wa Munhu?

Yesu ni vadyondzisiwa vakwe va fika eBetsayida. Vanhu va tisa wanuna la nga voniki eka Yesu kutani va n’wi kombela leswaku a n’wi khumba ku a ta hola.

Yesu a khoma wanuna loyi hi voko a n’wi yisa ehandle ka muti. Loko a n’wi tote marha ematihlweni, Yesu u n’wi vutisa a ku: “U vona yini?” Wanuna u hlamula a ku: “Ndzi vona vanhu, kambe va fana ni mirhi leyi fambafambaka.” (Marka 8:23, 24) Loko Yesu a n’wi khoma matihlo, u sungule ku vona. Kutani u byela wanuna loyi se a vonaka kahle leswaku a muka, a nga ngheni emutini.

Yesu ni vadyondzisiwa vakwe va ya emahlweni va kongoma en’walungwini wa xifundzha xa Khezariya wa Filipi. A ku ri mpfhuka wa kwalomu ka 40 wa tikhilomitara. Muti lowu wu tlakuke timitara ta 350 ehenhla ka vuandlalo bya lwandle naswona wu ni Ntshava ya Herimoni leyi nga ni gamboko leyi nga en’walunguvuxa. Swi nga endleka riendzo leri ri teka masiku yo hlayanyana.

Loko va ri endleleni, Yesu a suka a ya khongela a ri yexe. Ku lo sala kwalomu ka kaye kumbe khume ra tin’hweti leswaku Yesu a fa naswona u karhatekile hi vadyondzisiwa vakwe. Vo tala va ha ku tshika ku n’wi landzela naswona van’wana swi nga endleka leswaku va pfilunganyekile kumbe va hele matimba. A va tivutisa leswaku a alela yini loko vanhu va lava ku n’wi endla hosi kumbe lexi endleke leswaku a nga va nyiki xikombiso xa leswaku hi yena mani.

Loko vadyondzisiwa va ta laha a khongelaka kona, Yesu u va vutisa a ku: “Xana vanhu va ri N’wana wa munhu i mani?” Va hlamula va ku: “Van’wana va ri i Yohane Mukhuvuri, van’wana va ri i Eliya, kasi van’wanyana va ri i Yeremiya kumbe un’wana wa vaprofeta.” Ina, vanhu va ehleketa leswaku Yesu hi un’wana wa vanhu lava pfuxiweke eku feni. Leswaku a tiva leswi va swi ehleketaka, Yesu u vutisa vadyondzisiwa vakwe a ku: “Kambe n’wina mi ri hi mina mani?” Petro a hlamula hi ku hatlisa a ku: “Hi wena Kreste, N’wana wa Xikwembu lexi hanyaka.”—Matewu 16:13-16.

Yesu u vula leswaku Petro wa tsaka hileswi Xikwembu xi n’wi hlavuteleke swilo leswi, a engetela a ku: “Nakambe, ndzi ri eka wena: Hi wena Petro naswona eka ribye leri ndzi ta aka vandlha ra mina, tinyangwa ta Sirha a ti nge ri hluli.” Yesu u hlamusela leswaku yena hi xiviri u ta aka vandlha nileswaku hambi ku ri Sirha ri nge swi koti ku hambukisa swirho swa rona loko swi tshama swi tshembekile emisaveni. U tshembisa Petro a ku: “Ndzi ta ku nyika swikhiya swa Mfumo wa matilo.”—Matewu 16:18, 19.

Yesu a nga nyiki Petro xivandla xo sungula eka vaapostola naswona a nga n’wi endli masungulo ya vandlha. Yesu hi byakwe i Ribye leri vandlha a ri ta akiwa ehenhla ka rona. (1 Vakorinto 3:11; Vaefesa 2:20) Hambiswiritano, Petro u ta nyikiwa swikhiya swinharhu. U ta va ni nkateko wo pfulela mitlawa ya vanhu ndlela yo nghena eMfun’weni wa matilo.

Petro a a ta tirhisa xikhiya xo sungula hi Pentekosta ya 33 C.E., a kombisa Vayuda ni vaproselita lava hundzukeke leswi va faneleke va swi endla leswaku va ponisiwa. A a ta pfulela Vasamariya lava nga ni ripfumelo ndlela yo nghena eMfun’weni wa Xikwembu hi ku tirhisa xikhiya xa vumbirhi. Endzhaku hi 36 C.E., Petro a a ta tirhisa xikhiya xa vunharhu ku pfulela Vamatiko lava nga yimbangiki, Korneliyo ni van’wana ndlela.—Mitirho 2:37, 38; 8:14-17; 10:44-48.

Eka bulo leri, vaapostola va Yesu va karhatiwa hi vuprofeta byakwe lebyi vulavulaka hi ku xanisiwa ni ku dlayiwa kakwe loku a nga ta langutana na kona ku nga ri khale eYerusalema. Petro a nga swi twisisi leswaku Yesu u ta pfuxeriwa ku ya hanya etilweni, hikwalaho u n’wi kokela etlhelo ivi a n’wi tshinya, a ku: “Titsetselele, Hosi; khombo leri ri nga ka ri nga ku weli nikatsongo.” Kambe Yesu wa n’wi fularhela hi ku n’wi hlamula a ku: “Suka eka mina Sathana! U xikhunguvanyiso eka mina, hikuva u ehleketa ku fana ni vanhu ku nga ri Xikwembu.”—Matewu 16:22, 23.

Sweswi Yesu u vitana van’wana handle ka vaapostola vakwe ivi a va hlamusela leswaku a swi nge olovi ku va mulandzeri wakwe. U ri: “Loyi a lavaka ku ndzi landzela, a a titshike kutani a rhwala mhandzi yakwe ya nxaniso a ndzi landzela nkarhi hinkwawo. Hikuva loyi a lavaka ku ponisa vutomi byakwe u ta lahlekeriwa hi byona, kambe loyi a lahlekeriwaka hi vutomi byakwe hikwalaho ka mina ni hikwalaho ka mahungu lamanene u ta tlhela a byi kuma.”—Marka 8:34, 35.

Valandzeri va Yesu va fanele va va ni xivindzi va tlhela va titsona swo karhi leswaku va ta amukeleka eka yena. Yesu u ri: “Loyi a khomiwaka hi tingana hikwalaho ka mina ni leswi ndzi swi vulaka eka xitukulwana lexi, lexi nga tshembekiki ni lexi hombolokeke, N’wana wa munhu na yena u ta khomiwa hi tingana ha yena loko a ta hi ku vangama ka Tata wakwe a ri ni tintsumi to kwetsima.” (Marka 8:38) Loko Yesu a fika, “u ta hakela un’wana ni un’wana hi ku ya hi mitirho yakwe.”—Matewu 16:27.