Xilaveko Xo Rivalela

Petro u twe xitsundzuxo xa Yesu xa ndlela ya ku lulamisa swiphiqo exikarhi ka vamakwerhu hi ku ringeta ku vulavurisana. Nilokoswiritano, swi ti komba Petro a lava ku tiva nhlayo ya mikarhi leyi munhu a faneleke a rivaleriwa yona.

Petro u vutisa a ku: “Hosi, loko makwerhu a ndzi dyohela, xana ndzi fanele ndzi n’wi rivalela kangani? Ka nkombo ke?” Varhangeri van’wana va vukhongeri va dyondzisa leswaku munhu u fanele a rivalela kanharhu. Swi nga endleka Petro a vona onge u ta va a hanana ngopfu loko a rivalela makwerhu “ka nkombo.”—Matewu 18:21.

Hambiswiritano, ku hlayelela swihoxo a swi fambisani ni dyondzo ya Yesu. Kutani u lulamisa Petro a ku: “Mina ndzi ri, hayi ka nkombo, kambe ka 77.” (Matewu 18:22) Hi marito man’wana, sweswo swi vula ku rivalela hilaha ku nga heriki. Mikarhi leyi Petro a rivalelaka makwerhu hayona a yi fanelanga yi hela.

Yesu u ya emahlweni a hlamusela Petro ni van’wana xifaniso lexi kandziyisaka vutihlamuleri bya vona bya ku rivalela. Xi vulavula hi nandza loyi a tsandzekaka ku tekelela n’wini wakwe loyi a nga ni musa. Hosi yi lava ku sula swikweleti swa malandza ya yona. Ku tisiwa nandza loyi a yi kolotaka xikweleti lexikulu xa 10 000 wa titalenta ku nga [60 000 000 wa tidenari]. A nge swi koti ku hakela xikweleti xexo. Hikwalaho, hosi yi lerisa leswaku nandza, nsati ni vana vakwe va xavisiwa leswaku ku hakeriwa xikweleti. Hiloko nandza a khinsama emilengeni ya n’wini wakwe a kombela a ku: “Ndzi lehisele mbilu ndzi ta ku hakela hinkwaswo leswi ndzi ku kolotaka swona.”—Matewu 18:26.

Leswi hosi yi nga ni musa ni ntwelavusiwana, yi sula xikweleti lexikulu xa nandza loyi. Loko hosi yi heta ku endla sweswo, nandza loyi a suka a ya kuma nandzakulobye loyi a n’wi kolotaka tidenari ta 100. Hiloko a khoma nandzakulobye kutani a sungula ku n’wi tlimba mikolo, a ku: “Hakela mali ya mina.” Kambe nandza yoloye a wela emilengeni ya nandza loyi a n’wi kolotaka, a n’wi kombela a ku: “Ndzi lehisele mbilu ndzi ta ku hakela.” (Matewu 18:28, 29) Hambiswiritano, nandza loyi hosi yi suleke xikweleti xakwe, a nga n’wi tekeleli n’wini wakwe. U lerisa leswaku nandza loyi a n’wi kolotaka xikweleti lexitsongo, a hoxiwa ekhotsweni kukondza a heta ku hakela.

Endzhakunyana, Yesu u hlamusela leswaku malandza man’wana lama voneke ku khomiwa loku ko biha, ma sukile ma ya byela n’wini wa wona loyi a vitanaka nandza yoloye a hlundzukile ivi a ku: “Wena nandza wo homboloka, ndzi sule xikweleti xa wena loko u ndzi kombela. Xana na wena a wu nga fanelanga u ve ni tintswalo eka nandzakuloni, hilaha na mina ndzi veke ni tintswalo eka wena?” Hosi leyi hlundzukeke yi lerisa leswaku nandza yoloye loyi a nga riki na musa a hoxiwa ekhotsweni kukondza a hakela xikweleti hinkwaxo. Yesu u gimeta hi ku vula a ku: “Tata wa mina la nge matilweni u ta endla hilaha ku fanaka eka n’wina loko un’wana wa n’wina a nga rivaleli makwavo hi mbilu hinkwayo.”—Matewu 18:32-35.

Mayana dyondzo leyi hi faneleke hi yi dyondza ya ku rivalela! Xikwembu xi hi rivalele xikweleti xa xidyoho lexikulu. Xidyoho xin’wana ni xin’wana lexi makwerhu a hi endlelaka xona i xitsongo loko xi pimanisiwa ni xikweleti lexi. Nakambe Yehovha a nga hi rivaleli kan’we ntsena kambe u hi rivalela mikarhi ya magidi. Xana a hi nge n’wi rivaleli makwerhu mikarhi yo tala hambiloko hi ri ni xivangelo xo va hi khunguvanyeka? Hilaha Yesu a vuleke hakona eka Dyondzo ya le Ntshaveni, Xikwembu xi ta ‘rivalela swidyoho swa hina, tanihi leswi na hina hi rivalelaka lava hi dyohelaka.’—Matewu 6:12.