Vutomi Ni Vutirheli Bya Yesu

Dyondzo Ya Ku Rivalela

YESU u vonaka a ha ri endlwini eKapernawume ni vadyondzisiwa va yena. A a vulavula na vona hi ndlela yo lulamisa ku nonon’hwa exikarhi ka vamakwavo, kutani Petro wa vutisa: “Hosi, loko makwerhu a tshamela ku ndzi dyohela, xana ndzi ta n’wi rivalela kangani xana?” Tanihi leswi vadyondzisi va vukhongeri va Vayuda va vulaka leswaku ku fanele ku rivaleriwa ku fikela kanharhu, kumbexana Petro u swi vone swi ri swinene ngopfu ku vula a ku: “Swi nga va ka 7 xana?”

Kambe mianakanyo hinkwayo ya ku hlayisa rhekhodo yo tano yi hoxile. Yesu u lulamisa Petro: “A ndzi ku byeli ku n’wi rivalela ka 7, kambe ndzi ri ka 7 loku hlayiwaka ka 70.” U kombisa leswaku a ku na ndzilakana lowu faneleke ku vekiwa eka nhlayo ya minkarhi leyi Petro a rivalelaka makwavo.

Leswaku a kandziyisa xilaveko xa ku rivalela eka vadyondzisiwa, Yesu u va byela xifaniso. Xi vulavula hi hosi leyi lavaka ku lulamisa swikweleti ni malandza ya yona. Nandza un’wana u tisiwa eka loyi a nga na xikweleti lexikulu xa tidenari ta 60 000 000 (kwalomu ka R100 000 000). A ku na ndlela leyi a nga xi hakelaka ha yona. Kutani ke, hi laha Yesu a hlamuselaka ha kona, hosi yi lerisa leswaku yena ni nsati wa yena ni vana va yena va xavisiwa ivi va hakeriwa.

Hi loko nandza a wela emilengeni ya n’wini wa yena kutani a kombela a ku: “Ndzi lehisele mbilu, ndzi ta ku tlherisela hinkwaswo.”

Hi ku susumetiwa hi ntwelo-vusiwana, n’wini hi tintswalo u sula xikweleti lexikulu xa nandza. Yesu u ya emahlweni, kambe ku nga ri khale a endle sweswo, hi loko nandza loyi a famba kutani a kuma nandza-kulobye loyi a n’wi kolotaka tidenari ta 100 ntsena (kwalomu ka R180). Wanuna a khoma nandza-kulobye hi nkolo kutani a sungula ku n’wi tlimbetela, a ku: “Humesa mali ya mina!”

Kambe nandza loyi a nga na yona mali. Kutani a wela emilengeni ya nandza loyi a n’wi kolotaka, a kombela a ku: “Ndzi lehisele mbilu, ndzi ta ku tlherisela hinkwaswo.” Ku hambana ni n’wini wa yena, nandza a nga na tintswalo, kutani a endla leswaku nandza-kulobye a hoxiwa ekhotsweni.

Yesu u ya emahlweni, malandza man’wana lama voneke leswi humeleleke ma ye ma ya byela n’wini. Yena, hi ku fanana, a vitana nandza hi ku hlundzuka. “Nandza lowo biha!” ku vula yena, “a ndzi ku rivalele nandzu wa wena hinkwawo, leswi a wu ndzi komberile; xana a swi nga ku fanelanga na wena ku tsetselela nakuloni, kukotisa leswi na mina ndzi nga ku tsetselela ke?” Hi ku kariha lokukulu, n’wini u nyiketa nandza wo pfumala tintswalo eka maphorisa ku kondza a hakela leswi a swi kolotaka.

Kutani Yesu wa hetelela: “Tata wa mina wa le matilweni ú ta endlisa sweswo eka n’wina, loko un’wana ni un’wana wa n’wina a nga rivaleri makwavo hi mbilu hinkwayo ya yena.”

Mayana dyondzo leyinene hi ku rivalela! Loko xi ringanisiwa ni xikweleti lexikulu xidyoho lexi Xikwembu xi hi rivaleleke xona, xidyoho xihi kumbe xihi lexi makwerhu wa Mukriste a nga hi endlelaka xona i xintsongo hakunene. Ku tlula kwalaho, Yehova Xikwembu u hi rivalele hi minkarhi ya magidi. Hakanyingi, a hi swi voni hambi ku ri swidyoho swa hina eka yena. Hikwalaho, xana a hi nge va rivaleri vamakwerhu minkarhi yi nga ri yingani, hambi loko hi ri na xivangelo lexi twalaka xa ku vilela? Tsundzuka, hi laha Yesu a dyondziseke ha kona eka Dyondzo ya le Ntshaveni, Xikwembu xi ta “hi rivalela swidyoho swa hina, tanihi loko na hina hi rivalela lava hi dyohelaka.” Matewu 18:21-35; 6:12; Vakolosa 3:13.

◆ I yini lexi vangelaka xivutiso xa Petro mayelana ni ku rivalela makwavo, naswona ha yini a nga tekaka mianakanyo ya yena ya minkarhi ya 7 yi ri leyinene?

◆ Endlelo ra hosi eka xikombelo xa nandza wa yena a ri hambana njhani na endlelo leriya ra nandza eka xikombelo xa nandza-kulobye?

◆ Hi dyondza yini eka xifaniso xa Yesu?