U Ni Vun’we Na Tatana Kambe Yena A Hi Xikwembu

Yesu u te eNkhubyeni wa ku Nyiketeriwa Ka Tempele eYerusalema (kumbe, Hanukkah). Nkhuvo lowu i wa ku tsundzuka ku nyiketeriwa ka tempele ra vumbirhi. Hosi ya Siriya Antiochus wa Vumune Epiphanes, u ake alitari ehenhla ka alitari leyikulu etempeleni ya Xikwembu endzhaku ka malembe ya dzana. Endzhakunyana, vana va majaha va muprista loyi a nga Muyuda, va tlhele va teka Yerusalema ni ku tlhela va nyiketela tempele eka Yehovha. Ku sukela kwalaho, lembe ni lembe a ku va ni nkhuvo hi ti 25 ta Chislev, ku nga n’hweti leyi fambisanaka ni ku hela ka November ni ku sungula ka December.

I nkarhi wa xixika, ku nga nguva ya maxelo yo titimela. Yesu u famba etempeleni endhawini leyi vuriwaka rikupakupa ra Solomoni. Kwalaho, Vayuda va n’wi rhendzela ivi va ku: “Xana hi ta rindza ku fikela rini? Loko u ri Kreste hikwalaho ka yini u nga hi byeli?” (Yohane 10:22-24) Yesu u ta va hlamula njhani? U va hlamula a ku: “Ndzi mi byerile kambe a mi ndzi tshembanga.” Yesu a nga si tshama a va byela hi ku kongoma leswaku hi yena Kreste, hilaha a n’wi byeleke hakona wansati wa Musamariya exihlobyeni. (Yohane 4:25, 26) Hambiswiritano, u tipaluxile hi ku vula a ku: “Hakunene ndzi tiyisile ndzi ri eka n’wina, ndzi ve kona Abrahama a nga si va kona.”—Yohane 8:58.

Yesu u lava leswaku vanhu va tivonela hi voxe leswaku hi yena Kreste hi ku ringanisa mitirho leyi a yi endlaka ni leyi ku profetiweke leswaku Kreste u ta yi endla. Leswi hi swona leswi endleke mikarhi yin’wana a byela vadyondzisiwa vakwe leswaku va nga byeli munhu ku hi yena Mesiya. Kambe sweswi a nga kanakani ku byela Vayuda volavo lava kariheke a ku: “Mitirho leyi ndzi yi endlaka hi vito ra Tatana, ya ndzi vulavulela. Kambe a mi ndzi tshembi.”—Yohane 10:25, 26.

Hikwalahokayini va nga tshembi leswaku Yesu hi yena Kreste? U ri: “A mi ndzi tshembi hikuva a mi tinyimpfu ta mina. Tinyimpfu ta mina ti yingisa rito ra mina, ndza ti tiva naswona ta ndzi landzela. Ndzi ti nyika vutomi lebyi nga heriki, a ti nge lovisiwi naswona a nga kona loyi a nga ta ti wutla evokweni ra mina. Tinyimpfu leti Tata wa mina a ndzi nyikeke tona i ta nkoka swinene naswona a nga kona loyi a nga ti wutlaka evokweni rakwe.” Yesu u va byela hi ndlela leyi vuxaka byakwe ni Tata wakwe byi nga byikulu hayona, u ri: “Mina na Tatana hi ni vun’we.” (Yohane 10:26-30) Yesu u vulavula a ri emisaveni naswona Tata wakwe u le tilweni kutani a nga vuli swona leswaku yena na Tata wakwe va swin’we hi xiviri. Ku ri na sweswo, va tirhisana naswona va ni xikongomelo xin’we.

Marito ya Yesu ma hlundzukisa Vayuda lerova va rhwala maribye nakambe leswaku va ta n’wi dlaya. Yesu a swi n’wi chavisi sweswo. U ri: “Ndzi mi kombe mitirho yo tala leyinene leyi humaka eka Tatana. Hi wihi ntirho lowu mi lavaka ku ndzi khandlela wona?” Va ri: “A hi ku khandleli ntirho lowunene kambe hi ku khandlela leswi u sandzaka ni ku tiendla xikwembu.” (Yohane 10:31-33) Yesu a nga si tshama a tiendla xikwembu kutani hikwalahokayini va vula leswaku u tiendla xikwembu?

Leswi Yesu a swi vulaka hileswaku u ni matimba lawa Vayuda va ehleketaka leswaku i Xikwembu ntsena xi nga na wona. Hi xikombiso, loko a vulavula hi “tinyimpfu” u te: “Ndzi ti nyika vutomi lebyi nga heriki,” ku nga nchumu lowu vanhu va nga kotiki ku wu endla. (Yohane 10:28) Vayuda va honisa mhaka ya leswaku matimba lawa Yesu a nga na wona ma huma eka Tata wakwe.

Loko Yesu a landzula xihehlo xa vona xa mavunwa, u va vutisa a ku: “Xana a ku tsariwanga eNawini wa n’wina [eka Pisalema 82:6] leswaku ‘Ndzi te: “Mi swikwembu”’? Loko xi va vule ‘swikwembu’ lava rito ra Xikwembu ri vuleke leswaku a va lulamanga, . . . [hikwalahokayini mi vula leswi eka mina loyi Tatana a n’wi hlawuleke] a tlhela a [n’wi] rhuma emisaveni, . . . mi ku, ‘Ndza sandza,’ hileswi ndzi nga te, ‘Ndzi N’wana wa Xikwembu’?”—Yohane 10:34-36.

Ina, hambi va ri vaavanyisi vo biha lava nga vanhu, Bibele yi va vitana “swikwembu.” Loko swi ri tano, hikwalahokayini Vayuda lava va vona Yesu nandzu loko a ku, “Ndzi N’wana wa Xikwembu”? U va byela nchumu lowu nga ta va khorwisa a ku: “Loko leswi ndzi swi endlaka swi nga humi eka Tatana, mi nga ndzi tshembi. Kambe loko swi huma eka yena, hambiloko mi nga ndzi tshembi, tshembani leswi ndzi swi endlaka leswaku mi ta swi tiva leswaku mina na Tatana hi ni vun’we.”—Yohane 10:37, 38.

Hiloko Vayuda va ringeta ku khoma Yesu kambe a tlhela a va balekela. U suka eYerusalema ivi a ya entsungeni wa Yordani, laha Yohane a sunguleke kona ku khuvula vanhu emalembeni ya mune lama hundzeke. Kona a hi kule ni le dzongeni wa Lwandle ra Galeliya.

Mitshungu yi ta eka Yesu yi ku: “Yohane a nga endlanga singita ni rin’we kambe swilo hinkwaswo leswi a swi vuleke hi munhu loyi a swi ri ntiyiso.” (Yohane 10:41) Xisweswo, Vayuda vo tala va pfumela eka Yesu.