Vutomi Ni Vutirheli Bya Yesu

Matshalatshala Man’wana Yo Dlaya Yesu

LESWI ku nga xixika, Yesu u famba endhawini leyi fuleriweke leyi tiviwaka tanihi rikupakupa ra Solomoni. Hi le tlhelo ka tempele. Laha Vayuda va n’wi rhendzela kutani va sungula ku: “U ta hi kanakanisa ku fikela rini xana? Loko u ri yena Mesiya, hi byele xikan’we u nga rhendzeleki.”

Yesu a hlamula a ku: “Ndzi mi byerile, kambe a mi pfumeri. Yesu a a nga va byelanga hi ku kongoma leswaku a a ri Kriste, tanihi laha a byeleke wansati wa Musamariya ha kona exihlobyeni. Kambe entiyisweni, a a paluxe nhlamuselo ya yena loko a va hlamusele leswaku a a huma exivandleni xa le henhla naswona u ve kona emahlweni ka Abrahama.

Hambi swi ri tano, Yesu u lava leswaku vanhu va wa fikelela hi voxe makumu ya leswaku hi yena Kriste hi ku pimanisa mintirho ya yena ni leswi Bibele yi vuleke leswaku Kriste a a ta swi endla. Hi yona mhaka leyi eku sunguleni a layeke vadyondzisiwa va yena ku ka va nga byeli munhu leswaku a a ri Kriste. Naswona hi yona mhaka leyi sweswi a yaka emahlweni a byela Vayuda lava kanetaka a ku: “Mintirho leyi ndzi yi endlaka hi vito ra Tata wa mina, yi veka vumbhoni ehenhla ka mina. Kambe a mi pfumeri.”

Ha yini va nga pfumeli? Xana i mhaka ya ku pfumaleka ka vumbhoni bya leswaku Yesu i Kriste? Doo, kambe i mhaka ya xivangelo lexi Yesu a xi nyikeke loko a va byela a ku: “A mi tinyimpfu ta mina. Tinyimpfu ta mina ti yingisa rito ra mina; ndza ti tiva, kutani ta ndzi landza. Ndzi ti nyika vutomi lebyi nga heriki; ti nga ka ti nga lovi ni siku ni rin’we, na swona a ku na munhu la nga ta ti vutla evokweni ra mina. Tata wa mina la ndzi nyikeke tona, u nkulukumba ku tlula hinkwaswo; kutani a ku na munhu la kotaka ku vutla nchumu evokweni ra Tatana.”

Manuku Yesu u hlamusela vuxaka bya yena bya le kusuhi ni Tata wakwe, a hlamusela a ku: “Mina na Tatana hi un’we.” Leswi Yesu a nga emisaveni naswona Tata wakwe a nga etilweni, swi le rivaleni ku a nga vuli swona leswaku yena ni Tata wakwe i un’we hi ku kongoma, kumbe hi miri. Ematshan’wini ya sweswo, u vula leswaku i van’we hi xikongomelo kumbe va ni vun’we.

Hikwalaho ka ku hlundzukisiwa hi marito ya Yesu, Vayuda va rhwalela maribye yo n’wi dlaya, tanihi laha va endleke ha kona eka tin’hweti ti nga ri tangani emahlweninyana, hi nkarhi wa Nkhuvo wa Mintsonga. Loko a kongomana ni lava a va ta va vadlayi va yena hi xivindzi, Yesu u ri: “Ndzi mi kombile mintirho leyo tala leyo saseka, leyi humaka eka Tatana; xana, eka yona, hi wihi ntirho lowu mi ndzi khandlelaka wona xana?”

Va hlamula va ku: “A hi ku khandleli ntirho lowunene, kambe hi leswi u sandzaka Xikwembu, ni leswi u tiendlaka Xikwembu, kasi wena u munhu ntsena.” Leswi Yesu a nga tivulangiki Xikwembu, ha yini Vayuda va vule leswi?

Entiyisweni i mhaka ya leswi Yesu a tinyikeke matimba lama va tshembaka leswaku i ya Xikwembu ntsena. Hi xikombiso, wa ha ku vulavula hi “tinyimpfu” a ku, “ndzi ti nyika vutomi lebyi nga heriki,” ku nga nchumu lowu ku nga riki na munhu loyi a nga wu endlaka. Hambi swi ri tano, Vayuda, va honisa ntiyiso wa leswaku Yesu u tlangela leswaku u kuma vuhosi eka Tata wakwe.

Leswaku Yesu u tivula lontsongo eka Xikwembu, u swi kombisa ku ya emahlweni hi ku vutisa a ku: “Xana a ku tsariwanga eNawini wa n’wina [eka Psalma 82:6] leswaku Xikwembu xi te: ‘Mi swikwembu,’ xana?” Xi va vurile ‘swikwembu,’ vona lava Rito ra Xikwembu ri fikeke eka vona; kutani Tsalwa ri nga ka ri nga dlayiwi. Kutani ke, hikwalaho ka yini mi ku: ‘U sandza Xikwembu,’ hi mhaka ya leswi ndzi nga te: ‘Ndzi N’wana wa Xikwembu,’ xana? Kasi hi mina loyi Tatana a nga n’wi hlawula ni ku n’wi rhuma emisaveni.”

Ina, leswi Matsalwa ya vitanaka hambi va ri vaavanyisi lavo homboloka va vanhu “swikwembu,” i xihoxo xihi lexi Vayuda lava va nga xi kumaka eka Yesu loko a ku, “Ndzi N’wana wa Xikwembu”? Yesu wa engetela a ku: “Loko ndzi nga endli mintirho ya Tata wa mina, mi nga ndzi pfumeli! Kambe loko ndzi endla yona, hambi mi nga ndzi pfumeIi, pfumelani yo mintirho, mi ta tiva ni ku twisisa leswaku Tatana u le ka mina, na mina ndzi le ka Tatana.”

Loko Yesu a vula leswi, Vayuda va ringeta ku n’wi khoma. Kambe wa baleka, tanihi laha a endleke ha kona emahlweninyana eNkhubyeni wa Mintsonga. U suka eYerusalema kutani a famba a pela Nambu wa Yordani a ya laha Yohane a sunguleke ku khuvula kona kwalomu ka malembe ya mune emahlweninyana. Swi le rivaleni leswaku ndhawu leyi a yi le kule ni ribuwa ra le dzongeni ra Lwandle ra Galeliya, i riendzo ra masiku mambirhi kumbe ku tlula ku suka eYerusalema.

Vanhu vo tala va ta eka Yesu endhawini leyi kutani va sungula ku: “Yohane a nga endlanga ni xikombiso ni xin’we, kambe hinkwaswo leswi Yohane a nga swi vula henhla ka munhu loyi, swi tiyile.”’ Xisweswo kwalaho vo tala va pfumela eka Yesu. Yohane 10:22-42; 4:26; 8:23, 58; Matewu 16:20.

◆ Hi tihi tindlela leti Yesu a lavaka leswaku vanhu va n’wi tiva ha tona tanihi Kriste?

◆ Yesu ni Tata wakwe i un’we hi ndlela yihi?

◆ Entiyisweni, ha yini Vayuda va vula leswaku Yesu u tiendla Xikwembu?

◆ Ku tshaha ka Yesu eka Tipsalma ku kombisa njhani leswaku a nga tivuli loyi a ringanaka ni Xikwembu?